Jehoyadha i kombisile kutiya-hlanha

Jezebheli i wa hi ni n’wana wa ku hi Ataliya, loyi yenawu a nga hi ni mahanyela yo biha a ku fana ni mamani wakwe. Ataliya i wa chadhile ni hosi ya Judha. A cikhati leci a nuna wakwe a ngafa, a n’wana wakwe i no sangula ku fuma. Kanilezvi, a cikhati leci a n’wana wakwe a ngafa, Ataliya i no ti maha hosi ya Judha. I no zama ku fuvisa a lixaka la wuhosi, a daya vontlhe va nga wa ta tshuka va va tihosi ahandle ka yena, a ku patsa ni vazukulu vakwe. Vontlhe va wa mu chava.

Jehoyadha, a mupristi wa hombe, ni sati wakwe Jehoxebha, va wa zvi tiva ku lezvi Ataliya a nga zvi maha zvi wa bihile nguvhu. Va no veka wutomi gabye mhangweni, va fihla Jehowaxi — a mun’we wa vazukulu va Ataliya. Va no mu wundla lomu tempeleni.

A cikhati leci Jehowaxi a nga hi ni 7 wa malembe, Jehoyadha i no tlhanganisa tihosana tontlhe ni vaLevhi a va byela lezvi: ‘Nyimani laha tinyangweni ta tempeli, mu nga tsiki munhu a nghena’. Hi kulandzela, Jehoyadha i no yimisa Jehowaxi kota hosi ya Judha a tlhela a mu bohisa korowa. A vanhu va ka Judha va no banguleka, vaku: ‘Hosi, hanya nguvhu!’

Ataliya, a hosi ya cisati, i nozwa guwa ga vanhu a tekela ku tsutsuma aya tempeleni. A cikhati leci a nga wona a hosi ya yiswa, i no banguleka, aku: “Cikungo co biha leco! Cikungo co biha leco!” A tihosana ti no khoma a hosi leyi ya cisati yo biha, ti mu humesa handle ti mu daya. Hambulezvo, ahati a kucetelo wo biha lowu a nga byalile lomu tikweni ke?

Jehoyadha i no vhuna vanhu lezvaku va maha civhumelwano na Jehovha, va mu tsumbisa ku va ta khozela yena yece. Jehoyadha i no byela vanhu lezvaku va khungumula tempeli ya Bhaali va tlhela va fayetela a zvifananiso zviku bhi. I no yimisa vapristi ni vaLevhi lezvaku va tira lomu tempeleni kasi a vanhu va vhuxetela ku khozela ka yona. I no hlawula vanhu vo kari lezvaku va wonelela tinyangwa ta tempeli kasi a vanhu vo kala ku basa va nga ngheni. Hi kulandzela, Jehoyadha ni tihosana va no teka Jehowaxi va famba naye le ndlwini ya wuhosi va ya mu tshamisa laha citshan’wini ca wuhosi. A vanhu va ka Judha va no tsaka nguvhu. Makunu zvi wa koteka ku va khozela Jehovha na va nga ha kucetelwi hi Ataliya, a hosi ya cisati yo biha, ne ku kurumetiwa ku khozela Bhaali. Wa zvi wona lezvi a vanhu vo tala va nga vhunekisa zvona hi kota ya kutiya-hlanha ka Jehoyadha?