Dhavhidha na Sawule

Andzhako ka loku Dhavhidha a dele Goliyate, Hosi Sawule i no mu yimisa lezvaku a rangela masochwa yakwe. Dhavhidha i no hlula tiyimpi to tala a tlhela ava munhu wo tiveka nguvhu. Ka makhati wontlhe lawa Dhavhidha a nga wuya hi yimpini, a vavasati va wa huma na va kina ni ku yimbelela, vaku: ‘Sawule i dele 1000. Kanilezvi Dhavhidha i dele 10 000’! Sawule i no sangula ku lusela Dhavhidha, a zama ku mu daya.

Dhavhidha i wa zvi kota kuba khwatsi a citende. Ka siku go kari, Dhavhidha na a kari a mu chayela citende hosi Sawule, Sawule i no hoxela tlhari gakwe kasi ku daya Dhavhidha. Dhavhidha i no tekela ku vhika, a tlhari gi ya bhoxa khurisi. Andzhako ka lezvo, Sawule i no simama ku hlota tindlela tin’wani ta ku daya Dhavhidha. Hi kugumesa, Dhavhidha i no tsutsuma a ya fihlala ciwuleni.

Sawule i no teka 3000 wa masochwa va famba va hlota Dhavhidha. Na a nga zvi tivi, i noya a ya nghena ka mhako yaleyi Dhavhidha ni vavanuna vakwe va nga fihlele ka yona. A vavanuna va Dhavhidha va no mu hlevela, vaku: ‘Hi lowu a mole wa ku daya Sawule!’ Dhavhidha i no xiyelela a ya tsema choka ya bhaji ga hosi Sawule. Kanilezvi Sawule a nga zvi zwangi. Andzhako ka lezvo, Dhavhidha i no tizwa nguvhu nandzu hi lezvi a nga kala ku kombisa cichavo hi hosi yi totilweko ya Jehovha. A nga vhumelangi ku a vavanuna vakwe va daya Sawule. Loku Sawule a humile, Dhavhidha i no mu angula na a hi le kule, a mu byela lezvaku loku i wa no zvi lava na a mu dayile a cikhati leci a nga kuma mole. Xana Sawule i cicile lezvi a nga mu wonisa zvona Dhavhidha?

Ahihi. Sawule i no simama ku hlota Dhavhidha. Ka wusiku go kari, Dhavhidha ni zukulu wakwe Abhixayi va no ya nghena lomu Sawule a nga etlele kona. Hambu Abneri, a nga hi guardha ga Sawule, yenawu i wa etlele. Abhixayi i no byela Dhavhidha, aku: ‘Hi lowu mole! Ndzi tsike ndzi mu daya’. Dhavhidha aku: ‘Jehovha hi yena a to xuxa a mhaka ya mina na Sawule. Wena a hi teke a tlhari gakwe ni botori gakwe ga mati basi hi famba’.

Dhavhidha i noya le hehla ka citsunga ci nga hi kusuhani ni laha Sawule a nga etlele kona a ya banguleka, aku: ‘Abneri, hikuyini u nga kala ku vhikela a hosi ya wena? Gi kwihi a tlhari ga Sawule ni botori gakwe ke?’ Sawule i no zvizwa a ku hi Dhavhidha a wulawulako, a gumesa aku: ‘Ndza zvi wona ku na u ndzi dele. Hambulezvo, a wu ndzi dayangi. Ndza zvi tiva lezvaku u tava hosi yi landzelako ya Izrayeli’. Sawule i no tlhela ndlwini yakwe ya wuhosi. Kanilezvi a hi vontlhe laha ngangweni wa Sawule va nga zonda Dhavhidha.