Simama ku randza Nungungulu

1, 2. Zvini hi faneleko ku maha kasi hi simama lirandzweni la Nungungulu?

HONTLHENI ha zvi lava ku hanya khwatsi, na hi tiyile. Hikwalaho, hi ti karatela kuga zvakuga zva zvi nene, hi maha mihlakano ya ku tiyisa miri hi tlhela hi hlayisa khwatsi a miri wa hina. Lezvo zvi lava kutikarata, hambulezvo a hi godholi hakuva ha zvi tiva ku zvi na ni wuyelo ga gi nene. Kanilezvi hi fanele ku tiya hi tlhela hi hanya khwatsi hi tlhelo gin’wani kambe.

² Hambu lezvi hi sinako hi bile zambo ga gi nene hi ku gondza hi tiva Jehovha, hi fanele ku simama hi tiyisa a wunghana ga hina naye. A cikhati leci Judha a nga kuca maKristu lezvaku ma “simama lirandzweni la Nungungulu”, i tlhelile a komba ndlela ya ku maha lezvo. I te: “Tiyisani kukholwa ka n’wina ku basileko.” (Judha 20, 21) Makunu hi nga ku tiyisisa kuyini a kukholwa ka hina?

SIMAMA U TIYISA KUKHOLWA KA WENA

3-5. a) Sathani i lava lezvaku u yi wonisa kuyini a milayo ya Jehovha? b) U yi wonisa kuyini a milayo ni matshinya ya milayo ya Jehovha?

³ Zva lisima ku wena hi wece u tiyiseka lezvaku a milayo ya Jehovha hi yona ya yi nene nguvhu a ku hundza yontlhe. Sathani i lava ku u pimisa lezvaku a milayo ya Nungungulu ya karata ku hanya hi yona niku u nga tsaka loku wo ti gemela ha wece lezvi zvi nga zvi nene ni lezvi zvi nga zva hava. Kusukela le sin’wini ga Edheni, Sathani i zama ku maha vanhu va pimisa lezvo. (Genesisi 3:1-6) Ni nyamutlha wa ha zama ku maha lezvo.

⁴ Lisine lezvi Sathani a wulako? A matshinya ya milayo ya Jehovha ma hi tsona kutlhatlheka? Ayeyi. Kasi ku kombisa, hi nga ti alakanyela na u paseyara ka jardim yo saseka, u ya kuma libhiyo lo leha li nga bhiyela a cipandze cokari kwalomo. U sangula ku sola uku: ‘Kasi hikuyini va nga bhiya a cipandze leci?’ Na wa ha gayela lezvo, u tekela kuzwa nghala na yi bhonga kwalomo. U li wonisa kuyini a libhiyo ka cikhati leco? Handle ko kanakana, u li wona na li hi la lisima hakuva loku ku wa nga hi lona, a nghala na yi fihlulile hi wena! A matshinya ya milayo ya Jehovha ma fana ni libhiyo lelo; Sathani i fana ni nghala. A mhaka ya Nungungulu ya hi tlharihisa yiku: “Hlayisani a kupima ka n’wina, mu ti wonela, hakuva a nala wa n’wina Sathani, wa fambafamba a ku khwatsi i nghala yi bhongako, na a lava wa ku mu khadamula.” — 1 Pedro 5:8.

⁵ Jehovha i lava lezvaku hi hanya khwatsi. A nga zvi lavi ku hi kalavelwa hi Sathani. Hi zvalezvo zvi mu mahako a hi nyika milayo ni matshinya ya milayo kasi ma hi vhikela ma tlhela ma hi nyika litsako. (Va Le Efesusi 6:11) Jakobe i tsalile lezvi: “Loyi a hlolako nayo wu mbheleleko, lowu wa kutlhatlheka, a simama ka wona, . . . i ta tsaka ka lezvi a mahako.” — Jakobe 1:25.

6. Zvini hi nga mahako kasi hi tiyiseka khwatsi lezvaku a zvileletelo zva Jehovha zvi nene nguvhu?

⁶ Loku hi ingisa lezvi Jehovha a hi gondzisako, hi ta hanya khwatsi niku a wunghana ga hina naye gi ta tiya. Hi cikombiso, ha vhuneka loku hi maha lezvi a hi kucako ku maha zva ku hi khongela kakwe contlhe cikhati. (Matewu 6:5-8; 1 Va Le Tesalonika 5:17) Ha tsaka loku hi ingisa a cileletelo cakwe ca ku hi tlhangana kasi ku mu khozela ni ku kucana, ni loku hi maha zvontlhe hi zvi kotako ntirweni wa ku chumayela ni ku gondzisa. (Matewu 28:19, 20; Va Le Galatiya 6:2; Mahebheru 10:24, 25) Loku hi alakanyela lezvi a zvilo lezvo zvi hi vhunisako zvona ku tiyisa a kukholwa ka hina, hiya hi tiyiseka nguvhu lezvaku a zvileletelo zva Jehovha zvi nene nguvhu.

