A munhu wa kubiha a nga cica ke?

XANA zi wa nga ta saseka loku a vanhu vontlhe va wo maha za zi nene? — Kanilezi, i hava a tshamako hi ku maha za zi nene basi. Wa zi tiva a ku hikuyini hontlheni hi tshukako hi maha zilo za kubiha? — Hi lezaku hontlheni hi pswaliwa ni xionho. Kanilezi, a vanhu vo kari va maha zilo zo tala za kubiha nguvu. Va venga vanwani va tlhela va va bayisa ha womu. U alakanya lezaku a vanhu lavo va nga cica va gonza ku maha za zi nene ke? —

Cuwuka a wanuna loyi a wonelelako tinguwo ta lava va gandlako Stefani hi maribye. A vito gakwe ga xiHeberu hi Saule, kanilezi a ga xiRoma hi Paule. I lo tsaka nguvu hi lezi ku nga dawa Stefani, loyi a nga hi mupizani wa Mugonzisi wa Hombe. A hi wone a ku hikuyini Saule a nga maha zilo lezo za kubiha.

Saule i wa lumba a ntlawa wa wukhongeli ga xiJuda wu nga vitaniwa ku vaFarisi. A vaFarisi va wa hi ni Mhaka ya Nungungulu, kanilezi va wa nyika nguvu lisima lezi a varangeli vabye va wukhongeli va nga zi gonzisa. Lezo zi mahile ku Saule a maha zilo za kubiha.

A xikhati lexi Stefani a nga khomiwa le Jerusalema, Saule i wa hi konawu. Stefani i lo tekiwa aya hubyeni ya kulamula, a valamuli vo kari xikari kabye va wa hi vaFarisi. Hambu lezi va nga kari va wulawula zilo zo tala zo biha hi yena, Stefani a nga chavangi. I lo tekela ku tiya hlana a xumayela a valamuli xungetano hi Jehova Nungungulu na Jesu.

Kanilezi, a valamuli lavo va wa nga zi tsakeli lezi va nga kari va zizwa. Va wa sina va tiva zilo zo tala hi Jesu. Hi lisine, a xikhati lexi ku nga maheka lezo, ku wa nga hunzi xikhati xo leha na va nyikele Jesu kasi a dawa! Kanilezi anzhako ka lezo, Jehova i lo vuxa Jesu a mu tlhelisa tilweni. Makunu, wutshanwini ga ku cica mahanyela yabye, a valamuli lavo va lo vukela vapizani va Jesu.

Va lo khoma Stefani, va mu humesa lomu doropeni. Va mu wisa lahasi va sangula ku mu gandla hi maribye. Niku kota lezi u zi wonako laha ka mufota, Saule i konawu a zi wona. I wa alakanya ku zi nene a ku daya Stefani.

Wa zi tiva a ku hikuyini Saule a nga alakanya lezo? — Wutomini gakwe gontlhe i wa hi muFarisi, niku i wa kholwa lezaku lezi a vaFarisi va nga kari va zi gonzisa zi wa hi zi nene. Saule i wa wona a varangeli va wukhongeli ga vaFarisi kota zikombiso zi nene, hikwalaho i lo va pimanyisa. — Mitiro 7:54-60.

Anzhako ka kuva Stefani a delwe, zini lezi Saule a nga maha? — I lo zama ku mbheta vapizani vontlhe va Jesu! I lo nghena lomu tindlwini tabye a khomela a vavanuna ni vavasati. Zonake a va nghenisa paxweni. A vapizani vo tala va lo suka le Jerusalema, kanilezi va wa nga nyimi ku xumayela xungetano hi Jesu. — Mitiro 8:1-4.

Lezo zi lo maha Saule a va venga nguvu a vapizani va Jesu. Hikwalaho, i loya ka Mupristi wa Hombe Kayafasi a ya kombela lezaku a ya khomela maKristu doropeni ga Damasku; zonake a vumelelwa. Saule i wa lava ku wuya navo le Jerusalema kota zibochwa kasi va ta xanisiwa. Kanilezi, a xikhati lexi a nga kari aya Damasku ku lo humelela nchumu wo hlamalisa.

Ku lo woneka a kuwonekela ka hombe hi le tilweni, zonake ku zwala gezu giku: “Saule, Saule, hi yini u nzi xanisako ke?” Hi Jesu a nga kari a wulawula na a hi le tilweni! A kuwonekela loko ku wa hi ka hombe nguvu laha ka kuza Saule afa mahlo, zonake a vanhu lava va nga hi na Saule va lo mu teka va famba naye Damasku.

Anzhako ka masiku manharu, Jesu i lo woneka lomu ka noro ka mupizani wakwe le Damasku, loyi a vito gakwe ku nga hi Ananiasi. Jesu i lo byela Ananiasi lezaku a enzela Saule, kasi a ya mu vulula mahlo lezaku ma wona a tlhela a wulawula naye. A xikhati lexi Ananiasi a nga wulawula naye, Saule i lo vumela lisine xungetano hi Jesu. Zalezo, a mahlo yakwe ma lo tlhela ma wona. A wutomi gakwe gontlhe gi lo cica, niku i lo maha nanza go tsumbeka ga Nungungulu. — Mitiro 9:1-22.

