Korneliyu a amukela a moya wo basa

Le Khezariya ku wa hi ni hosana ya masochwa ya Roma yo chaviseka nguvhu yi nga vitaniwa ku hi Korneliyu. Hambu lezvi a nga kala a nga hi muJudha, a vaJudha va wa mu kombisa nguvhu cichavo. I wa randza ku vhuna zvisiwana. Korneliyu i wa kholwa ka Jehovha niku i wa khongela kakwe contlhe cikhati. Ka siku go kari, ku no woneka ngilozi ka Korneliyu, yiku: ‘Nungungulu i yi zwile a mikhongelo ya wena. Ruma vanhu zvezvi vaya dhoropeni ga Jopa, lomu ku nga na Pedro, va ya mu kombela lezvaku ata laha kaya ka wena’. Korneliyu i no tekela ku ruma vavanuna vanharu vaya Jopa. Ku wa hi ka pfhuka wa cipimo ca 50 wa tikilometro kuya Dzongeni.

Ndzeni ka cikhati leco, Pedro i nova ni muwoniso kwale Jopa a nga hi kona. I no wona zvihari lezvi a vaJudha va nga betelwa kuga a gumesa azwa gezu gi mu byela ku aga. Pedro i no ala, aku: ‘Wutomini ga mina gontlhe a ndzi sega cihari co kala ci nga basangi’. A gezu giku: ‘U nga wuli ku a zvihari lezvi a zvi basangi. Nungungulu i zvi basisile’. Ahandle ka lezvo, Pedro i no byeliwa ku: ‘Ku na ni vavanuna vanharu laha nyangweni ya wena. Famba navo’. Pedro i noya laha nyangweni a ya wutisa vavanuna lavo lezvaku va wa lava yini. Va no mu hlamula, vaku: ‘Hi rumilwe hi Korneliyu, a hosana ya masochwa ya Roma. U fanele kuya kaya kakwe le Khezariya’. Pedro i no va amukela kota vapfhumba vakwe, va etlela laho. Hi mandziko wa kona, Pedro i no famba navo le Khezariya, zvin’we ni vamakabye vo kari va le Jopa.

A cikhati leci Korneliyu a nga wona Pedro, i no mu khizamela. Kanilezvi Pedro i no mu byela lezvi: ‘Suka u yima! Minawu ndzi munhu wo fana na wena. Nungungulu i ndzi rumile kuta laha kaya ka wena, hambu lezvi hina vaJudha hi nga ngheniko mutini wa munhu wo kala a nga hi muJudha. Hi nga ndzi byela, hikuyini u nga ndzi vitanisa’?

Korneliyu i no byela Pedro, aku: ‘Ka 4 wa masiku ma hundzileko, ndzi wa kari ndzi khongela ka Nungungulu, makunu ku nota ngilozi yi ta ndzi byela lezvaku ndzi ruma vanhu va ta ku vitana. Ndzi kombela ku u hi gondzisa timhaka ta Jehovha’. Pedro aku: ‘Makunu ndzi gondzile lezvaku Nungungulu a nga na cihlawulela. I amukela ni wihi a lavako ku mu khozela’. Pedro i no va gondzisa zvilo zvo tala xungetano hi Jesu. A moya wo basa wu nota ka Korneliyu ni ka vontlhe a nga hi navo, niku vontlhe va no  bhabhatisiwa.