Hikuyini zi karatako a ku maha za zi nene?

A XIKHATI lexi Saule a nga kari a maha zilo zo biha, himani loyi a nga kari a tsaka? — Hi Satani. A varangeli va wukhongeli ga xiJuda vonawu va wa tsaka. Kanilezi, a xikhati lexi Saule a nga maha mupizani wa Mugonzisi wa Hombe, a varangeli va vaJuda va lo sangula ku mu venga. Makunu, wa zi wona a ku hikuyini a mupizani wa Jesu zi mu karatelako ku maha za zi nene? —

Paule i xanisekile nguvu a xikhati lexi a nga maha mupizani wa Jesu. A mupristi wa hombe wa ku hi Ananiasi i lo byela vavanuna vo kari lezaku vaba Paule. Ananiasi i lo tlhela a zama ku nghenisa Paule paxweni. Hi xikombiso, a vanhu vo biha va loba Paule va tlhela va zama ku mu daya hi maribye. — Mitiro 23:1, 2; 2 Va Le Korinte 11:24, 25.

A vanhu vo tala va zama ku hi kucetela ku maha zilo lezi zi nga mu tsakisiko Nungungulu. Hikwalaho, ku vuka a ziwutiso lezi: Wa zi ranza ku maha za zi nene ke? U zi ranza laha ka ku hambu loku a vanwani va ku venga hi kota ya ku maha za zi nene u ta simama u zi maha? Zi lava ku tiya hlana kasi ku maha za zi nene, a hi zona? —

Kuzilava wa tshuka u ti wutisa a ku: Xana loku hi maha za zi nene, a vanhu va wa ta hi venga ke? Kasi va wa nga ta tsaka? Kunene, u alakanya lezaku va wa fanele ku tsaka. Ka zikhati zinwani Jesu i wa tsakelwa hi vanhu vo tala nguvu hi kota ya zilo za zi nene lezi a nga kari a zi maha. Ka khati go kari, a vanhu vontlhe va doropa go kari va lo tlhangana laha nyangweni ya yindlu leyi Jesu a nga hi ka yona. Va loya laho a nga hi kona hi kota ya lezi a nga kari a hanyisa vanhu. — Marku 1:33.

Kanilezi ka zikhati zinwani, a vanhu va wa nga zi tsakeli lezi Jesu a nga kari a gonzisa. Hambu lezi xontlhe xikhati a nga kari a gonzisa za zi nene, a vokari va lo mu venga nguvu hi lezi a nga kari a gonzisa lisine. Lezo zi tshukile zi humelela ka doropa legi Jesu a nga kulela ka gona. I loya ka sinagoga, ku nga hi wutshamu legi a vanhu va nga tlhangana kona kasi ku khozela Nungungulu.

Ka wutshamu lego Jesu i lo veka kanelo ya yi nene nguvu. Kusanguleni a vanhu va lo zi tsakela nguvu lezo. Va lo hlamala nguvu hi magezu lawa Jesu a nga kari a wulawula. Zi lo va karatela ku kholwa lezaku lego gi wa hi gona a jaha legi va nga gi wona ni ku kula kwalomu doropeni gabye.

Kanilezi Jesu i lo wula zinwani kambe. I lo wulawula hi xikhati lexi Nungungulu a nga katekisa vanhu va nga kala va nga hi vaJuda. A xikhati lexi Jesu a nga wula lezo, lava va nga hi lomu sinagogeni va lo zangara. Wa zi tiva a ku hikuyini? — Va wa alakanya lezaku hi vona voce va fanelweko hi ku katekisiwa hi Nungungulu. Va wa alakanya kambe lezaku va wa hi va nene ku hunza vanwani. Hikwalaho, va lo venga Jesu hi kota ya lezi a nga wulile. Wa zi tiva a ku zini lezi va nga gumesa va zama ku mu maha? —

A Biblia gi ngalo: ‘Va lo mu humesa lahandle ka doropa, va mu yisa le hehla ka xitsunga, kasi va fela ku mu nikinya lahasi va mu daya! Kanilezi Jesu i lo va tsutsuma.’ — Luka 4:16-30.

Loku lezo zo tshuka zi ku humelela, xana u wa ta tlhela kambe u ya bhulela a vanhu lavo xungetano hi Nungungulu? — Lezo zi wa ta lava ku tiya-hlana, a hi zona? — Hambulezo, loku ku hunzile lembe, Jesu i lo tlhela aya Nazareta. A Biblia gi hi byela lezi: “I lo va gonzisa sinagogeni gabye.” Jesu a nga nyimangi ku wulawula a lisine hi ku chava vanhu lava va nga kala va nga mu ranzi Nungungulu. — Mateu 13:54.