7, 8. Zvini zvi to hi vhuna ku hi nga karateki hi mindzhingo hi to kumana nayo cikhatini ci tako?

⁷ Kuzvilava ha karateka hi ku alakanya ku hi ta kumana ni mindzhingo yo bindza yi to ringa kukholwa ka hina cikhatini ci tako. Loku u tshuka u ti zwisa lezvo, alakanya a magezu ya Jehovha yaku: ‘Hi mina Jehovha, Nungungulu wa wena, Loyi a ku gondzisako lezvi zvi ku vhunako, Loyi a ku rangelako ndleleni leyi u faneleko ku famba ha yona. O, loku ku wo khwatsi wa ingisa zvileletelo zva mina! Zvonake a kurula ka wena ku wa ta khulunga ku khwatsi i congo, ni kululama ka wena ku wa ta ku khwatsi mabyandlati ya bimbi.’ — Isaya 48:17, 18.

⁸ Loku hi ingisa Jehovha, a kurula ka hina ku ta fana ni congo wu kalako wu ngapswhi, niku a kululama ka hina ku ta fana ni mavingo ya bimbi ma kalako ma nga nyimi kuba. Hambu ko humelela yini wutomini ga hina, hi nga simama hi tsumbeka. A Bhibhiliya gi hi byela lezvi: ‘Rula a nzhwalo wa wena ka Jehovha, i ta ku seketela, cima a nga ta vhumela ku loyi a lulamileko a tsekatsekiswa.’ — Lisimu 55:22.

“KONGOMA KUBUVHENI”

9, 10. Zvi wula yini a kuva munhu wo buvha?

⁹ Loku u tiyisa a kuzwanana ka wena na Jehovha, u “kongoma kubuvheni”. (Mahebheru 6:1) Zvi wula yini a kubuvha?

¹⁰ A munhu a nga mahi muKristu wo buvha hi kota ya tanga yakwe basi. Kasi kuva vanhu vo buvha, hi fanele ku wona Jehovha kota Munghana wa hina wa hombe hi tlhela hi wona zvilo kota lezvi yena a zvi wonisako zvona. (Johani 4:23) Pawule i tsalile lezvi: “Lava va hanyako hi ka nyama va veka kupima kabye ka zvilo zva nyama, kanilezvi lava va hanyako hi ka moya va veka kupima kabye ka zvilo zva moya.” (Va Le Roma 8:5) A munhu wo buvha a nga rangisi a kutitsakisa kutani titshomba. Kanilezvi, i rangisa a ku tirela Jehovha niku i maha zviboho zva wutlhari wutomini gakwe. (Mavingu 27:11; lera Jakobe 1:2, 3.) Loku va mu kucetela zvahava a nga vhumeli. A munhu wo buvha wa zvi tiva lezvi zvi nga zvi nene niku i ti yimisele ku maha zvalezvo.

11, 12. a) Pawule i te yini xungetano hi “kupima” ka muKristu? b) A ku maha muKristu wo buvha zvi fana ni ku maha mutsutsumi hi ndlela muni?

¹¹ Zvi lava kutikarata kasi ku buvha. Mupostoli Pawule i tsalile lezvi: “A zvakuga zvi tiyileko zvi giwa hi vanhu va kulileko, lava va toloveleko ku tirisa a kupima kabye kala va zvi kota ku hambanisa a zva zvi nene ni zvakubiha.” (Mahebheru 5:14) A gezu “va toloveleko” gi hi maha hi alakanya lezvi zvi mahiwako hi mutsutsumi.

¹² Loku hi wona munhu a tsutsumako pfhuka wo leha na a nga humulangi, ha zvi tiva ku zvi lavile cikhati ni kutikarata kasi kuza a tolovela. A nga pswaliwangi na a tsutsuma. Na a ha pswaliwa, a n’wanana a nga zvi tivi ku tirisa mawoko yakwe ni minenge. Kanilezvi, hi kufamba ka cikhati, i gondza ku khoma zvilo ni ku famba, niku loku a ti tsitsirita a nga gumesa a maha mutsutsumi wa hombe. Hi kufanana, kasi ku a munhu a buvha kota muKristu zvi lava cikhati ni kutikarata.

