Ezra i gondzisile a Nayo wa Nungungulu

Makunu ku wa hundza cipimo ya 70 wa malembe a vaIzrayeli na va tlhelile Jerusalema. Kanilezvi, a vokari va wa ha hanya ka matshamu yo hambanahambana ya Mufumo wa Persia. A mun’we wabye ku wa hi Ezra, loyi a nga gondzisa Nayo wa Jehovha. Ezra i no tiva lezvaku a vanhu le Jerusalema va wa nga ingisi a Nayo wa Jehovha. Hikwalaho, i no zvi wona zvi hi chukwana kuya a ya va vhuna. Artaxerxesi, a hosi ya Persia, i no mu byela lezvi: ‘Nungungulu i ku nyikile wutlhari kasi u gondzisa Nayo wakwe. Famba niku teka ni wihi u mu lavako u famba naye’. Ezra i no tlhangana ni vontlhe va nga lava ku tlhela Jerusalema. Va no khongela ka Jehovha kasi a va vhikela lomu ndleleni leyo yo leha va gumesa va suka va famba.

Loku ku hundzile 4 wa tihweti, va no chikela Jerusalema. A tihosana ti no byela Ezra, tiku: ‘A vaIzrayeli va tsikile ku ingisa Jehovha va tlhela va teka vavasati va khozelako vanungungulu va mawunwa’. Zvini lezvi Ezra a nga maha? Ezra i no khizama mahlweni ka vanhu a khongela, aku: ‘Jehovha, u hi mahele zvilo zvo tala nguvhu. Kanilezvi, hina hi ku wonhele’. A vanhu va no ti sola kanilezvi va wa ha simama ku maha zvilo zvo biha. Ezra i no hlawula madhota ni valamuli lezvaku va khatalela mhaka leyi. Ka tihweti tinharu ti nga landzela, lava va nga kala va nga khozeli Jehovha va wo hlongoliwa.

Ku no hundza 12 wa malembe. Ndzeni ka cikhati leco, va no aketa a muro wa Jerusalema. Ezra i no tlhanganisa vanhu laha prasa lezvaku va ta lera a Nayo wa Nungungulu. A cikhati leci Ezra a nga vhulula bhuku, a vanhu va no suka va yima. I no dhumisa Jehovha, a vanhu va tlakusa mawoko va mu dhumisawu. Hi kulandzela, Ezra i no lera Nayo a tlhela a wu tlhamusela. A vanhu va no tshama va ku hwi va ingisela khwatsi. Va no vhumela lezvaku va wa tsikile ku ingisa Jehovha kambe; makunu va no rila. Ka siku gi nga landzela, Ezra i no va lerela zvipandze zvin’wani zva Nayo. Va no tiva lezvaku va wa fanele ku maha Mubuzo wa Michacha na ku nga hi kale. Va no tekela ku sangula ku longisela festa leyo.

Ndzeni ka 7 wa masiku lawo ya festa, va no tsaka va bonga Jehovha hi lezvi va nga pfunile. Kusukela masikwini ya Joxuwa, ku wa nga se tshuka ku mahiwa Mubuzo wa Michacha wo fana ni lowo. Loku a festa leyo yi mbhelile, a vanhu va no tlhangana va khongela, vaku: ‘Jehovha u hi tlhatlhisile wukhumbini, u hi hlayisa lomu ciwuleni u tlhela u hi nyika tiko legi go saseka. Kanilezvi, hina hi tshama hi ku tsika ku ku ingisa. U rumele vaphrofeti lezvaku va ta hi tlharihisa; kanilezvi a hi ingisangi. Hambulezvo, u simamile ku hi kombisa lihlazva-mbilu. U mahile lezvi u nga tsumbisa Abrahama. Makunu lezvi, ha tsumbisa ku hi ta ku ingisa’. Va no tsala lezvi va nga tsumbisa niku a tihosana, ni vaLevhi, ni vapristi va no vekela cifungo.