Ka siku ginwani, hi Sabado, Jesu i loya ka wutshamu legi ku nga hi ni wanuna loyi a nga hi xilema kutani xikhurubu. Jesu i wa hi ni ntamu a nga nyikilwe hi Nungungulu kasi ku hanyisa a wanuna loye. Kanilezi, a vavanuna vo kari va nga hi lomo va lo zama a ku mu vangela zikarato Jesu. Zini lezi Mugonzisi wa Hombe a nga maha? — A ku sangula i lo va wutisa aku: ‘Loku mu hi ni yivu yi weleko ka nkele wa hombe hi Sabado, xana mu wa ta yi tsika mu nga yi humesi?’

Ahihi, va wa ta yi humesa a yivu leyo, hambu loku ku hi Sabado, ku nga hi siku legi va nga alakanya lezaku i siku ga kuhumula. Hikwalaho, Jesu i te ngalo: ‘Zi wa tava zi nene a ku vuna a wanuna loye hi Sabado, hakuva a munhu i na ni lisima a ku hunza a yivu!’ Handle ko kanakana, zi wa ringana a ku vuna wanuna loye, hi ku mu hanyisa!

Jesu i lo byela a wanuna loye lezaku a nawuluta a canja gakwe. A canja gakwe gi lo tekela ku hanya. A wanuna loye i lo tsaka nguvu hi lezo! Kanilezi ahati a vavanuna lava vanwani ke? Xana vonawu va tsakile? — Ahihi. Va lo mu venga nguvu Jesu. Va lo huma va ya bhula lezi va nga wa ta mu dayisa zona Jesu! — Mateu 12:9-14.

Za fana ni nyamutlha. Kani zini hi mahako, hi nga ta tshuka hi zi kota ku tsakisa vontlhe. Hikwalaho, hi fanele ku hlawula ku himani hakunene loyi hi lavako ku mu tsakisa. Loku hi lava ku tsakisa Jehova Nungungulu ni N’wana wakwe, Jesu Kristu, xontlhe xikhati hi fanele ku maha lezi va hi gonzisako. Kanilezi, loku hi maha lezo, himani loyi a to hi venga? Himani loyi a to maha lezaku zi hi karatela ku maha za zi nene? —

Hi Satani Diabolusi. Kanilezi hi vamani vanwani? — Hi lava va kalavelweko hi Diabolusi lezaku va kholwa a zilo za hava. Jesu i lo byela varangeli va wukhongeli va xikhatini xakwe aku: “Nwina mu vana va raru wa nwina a nga Satani, mu ranza ku maha a kunavela ka raru wa nwina.” — Johani 8:44.

Ku na ni vanhu vo tala lava Diabolusi a va lavako. Jesu i va vitana ku i “tiko.” U alakanya a ku xini a tiko legi Jesu a nga wulawula hi gona? — Hi zona, a hi vulule a bhuku ga Johani xipimo 15, vesi 19 kasi hi zi wona. Hi gonza a magezu ya Jesu ma nge: “Loku mu wa hi va tiko, a tiko ngha gi ranzile a za gona; kanilezi lezi mu nga hiko va tiko, kanilezi mu hlawulilwe hi mina, nzi mu susa tikweni, hikwalaho a tiko ga mu venga.”

Hikwalaho, a tiko legi gi vengako a vapizani va Jesu gi wumbiwa hi vanhu vontlhe lava va kalako va nga hi vapizani vakwe. Hikuyini a tiko gi vengako a vapizani va Jesu? — Alakanyela lezi. Himani a hosi ya tiko? — A Biblia gi ngalo: “A tiko gontlhe gi le ntanwini wa loyi wa kubiha.” A munhu loye wa kubiha hi Satani Diabolusi. — 1 Johani 5:19.

Wa zi wona makunu a ku hikuyini zi karatako nguvu a ku maha za zi nene? — Hi Satani ni tiko gakwe va zi mahako zi karata. Kanilezi ku na ni xigelo xinwani. Wa xi alakanya a ku hi xihi? — Lomu ka Xipimo 23 xa bhuku legi, hi tivile lezaku hi pswalilwe na hi hi ni xionho. Zi nga ta tsakisa a xikhati lexi a xionho, Diabolusi, ni tiko gakwe va to kala va nga ha hi kona? —

A Biblia gi tsumbisa lezi: “A tiko ga hunza.” Lezo zi wula ku vontlhe lava va kalako va nga hi valanzeli va Mugonzisi wa Hombe va nga ta hava kona. Va nga ta tsikiwa va hanya kala kupinzuka. Wa mu tiva ku himani loyi a to hanya kala kupinzuka? — A Biblia giya mahlweni giku: “Loyi a mahako kuranza ka Nungungulu i ta tshama kala kupinzuka.” (1 Johani 2:17) Ina, ntsena lava va mahako za zi nene, lava va “mahako kuranza ka Nungungulu,” hi vona va to hanya kala kupinzuka misaveni yiswa ya Nungungulu. Hikwalaho, hambu loku zi karata hi fanele ku maha za zi nene, a hi zona? —