Dhavhidha na Goliyate

Ka khati go kari, Jehovha i no byela Samuweli, aku: ‘Famba kaya ka Jese. A mun’we wa vafana vakwe i tava hosi yi landzelako ya Izrayeli’. Hikwalaho, Samuweli i noya kaya ka Jese. A cikhati leci a nga wona mufana wa Jese loyi wa nhondzo, i no ti byela lezvi: ‘A jaha legi hi gona gi to maha hosi’. Kanilezvi Jehovha i no byela Samuweli lezvaku a hi yena. Hi kulandzela, Jehovha i te: ‘Ndzi cuwuka lezvi zvi nga mbilwini ya munhu. A ndzi cuwuki lezvi a munhu a wonekisako zvona’.

Jese i no vitanisa van’wani vana vakwe va 6 vata ka Samuweli. Kanilezvi Samuweli i te: ‘Jehovha a nga hlawulangi ne mun’we wabye. A wu na vana van’wani ke’? Jese aku: ‘Ndzi na ni mun’wani wa ndzisana ka vontlhe, hi Dhavhidha. I le ka ku risa tiyivhu ta mina’. A cikhati leci Dhavhidha a nga chikela, Jehovha i no byela Samuweli, aku: ‘Hi yaloyi!’ Samuweli i no chulula mafura hlokweni ya Dhavhidha, a mu tota kota hosi yi landzelako ya Izrayeli.

Loku ku hundzile cikhati co kari, a vaIzrayeli va noya va yalwa ni vaFilistiya. A vaFilistiya va wa hi ni musochwa wa cihotlovila wa ku hi Goliyate, loyi a nga va lwela. Siku ni siku, Goliyate i wa poyilela vaIzrayeli, a banguleka, aku: ‘Rumelani wanuna seno a talwa na mina. Loku a ndzi hlula, hi ta maha tikhumbi ta n’wina. Kanilezvi loku ndzi mu hlula, mu ta maha tikhumbi ta hina’.

Dhavhidha i noya laha a masochwa ya vaIzrayeli ma nga hi kona na a heleketa zvakuga ka vamakabye vakwe, lava vonawu va nga hi masochwa. Dhavhidha i nozwa Goliyate, a gumesa aku: ‘Ndzi talwa naye’! Hosi Sawule aku: ‘Wa hi n’wanana’. Dhavhidha aku: ‘Jehovha i ta ndzi vhuna’.

Sawule i no nyika Dhavhidha a matlhari yakwe ni lezvi a nga ti vhikela hi zvona. Kanilezvi Dhavhidha i te: ‘A ndzi nge zvi koti kulwa na ndzi bohile lezvi’. Dhavhidha i no teka cipelupelu cakwe aya cicongwaneni. I no ya hlawula 5 wa maribye, a ma chela lomu ka paxta yakwe a gumesa a tsutsuma a kongoma ka Goliyate. A cihotlovila leco ci no banguleka, ciku: ‘Ngone, cifanyana ndziwena. Ndzi ta ku nyikela u giwa hi zvinyanyani zva tilo ni zvihari zva khwati’. Dhavhidha i wa nga chavi. Yenawu i no banguleka, aku: ‘Wena uta ni cipadha ni tlhari, kanilezvi mina ndzita hi vito ga Jehovha. A wulwi na hina; ulwa na Nungungulu. Vontlhe va nga laha, va ta zvi wona lezvaku Jehovha i na ni ntamu wa hombe nguvhu a ku hundza cipadha kutani tlhari. N’wentlhe i ta mu nyikela canjeni ga hina’.

Dhavhidha i no chela ribye laha ka cipelupelu a gi ndziwilitela a gumesa a gi hoxela hi ntamu wakwe wontlhe. Hi ku vhuniwa hi Jehovha, a ribye gi no yaba Goliyate laha cikandzeni gi bhoxa gi nghena. Goliyate, a cihotlovila leco, i nowa lahasi a tekela kufa kwalaho. Makunu a vaFilistiya lava van’wani va no tsutsuma kasi va nga dawi. Wena ke, wa mu tsumba Jehovha a ku fana na Dhavhidha?