Hosi yo sangula ya Izrayeli

Jehovha i wa yimisile valamuli kasi ku rangela vaIzrayeli. Kanilezvi, ka cikhati leci va wa lava hosi. Va no byela Samuweli, vaku: ‘A matiko wontlhe ya vaakelani ma na ni tihosi. Hinawu ha yi lava’. Samuweli i no zvi wona na zvi bihile, hikwalaho, i no khongela ka Jehovha hi mhaka leyo. Jehovha i no mu byela lezvi: ‘A vanhu a va ali wena. Va ala mina. Va byele lezvaku va nga yi kuma hosi, kanilezvi yi ta lava zvotala ka vona’. Hambu lezvi va nga byeliwa lezvo, a vanhu va te: ‘A hi na mhaka ni lezvo. Hina ho lava hosi basi’!

Jehovha i no byela Samuweli lezvaku a wanuna wa ku hi Sawule i wa tava hosi yo sangula ya Izrayeli. A cikhati leci Sawule a nga ya vhuxela Samuweli le Rama, Samuweli i no yimisa Sawule kota hosi hi ku chulula mafura laha hlokweni yakwe.

Hi ndzhako ka cikhati, Samuweli i no vitanisa vaIzrayeli vontlhe lezvaku a ta va komba hosi yabye ya yiswa. Kanilezvi, va wa nga mu kumi Sawule. Wa zvi tiva ku hikuyini? I wa no fihlala lomu ka zvijumba. A cikhati leci va nga mu kuma, va no mu humesa lahandle va mu yimisa cikari ka vanhu. Sawule i wa lehile ku hundza vontlhe, niku i wa sasekile nguvhu. Samuweli aku: ‘Hi nga wonani loyi a hlawulilweko hi Jehovha’. A cikhati leci a vanhu va nga wona hosi yabye, va no banguleka, vaku: ‘Hosi hanya nguvhu!’

Kusanguleni Hosi Sawule i wa ingisa Samuweli a tlhela a ingisa Jehovha. Kanilezvi i no gumesa a cica. Hi cikombiso, a hosi yi wa nga hi na fanelo ya ku nyikela miphahlo. Ka khati go kari, Samuweli i no byela Sawule lezvaku a mu rindzela kala a chikela. Kanilezvi Samuweli a nga hatlisangi a chikela. Hikwalaho, Sawule i no boha ku nyikela miphahlo ha yece. Zvini lezvi Samuweli a nga maha? I no byela Sawule, aku: ‘U wa nga faneli ku tsika ku ingisa Jehovha’. Xana Sawule i gondzile cokari hi cihoxo cakwe? Ahihi.

Hi ndzhako ka cikhati, laha Sawule a nga ya a yalwa ni vaAmaleki, Samuweli i no mu byela lezvaku i fanele ku daya vontlhe ku nga sali ni mun’we. Kanilezvi Sawule i no siya hosi Agagi. Jehovha i no byela Samuweli, aku: ‘Sawule i ndzi tsikile, niku a nga ndzi ingisi’. Samuweli i no swireka nguvhu, a byela Sawule, aku: ‘Kota lezvi u nga tsika ku ingisa Jehovha, i ta hlawula hosi yin’wani’. A cikhati leci Samuweli a nga jika kasi a famba, Sawule i no khoma bhaji ga Samuweli gi handzuka. Samuweli aku: ‘Jehovha i ku tekele wuhosi’. Jehovha i wa ta teka wuhosi lego a gi nyikela ka mun’wani munhu, loyi a nga wa ta mu randza a tlhela a mu ingisa.