Wa zi wona makunu a ku hikuyini Saule a nga maha zilo za kubiha? — Hi ku i wa gonzisilwe zilo zo kala zi nga hi lisine. I wa pimanyisa vanhu vo kala va nga tsumbeki ka Nungungulu. I wa lumba a ntlawa wa vanhu va nga kari va nyika nguvu lisima a mawonela ya vanhu ku hunza a Mhaka ya Nungungulu. Kanilezi, hikuyini Saule a nga cica a wutomi gakwe a sangula ku maha za zi nene, hambu lezi a vaFarisi vanwani va nga simama valwa na Nungungulu? — Hi ku Saule i wa nga vengi lisine. Hikwalaho, a xikhati lexi a nga gonzisiwa lisine, i lo ti yimisela ku yi lanzela.

Wa zi tiva a ku Saule i gumesile a maha mani? — Hi zona, i gumesile a tiviwa kota mupostoli Paule, a mupostoli wa Jesu. Niku alakanya lezaku Paule hi yena a nga tsala mabhuku yo tala ya Biblia a ku hunza vanwani.

Ku na ni vanhu vo tala vo fana na Saule lava vonawu zi kotekako a ku va cica. Kanilezi a zi olovi, hakuva ku na ni wokari a ti karatelako ku kucetela vanhu lezaku va maha zilo za kubiha. Wa mu tiva a ku himani? — Jesu i wulawulile hi yena a xikhati lexi a nga wulawula na Saule na aya Damasku. Na a hi le tilweni, Jesu i lo byela Saule aku: ‘Nza ku rumela lezaku u ya vulula a mahlo ya vanhu, va huma munyameni vata kuwonekeleni, ni ku suka ntanwini wa Satani vata ka Nungungulu.’ — Mitiro 26:17, 18.

Kunene, hi Satani Diabolusi a zamako ku kucetela vanhu vontlhe lezaku va maha zilo za kubiha. Ka zikhati zinwani za ku karatela a ku maha zilo za zi nene? — Hontlheni za tshuka zi hi karatela. Hi Satani a mahako zi karata. Kanilezi, ku na ni xigelo xinwani xi mahako lezaku zi nga hi oloveli a ku tshama hi ku maha za zi nene. Wa xi tiva a xigelo xa kona? — Hi ku hi pswalilwe na hi hi ni xionho.

A xionho lexo hi xona xi mahako lezaku zi olova a ku hi maha zilo zo tala za kubiha a ku hunza za zi nene. Makunu, zini hi faneleko ku maha? — Ina, hi fanele ku ti karata kasi hi maha za zi nene. Loku hi maha lezo, hi nga tiyiseka lezaku Jesu, loyi a hi ranzako, i ta hi vuna.

A xikhati lexi Jesu a nga hi laha misaveni, i lo komba lezaku i wa ranza vanhu va nga mahile zilo zo biha kanilezi va nga gumesa va cica. I wa zi tiva lezaku zi va karatele a kuva va cica. Hi xikombiso, ku wa hi ni wasati wo kari a nga hlengele masango ni vavanuna vo tala. Lezo zi wa bihile. A Biblia gi wula lezaku a vavasati vo kota loye zibhayi.

Ka khati go kari, a munwe wa vavasati lavo i lozwa zokari hi Jesu, zonake i loya ndlwini ya muFarisi lomu Jesu a nga hi kona. I lo chulula mafura mikonzweni ya Jesu a tlhela a yi tsakamisa hi mihloti yakwe a gumesa a yi sula hi misisi yakwe. I wo ti sola nguvu hi zionho zakwe, hikwalaho Jesu i lo mu tsetselela. Kanilezi, a muFarisi loye i wa zi wonisa ku khwatsi a wasati loye a nga faneli ku tsetselelwa. — Luka 7:36-50.

Wa zi tiva lezi Jesu a nga wula, ka khati ginwani, ka vaFarisi vo kari? — I lo va byela lezi: ‘A zibhayi za mu rangela ku nghena mufunweni wa Nungungulu.’ (Mateu 21:31) Jesu i wulile lezo hakuva a zibhayi lezo zi lo kholwa ka yena, zi gumesa zi cica mahanyela ya zona yo biha. Kanilezi, a vaFarisi va lo simama ku maha zo biha ka vapizani va Jesu.

Hikwalaho, a xikhati lexi a Biblia gi hi kombako lezaku lezi hi zi mahako zi bihile, hi fanele ku ti yimisela ku cica. Niku a xikhati lexi hi tivako lezi Jehova a lavako lezaku hi maha, hi fanele ku tsakela ku zi maha. Zonake Jehova i ta hi tsakela a tlhela a hi nyika wutomi ga pinzukelwa.