Davida Na Goliate

A VAFILISTIA va engeta vata a ku talwa na Israeli. A vamakabye vanharu va tinhonzwa ta Davida va lomu ka butho ga Saule makunu. Kasike a siku go kari Jese i byela Davida ku ngalo: ‘Teka mavele ni zibaba u zi yisa ka vamakabye va wena. U ya tiva a kuhanya kabye.’

Laha Davida a chikelako le wugovelweni ga mabutho, i tsutsumela mitlawa yi yako kulweni a ya lava vamakabye vakwe. Ku huma Goliate a xihotlovila xa muFilistia a ku ta kanyisa vaIsraeli. Yena i sina a maha lezo mixo ni gambo hi 40 wa masiku. Yena i huwelela aku: ‘Hlawulani munwe wa masochwa ya nwina kasi ku talwa na mina. Loku yena a nzi hlula a nzi daya, hina hi ta maha tikhumbi ta nwina. Kanilezi loku mina nzi mu hlula nzi mu daya, nwina mu ta maha tikhumbi ta hina. Nza mu phika lezaku mu humesa munhu wa ku talwa na mina.’

Davida i wutisa masochwa yo kari aku: ‘Zini a to zi kuma loyi a to daya a muFilistia loyi a susa Israeli hi ka nzhukano lowu ke?’

A musochwa aku: ‘Saule i ta nyika a wanuna loye a titshomba tinyingi. Yena i ta tlhela a mu nyika a n’wana wakwe wutsumbu wa nhanyana lezaku ava sati wakwe.’

Kanilezi a vaIsraeli vontlhe va mu chava Goliate hi lezi a nga xihotlovila. Yena i na ni xipimo xa 3 wa timetro hi kuleha, yenawu i na ni munwani musochwa loyi a welelako a xitlhangu xakwe.

A masochwa yo kari ma famba ma ya byela Hosi Saule lezaku Davida i lava kulwa na Goliate. Kanilezi Saule i ngalo ka Davida: ‘A wu nge zi koti kulwa ni muFilistia loyi. Wena wa hi mufana, kuveni yena i sina ave musochwa wutomini gakwe gontlhe.’ Davida a hlamula: ‘Mina nzi dele a urso ni nghala zi nga tekile tiyivu ta raru wa mina. Ni muFilistia loyi i ta fana ni xinwe xa zona. Jehova i ta nzi vuna.’ Hikwalaho Saule aku: ‘Famba, ngha Jehova ava na wena.’

Davida i relela xicongwaneni a ya rola ntlhanu wa maribye ya timbokota, a ma chela lomu nkwameni wakwe. Zonake a teka a lingoti lakwe la wundande a huma a ku ya tlhangana ni xihotlovila. Laha Goliate a mu wonako, a nga zi kholwi. Yena i alakanya lezaku zi ta hehuka nguvu ku daya Davida.

Goliate aku ngalo: ‘Tana ka mina, nzi ta nyikela a miri wa wena wu giwa hi tinyanyani ni zihari.’ Kanilezi Davida aku: ‘Wena uta ka mina ni supado, ni tlhari ni hubhula, kanilezi mina nzita ka wena hi vito ga Jehova. Ka siku ga nyamutlha Jehova i ta ku nyikela mandleni ya mina nzi ku daya.’

Zalezo Davida i tsutsumela Goliate. A teka a ribye lomu nkwameni wakwe, a gi chela lomu lingotini lakwe la wundande, a gi hoxa hi ntamu wakwe wontlhe. A ribye gi se ya tlhotlhora a hloko ya Goliate, yena awa lahasi afa! Laha a vaFilistia va wonako lezaku a nghwazi yabye yi wile, vontlhe va se djika va tsutsuma. A vaIsraeli va va hlongolisa va tlhela va hlula a kulwa.