Saule—a Hosi Yo Sangula Ya Israeli

WONA Samueli na a chulula mafura laha hlokweni ya wanuna loyi. Lezi hi zona va nga kari va zi mahela a munhu na va fela ku komba lezaku yena i wa hlawulilwe kota hosi. Jehova i byela Samueli a ku chulula mafura laha hlokweni ya Saule. Mafura yo hlawuleka ma nuhelako.

Saule i wa nga alakanyi lezaku yena i wa fanela ku maha hosi. Yena i ngalo ka Samueli: ‘Nzi lumba a lixaka la ka Benjamini, leli li nga litsongwani ka tontlhe lomu Israeli. Hikuyini u wulako ku ngalo nzi ta maha hosi?’ Jehova i ranza Saule hakuva yena a nga ti mahi wa hombe kutani wa lisima. Lezo hi zona zi mahako lezaku Yena a mu hlawula kasi kuva hosi.

Kanilezi Saule a hi xisiwana kutani wanuna wa mutsongwani. Yena i huma hi ka ngango wo ganya, niku i sasekile nguvu, na a lehile. Yena i hunza vontlhe lomu Israeli hi kuleha, vontlhe va gumesela lomu makatleni yakwe! Saule kambe mutsutsumi wa hombe nguvu, niku yena i wanuna wa ntamu nguvu. A vanhu va tsaka hi lezi Jehova a hlawulileko Saule lezaku a maha hosi. Vona vontlhe va sangula ku kanyuluka vaku: ‘A yi hanye hosi!’

A valala va Israeli va ha hi ni ntamu. Vona va ha vangela vaIsraeli a zikarato zo tala. Xikhatanyana nzhako ka loku Saule a mahilwe hosi, a vaAmoni vata a ku talwa na vona. Kanilezi Saule i hlengeleta a butho ga hombe, zonake a hlula a kulwa mahlweni ka vaAmoni. Lezo zi maha a vanhu va tsaka hi lezi Saule a nga hosi.

Laha a malembe ma hunzako, Saule i rangela vaIsraeli ka kuhlula ko tala mahlweni ka valala vabye. Saule kambe i na ni n’wana wa nhenha a vitwako Jonatani. Niku Jonatani i vuna Israeli a ku hlula a kulwa ko tala. A vaFilistia va ha simama kuva valala va hombe va vaIsraeli. Siku go kari makume ya mazana ni makume ya mazana ya vaFilistia vata a ku talwa ni vaIsraeli.

Samueli i byela Saule lezaku a rinzela kala a chikela a ta maha muphahlelo, kutani munyikelo, ka Jehova. Kanilezi Samueli i hlwela a ku chikela. Saule i chava lezaku a vaFilistia va ta tshuka va tlhotlha a kulwa, hikwalaho yena iya mahlweni a maha muphahlelo ha yece. Hi magumo loku Samueli a chikela, i byela Saule lezaku yena a nga ingisangi. Samueli i tlhela aku: ‘Jehova i ta hlawula munwani munhu kasi ku maha hosi hehla ka Israeli.’

Ka xinwani xikhati Saule i engeta a tsika ku ingisa. Hikwalaho Samueli i mu byela lezi: ‘I chukwana a ku ingisa Jehova a kuhunza a ku mu mahela munyikelo wa yivu ya wuchukwana. Kota lezi u nga kala ku ingisa Jehova, Jehova a nga ta ku tsika u simama kota hosi ya Israeli.’

Ha zi kota kuva ni gonzo yi nene ka lezo. Zona zi komba ku ngalo za lisima a ku ingisa Jehova xontlhe xikhati. Zona kambe, zi komba a ku a munhu mu nene, kota lezi Saule a nga hi zona, wa zi kota ku cica a maha wo biha. Cima a hi lavi ku maha vo biha, xana ha zi lava?