Jesu a hlawula Sawule

Sawule i wa hi muRoma a nga pswaliwa le Tarsusi. I wa hi muFarisi a nga wu tiva khwatsi a Nayo wa ciJudha, niku i wa ma zonda nguvhu a maKristu. I wa khomela vavanuna ni vavasati va maKristu lomu mitini yabye a ya va vhalela paxweni. A cikhati leci a vanhu vo tala va nga zangarile va nga gandla mupizani Stefani hi maribye, i wa hi kona kambe a cuwukisela.

Sawule i wa nga xalali hi ku khomela maKristu ya Jerusalema basi. I noya ka mupristi wa hombe a ya kombela lezvaku a mu ruma le dhoropeni ga Dhamasku kasi a ya lavetela maKristu ya seyo kambe a ma khomela. A cikhati leci Sawule a nga kari a chikela le Dhamasku, i no wona kungangamela hi citshuketi ku woninga kontlhe laha a nga hi kona, awa lahasi. I nozwa gezu, giku: ‘Sawule, hikuyini u ndzi xanisako’? Sawule i no wutisa, aku: ‘Hi wena mani’? A gezu gi hlamula, giku: ‘Hi mina Jesu. Nghena lomu Dhamasku. U ta ya byeliwa lezvi u faneleko ku maha’. Hi citshuketi, Sawule i nofa matihlo. Hikwalaho, va no mu khometela hi woko kasi a nghena lomu dhoropeni ga Dhamasku.

Lomu Dhamasku ku wa hi ni muKristu wo tsumbeka wa ku hi Ananiyasi. Jesu i no byela Ananiyasi hi lomu ka muwoniso, aku: ‘Famba mutini wa Judha, wu nga laha ruweni gi vitaniwako ku Go Lulama, u ya lava Sawule’. Ananiyasi aku: ‘Hosi, ndza zvi tiva zvontlhe zvi mahiwako hi wanuna loyi! I khomela vapizani va wena a va vhalela mapaxweni’! Kanilezvi Jesu aku: ‘Famba ka Sawule. Ndzi mu hlawulile lezvaku a ya chumayela mahungu ya manene ka matiko yo tala’.

Hikwalaho, Ananiyasi i no ya kumana na Sawule, a mu byela lezvi: ‘Sawule makabye wa mina, Jesu i ndzi rumile ku ta ku vhulula matihlo’. Zvalezvo, Sawule i no sangula ku wona kambe. I no gondza xungetano hi Jesu, a sangula ku mu landzela. Lezvi makunu a nga bhabhatisilwe kota muKristu, Sawule i no sangula ku chumayela lomu masinagogeni na a hi zvin’we ni valandzeli van’wani va Kristu. U alakanya lezvaku a vaJudha va ti zwisile kuyini a cikhati va nga wona Sawule na a gondzisa vanhu xungetano hi Jesu? Va no hlamala nguvhu, vaku: ‘A hi yena wanuna loyi a nga kari a khomela vapizani va Jesu ke’?

Hi malembe manharu, Sawule i no chumayela vanhu va nga tshama le Dhamasku. A vaJudha va wa mu zonda Sawule. Hikwalaho, va no maha makungo ya ku mu daya. Kanilezvi a vamakabye va no zvi tiva va gumesa va vhuna Sawule kasi a nga dawi. Va no mu nghenisa lomu ka cirundzu va mu releta lahasi hi laha ka bhoxo gi nga hi laha ka muro wa dhoropa.

A cikhati leci Sawule a ngaya le Jerusalema, i no zama ku ti patsa ni vamakabye. Kanilezvi va wa mu chava. A mupizani wo kari wa munene wa ku hi Bharnabhasi i no famba na Sawule ka vapostoli a tlhela a va kholwisa lezvaku Sawule i cicile futsi. Sawule i no sangula ku chumayela mahungu ya manene ni bandla ga le Jerusalema hi kuhiseka. Hi ndzhako ka cikhati, i no tiviwa kota Pawule.