A n’wana wa noni a vhuxiwa hi ka vafileko

Ka cikhati leci ku nga kala ku ngani vhula, Jehovha i no byela Elija, aku: ‘Famba Zarefate. U ta ya nyikiwa zvakuga hi wasati wa noni’. A cikhati leci Elija a nga chikela laha tinyangweni ta dhoropa, i no wona wasati wa noni, wa cisiwana na rolela tihunyi. I no mu kombela mati ya kunwa. Laha a nga famba a yakha mati, Elija i no mu vitana, aku: ‘Ndzi kombela ku u ndzi wuyela ni cipawana’. Kanilezvi, a wasati loye i te: ‘A ndzi na pawa ya ku ku nyika. Ndzova ni mapa matsongwani ni zvifurana kasi ndzi maha zva ku hi dambuleta mina ni n’wana wa mina basi’. Elija aku: ‘Jehovha i tsumbisile lezvaku loku u ndzi mahela cipawana ndziga, a mapa ya wena ni mafura zvi nga ta mbhela kala kuna vhula’.

Hikwalaho, a noni leyo yi noya kaya yi ya mu mahela pawa a muphrofeti wa Jehovha. Kota lezvi Jehovha a nga tsumbisile, a wasati loye zvin’we ni n’wana wakwe, va nova ni zvakuga masiku wontlhe kala kuna vhula. A fuko yakwe ya mapa ni cifukwana cakwe ca mafura zvi wa tshama na zvi tele.

Hi ndzhako ka cikhati, ku no maheka nchumu wo bayisa. A mufanyana wa wasati loye i no babya nguvhu a gumesa afa. I no khongotela Elija lezvaku a mu vhuna. Elija i no teka n’wanana a famba naye ka kwartu ya le hehla ka yindlu ya wasati loye. I no mu etlelisa laha mubhedhini, a maha mukhongelo, aku: ‘Jehovha, ndzi kombela ku u vhuxa n’wanana loyi a hanya’. Wa zvi tiva a ku hikuyini wu nga hi nchumu wo hlamalisa a ku Jehovha a vhuxa n’wanana loye? Hi ku ka cikhati leco, zvi wa nga se tshuka zvi zwala a ku ku vhuxilwe munhu a nga file. Niku a noni leyi ni n’wana wa yona va wa nga hi vaIzrayeli.

Kanilezvi, a mufanyana loyi a nga file i no vhuka, a sangula ku hefemula. Elija i no byela noni leyo, aku: ‘Hi nga wona! A n’wana wa wena wa hanya’. I no tsaka nguvhu, a byela Elija, aku: ‘Hakunene wena u munhu wa Nungungulu. Lezvo ndzi zvi tiva hi ku wena u wula basi lezvi Jehovha a ku rumako ku wula’.