13. Cini ci to hi vhuna kuva ni kupima kun’we na Jehovha?

¹³ Lomu ka bhuku legi, hi wonile lezvi hi nga mahako kasi hiva ni kupima kun’we na Jehovha hi tlhela hi wona zvilo kota lezvi yena a zvi wonisako zvona. Hi gondzile ku nyika lisima a milayo yakwe hi tlhela hi yi randza. Loku hi lava ku maha zviboho, hi fanele ku ranga hi ku ti wutisa lezvi: ‘Hi yihi a milayo kutani matshinya ya milayo ya Bhibhiliya ma tirako ka ciyimo leci? Ndzi nga ma tirisisa kuyini? Jehovha i lava ku ndzi maha yini?’ — Lera Mavingu 3:5, 6; Jakobe 1:5.

14. Zvini hi faneleko ku maha kasi ku tiyisa a kukholwa ka hina?

¹⁴ Hi nga tshuki hi nyima ku tiyisa a kukholwa ka hina ka Jehovha. A ku fana ni lezvi a kuga zvakuga zvi nga ni mavhitamina zvi tiyisako a miri wa hina, a ku gondza xungetano hi Jehovha zvi tiyisa a kukholwa ka hina. A cikhati hi nga sangula ku gondza Bhibhiliya, hi tivile lisine la tshinya xungetano hi Jehovha ni milayo yakwe. Kanilezvi laha a cikhati ci hundzako, hi fanele ku zwisisa a zvilo zvo eta. Hi zvalezvo Pawule a nga zvi wula a cikhati a ngaku: “A zvakuga zvi tiyileko zvi giwa hi vanhu va kulileko.” Loku hi tirisa lezvi hi zvi gondzako, hi kuma wutlhari. A Bhibhiliya gi ngalo: ‘A wutlhari cilo co ranga.’ — Mavingu 4:5-7; 1 Pedro 2:2.

15. Hikuyini a ku randza Jehovha ni vamakabye va hina zvi nga zva lisima?

¹⁵ Hambu loku a munhu a tiyile a tlhela a hanya khwatsi, wa zvi tiva ku kasi a simama ku hanya khwatsi i fanele ku simama a ti hlayisa. Hi ndlela yo fana, a muKristu wo buvha wa zvi tiva ku i fanele ku ti karata kasi a wunghana gakwe na Jehovha gi simama gi tiyile. Pawule wa hi kuca aku: “Tshamani hi ku ti hlola kasi mu wona lezvaku ma hi kona kukholweni ke; tshamani hi ku ti hlola kasi mu tiva ku mu vanhu va tshamela muni.” (2 Va Le Korinte 13:5) Kanilezvi a kuva ni kukholwa ko tiya a hi zvona zvoce zvi lavekako. A lirandzo la hina hi Jehovha ni vamakabye va hina li fanele ku simama li kula. Pawule i te: “Hambu loku ndzi [hi] . . . ni kutiva kontlhe, ni loku ndzi hi ni kukholwa ka hombe koza ndzi kunula ni zvitsunga, kanilezvi na ndzi nga hi na lirandzo, a ndzi wa nchumu.” — 1 Va Le Korinte 13:1-3.

TSHAMA NA U ALAKANYA A KUTSUMBA KA WENA

16. Sathani i lava ku hi ti zwisa kuyini?

¹⁶ Sathani i lava lezvaku hi pimisa ku a hi nge zvi koti ku mu tsakisa Jehovha. I lava lezvaku hi mbhela ntamu hi ku alakanya ku a zvikarato zva hina a zvi nge mbheli. A nga zvi lavi ku hi tsumba maKristu-kulori niku a nga zvi lavi ku hi wona na hi tsakile. (Va Le Efesusi 2:2) Sathani wa zvi tiva ku a maalakanyo ya hava ma nga hi hohlota ma tlhela ma wonha a wuxaka ga hina na Nungungulu. Kanilezvi Jehovha i hi nyikile nchumu wu to hi vhuna kulwa ni maalakanyo ya hava. I hi nyikile kutsumba.

17. Hikuyini a kutsumba ku nga ka lisima?

¹⁷ Ka 1 Va Le Tesalonika 5:8, a Bhibhiliya gi fananisa kutsumba ka hina ni cihuko ca simbi leci ci vhikelako a hloko ya musochwa yimpini. A cihuko leco ci vitaniwa ku “kutsumba ka kuhanyiswa”. A ku tsumba a zvitsumbiso zva Jehovha zvi nga vhikela a mapimo ya hina zvi tlhela zvi hi vhuna ku hlula a maalakanyo ya hava.

