Le Ndleleni Ya Kuya Damasku

WA MU tiva gayani a wileko lahasi? Hi Saule. Khumbula, hi yena a nga wonelela a mabhaji ya vavanuna lavayani va gandlileko Stefani hi maribye. Hi nga wona a kuwonekela lokuyani ko ngangamela! Kasi zini zi mahekako?

Anzhako ka ku dawa ka Stefani, Saule i rangela a kuhlotwa ka valanzeli va Jesu lezaku a va xanisa. Yena i nghena ka muti wunwe ni wunwani a va kokovisela a tlhela a va hoxa paxweni. A vapizani vo tala va tsutsuma vaya ka manwani madoropa va ya sangula a ku kanela a “mahungu yo saseka” kwaseyo. Kanilezi Saule i fambafamba ka madoropa manwani na a fela ku kuma valanzeli va Jesu. Zalezi i le pfhumbeni ga kuya Damasku. Kanilezi, laha ndleleni, ku maheka nchumu lowu wo hlamalisa:

Hi xitshuketi a kuwonekela ku tako hi le hehla ku ranzela Saule. Yena iwa lahasi, kota lezi hi zi wonako kwalaha. Zonake a gezu go kari gi ngalo: ‘Saule, Saule! U nzi xanisela yini?’ A vavanuna lava va nga na Saule va wona a kuwonekela va tlhela vazwa a pfumawulo wa gezu, kanilezi a va zi koti ku zwisisa lezi zi wuliwako.

Saule i wutisa aku: ‘Hi wena mani, Hosi?’

A gezu gi hlamula giku: ‘Hi mina Jesu, loyi u mu xanisako.’ Jesu i wula lezo hakuva laha Saule a xanisako valanzeli va Jesu, yena Jesu izwa ku khwatsi hi yena wutsumbu a xaniswako.

Saule makunu i wutisa ku ngalo: ‘Nzi ta maha yini, Hosi?’

Jesu i ngalo: ‘Suka u enghena Damasku. U ta byeliwa kona lezi u faneleko ku zi maha.’ Laha Saule a sukako a vulula a mahlo yakwe, a nga zi koti ku wona nchumu. I mahile xikhumu! Hikwalaho a vavanuna va nga naye va mu khoma hi canja va mu enghenisa Damasku.

Jesu makunu i wulawula ka munwe wa vapizani vakwe va nga Damasku, aku ngalo: ‘Suka, Ananiasi. Famba ruweni gi vitwako Go Lulama. Uya mutini wa Juda u ya lava a wanuna a vitwako Saule. Nzi hlawulile wanuna loye akuva a maha nanza ga mina go hlawuleka.’

Ananiasi a vumela. Laha a kumako Saule, i mu tlhateka mandla yakwe aku ngalo: ‘A Hosi yi nzi rumile lezaku u zi kota ku tlhela u wona ni ku tatiswa hi moya wa ku basa.’ Zalezo kuwa zilo zi fananako ni magwaru hi lomu ka mahlo ya Saule, zonake a zi kota ku tlhela a wona.

Saule i tirisiwa hi ndlela yo hlamalisa lezaku a xumayela ka vanhu va matiko yo tala. Yena iza a tiviwa ku ngalo hi mupostoli Paule, loyi ha ha ta gonzako nguvu hi yena. Kanilezi hi kusangula, a hi woneni lezi Nungungulu a rumako Pedro ku maha.