A sati wa hosi a tsayisiwa

Loku a hi laha janeleni ga yindlu yakwe ya wuhosi le Jezreyeli, hosi Ahabhi i wa wona civhina ca wanuna a vitaniwako ku hi Nabhote. Ahabhi i wa ci navela a civhina leco, hikwalaho i no zama ku bhula na Nabhote lezvaku a mu xavisela. Kanilezvi, Nabhote a nga vhumelangi ku mu xavisela hakuva a Nayo wa Jehovha wu wa betela ku xavisa a petso wu nga lumba ngango. Xana Ahabhi i mu kombisile cichavo Nabhote hi lezvi a nga maha zvazvinene? Ahihi. Ahabhi i no zangara nguvhu laha ka kuza a tsandzeka ni ku huma lomu kwartu, a tlhela a ala ni kuga.

Jezebheli, a sati wa Ahabhi, i wa hi munhu wo biha nguvhu, hikwalaho, i no byela Ahabhi, aku: ‘Phela wena u hosi ya Izrayeli. U na ni fanelo ya ku kuma ni cihi u ci lavako. U nga karateki, ndzi ta ku vhuna; u ta gi kuma a simu legiya’. Jezebheli i no tsala mapapilo maya ka madhota ya dhoropa, a ma byela lezvaku ma lumbeta Nabhote maku i rukatele Nungungulu, ma gumesa ma mu gandla hi maribye kala afa. A madhota ma no maha lezvi Jezebheli a nga ma byela, a gumesa a byela Ahabhi, aku: ‘Nabhote i file. A civhina ca wena makunu’.

Nabhote a hi yena yece a nga dawa hi Jezebheli na a nga hi na nandzu. I dele van’wani vanhu vo tala va nga randza Jehovha. Jezebheli i wa khozela zvifananiso a tlhela a maha zvilo zvin’wani zvo biha. Jehovha i zvi wonile a zvilo zvontlhe zvo biha lezvi Jezebheli a nga zvi maha. Zvini a nga wa ta mu maha?

Loku Ahabhi a file, a n’wana wakwe Jehoramu i no sangula ku fuma. Jehovha i no rumela wanuna wa ku hi Jehu kasi a ya tsayisa Jezebheli ni ngango yakwe.

Jehu i no khilela kareta yakwe aya Jezreyeli lomu a nga tshama kona Jezebheli. Jehoramu i no khinga Jehu hi kareta, a ta mu wutisa lezvi: ‘Ku na ni kurula cikari ka hina’? Jehu aku: ‘Loku mamani wa wena Jezebheli a ha maha zvilo zva kubiha, hi nga tava ni kurula’. Jehoramu i no zama ku jikisa a kareta yakwe a tsutsuma. Kanilezvi, Jehu i no mu fula hi paxa, afa.

Jehu i no gumesa aya ndlwini ya wuhosi ka Jezebheli. Loku Jezebheli a zwile ku Jehu wata, i no ti pendetela nghohe, a longisela misisi yakwe a gumesa a nyima hi laha janeleni gakwe a mu rindzela. A cikhati leci Jehu a nga chikela, Jezebheli i no mu losa hi ndlela yo kala yi nga hi yinene. Jehu i no banguleka a byela vatiri va Jezebheli va nga hi kusuhani naye, aku: ‘Mu hoxeni lahasi!’ Va no mu nikinya hi laha janeleni awa lahasi afa.

Andzhako ka lezvo, Jehu i no daya vana va Ahabhi va 70 a tlhela a basisa tiko ka wukhozeli ga Bhaali. Wa zvi wona ku Jehovha wa zvi tiva zvontlhe, niku i tsayisa lava va mahako zvakubiha hi cikhati ca kona ke?