18, 19. A kutsumba ka Jesu ku mu tiyisisile kuyini?

¹⁸ A kutsumba ku tiyisile Jesu. Ka wusiku go gumesa ga kuhanya kakwe laha misaveni, i kumene ni zvikarato zvo landzelana. I xavisilwe hi munghana wakwe wa hombe. A mun’wani i kanetile lezvaku munghana wakwe a tlhela aku ne a nga mu tivi. Lava van’wani va no mu siya yece va tsutsuma. A vanhu va tiko gakwe va no mu vhukela, va mu nyikela kasi a dawa hi ndlela ya xapi. Cini ci nga mu vhuna ku timisela zvilo lezvo zvo bayisa? A Bhibhiliya gi ngalo: “Hi kota ya kutsaka loku ku nga vekilwe phambeni kakwe, i no timisela mhandze ya hlomulo a ngawi tingana; kanilezvi makunu i tshamile reveni ga cinene ga citshamu ca wuhosi ca Nungungulu.” — Mahebheru 12:2.

¹⁹ Jesu i wa zvi tiva ku loku a simama a tsumbekile, i ta mu nyika wudzundzo Papayi wakwe a tlhela a komba ku Sathani muhembi. A kutsumba loko ku wa mu nyika litsako la hombe. I wa zvi tiva kambe lezvaku ko kiyela masiku ma tsongwani kasi a tlhela ka Papayi wakwe le tilweni. A kutsumba loko ku mu vhunile ku timisela. A ku fana na Jesu, hinawu hi fanele ku tshama na hi alakanya a kutsumba ka hina. Lezvo zvi ta hi vhuna ku timisela hambu ko maheka ni cihi.

20. Cini ci to ku vhuna kuva ni kupima ku nene?

²⁰ Jehovha wa ku wona a kukholwa ka wena ni kutimisela ka wena. (Isaya 30:18; lera Malaki 3:10.) I tsumbisa ku “ku nyika a kuxuva ka mbilu ya wena”. (Tisimu 37:4) Hikwalaho simama u veka kupima ka kutsumba ka wena. Sathani i lava lezvaku u luza kutsumba ka wena u tlhela u pimisa ku lezvi Jehovha a ku tsumbisako zvi nga ta tshuka zvi maheka. Kanilezvi u nga tsiki maalakanyo lawo ma aka cisaka! Loku u wona ku a kutsumba ka wena ka mbhela ntamu, kombela Jehovha lezvaku a ku vhuna. Alakanya a magezu ma nga ka Va Le Filipi 4:6, 7 yaku: “Mu nga karateki hi nchumu, kanilezvi timhakeni tontlhe tivisani Nungungulu zvontlhe lezvi zvi mu karatako hi ku kombela ni ku khongotela, na mu kari mu bonga; a kurula ka Nungungulu loku ku hundzako a kupima kontlhe, ku ta hlayisa a timbilu ta n’wina ni maalakanyo ya n’wina ha Kristu Jesu.”

21, 22. a) Hi gihi kungo ga Jehovha hi misava? b) Zvini u ti yimiseleko ku maha?

²¹ Ti nyike cikhati ca ku ehleketa hi wumandziko go tsakisa hi tova nago. Lokuloku, vontlhe lava va to ngha na va hanya laha misaveni va ta khozela Jehovha. (Kuvhululelwa 7:9, 14) Hi nga alakanyela lezvi a wutomi gi to tshamisa zvona misaveni yiswa. Gi tava gi nene nguvhu ku hundza lezvi hi zvi alakanyako! Sathani, ni madhimoni yakwe, ni wubihi gontlhe zvi ta ngha zvi fuvisilwe. U nga ta ha babya niku u nga tafa. Siku ni siku u ta vhuka na u tiyile u tlhela u tsaka hi kuhanya. Hontlheni hi ta tira zvin’we kasi hi cica misava yiva paradhise. Hontlheni hi tava ni zvakuga zva zvi nene ni wutshamu ga gi nene ga ku hanya kona. Ku nga tava ni vanhu va xapi kutani vo leva; kanilezvi ku tova ni vanhu va lirandzo va khatalako hi van’wani. Hi kufamba ka cikhati, a vanhu vontlhe laha misaveni va ta ti buza hi “kungangamela ka vana va Nungungulu”. — Va Le Roma 8:21.

²² Jehovha i lava kuva Munghana wa wena wa hombe. Hikwalaho maha zvontlhe u zvi kotako kasi ku mu ingisa u tlhela u tshinela kakwe siku ni siku. Loku u maha lezvo, u ta simama lirandzweni la Nungungulu kala kupindzuka! — Judha 21.