Jehovha a akelwa tempeli

Andzhako ka loku Solomoni a yimisilwe kuva hosi ya Izrayeli, Jehovha i no mu wutisa lezvi: ‘U lava ku ndzi ku nyika yini’? Solomoni aku: ‘Ndza hi n’wanana, a ndzi zvi tivi lezvi ndzi faneleko ku maha. Ndzi nyike wutlhari kasi ndzi khatalela vanhu va wena’. Jehovha aku: ‘Kota lezvi u nga kombela wutlhari, u tava ni wutlhari go hundza vontlhe laha misaveni. Ndzi ta ku maha u ganya nguvhu kambe; niku loku u ndzi ingisa, u ta hanya cikhati co leha’.

Solomoni i no sangula ku aka tempeli. I tirisile materiyali ya manene nguvhu: ouro, prata, mapulangu ni maribye. A tempeli yi akilwe hi vavanuna ni vavasati vo tala nguvhu va nga hi ni wutlhari. Andzhako ka 7 wa malembe, a tempeli yi no mbhela niku yi wa longile ku nyikelwa ka Jehovha. Ka siku legi yi nga hendleletiwa hi gona, laha alatini ku wa hi ni minyikelo. Solomoni i no khizama mahlweni ka alati a khongela, aku: ‘O Jehovha, ha zvi tiva ku a wu eneli lomu ka tempeli leyi hakuva yi tsongwani niku a yi sasekangi nguvhu kambe mahlweni ka wena; kanilezvi, ha ku kombela lezvaku u amukela a wutshamu legi u tlhela u ingisela a mikhongelo leyi hi yi mahako na hi hi laha’. Xana Jehovha i ti zwisile kuyini hi tempeli ni mukhongelo wa Solomoni? Zvalezvi Solomoni a nga mbheta ku khongela, ku no relela ndzilo hi le tilweni wu ta hisa minyikelo laha alatini. Lezvo zvi wa komba lezvaku Jehovha i yi tsakele a tempeli. A cikhati leci a vaIzrayeli va nga zvi wona, va no tsaka nguvhu.

Hosi Solomoni i no tiveka nguvhu lomu Izrayeli hi wutlhari gakwe. I wa tiveka ni ka matshamu ya le kule kambe. A vanhu va wata ka Solomoni va ta mu kombela ku a va vhuna ku lulamisa zvikarato zvabye. Hambu a hosi ya cisati ya le Xebha, yi nota yi ta mu ringa hi ku mu maha zviwutiso zvo karata. A cikhati leci yi ngazwa mihlamulo ya Solomoni, yi te: ‘Ndzi wa nga kholwi lezvi va nga ndzi byela hi wena. Kanilezvi, zvezvi ndza zvi wona ku u na ni wutlhari go hundza ni legi va nga wula. Jehovha, a Nungungulu wa wena i ku katekisile’. Ka cikhati leco, a vanhu le Izrayeli va wa hanya wutomi ga gi nene va tlhela va tsaka. Kanilezvi, na zvi nga seya kule, a zvilo zvi wa ta cica.