Masemanyana ya cipandze 7

A cipandze leci ci wulawula hi matimu ya hosi Sawule na hosi Dhavhidha. A matimu lawa ma wulawula hi zvilo zvi mahekileko ndzeni ka 80 wa malembe. Kusanguleni, Sawule i wa hi munhu wo ti koramisa ni wo chava Nungungulu. Kanilezvi, a nga hlwelangi ku cica a sangula ku nga ha landzeli zvileletelo zva Jehovha. Jehovha i no mu tsika, niku hi kufamba ka cikhati, i no byela Samuweli lezvaku a ya tota Dhavhidha kasi ava hosi ya Izrayeli yi to vhaleta Sawule. Hi kota ya ciluse, Sawule i no zama ku daya Dhavhidha makhati yo tala, kanilezvi Dhavhidha a nga tshukangi a zama ku ti photela. Jonatani, a n’wana wa Sawule, i no zvi wona lezvaku Jehovha i wa hlawulile Dhavhidha kasi ava hosi; hikwalaho, i no tsumbeka ka Dhavhidha. Dhavhidha i mahile zviwonho zvo kari zva hombe, kanilezvi a nga tshukangi a ala ku layiwa hi Jehovha. Loku u hi mupswali, vhuna n’wana wa wena lezvaku a wona lisima la ku contlhe cikhati a seketela malulamiselo ya Nungungulu.