Wa chikela ka xiyimo xa Kristu ke?

1, 2. Kukula ka tshamela muni loku a muKristu munwe ni munwani a faneleko ku ku lwela? Kombisa.

LOKU a wasati wo tlhariha a hlawula mihanzu ya yi nene le bazarini, a hi xikhati xontlhe a hlawulako leyi ya hombe kutani ya baratu. Kanilezi, i hlota leyi yo buva. I lava mihanzu yo nanziha ni yo nuhela leyi yi nyikako wutomi. I hlawula mihanzu leyi yi nga kula kala yi tiyela, yi tlhela yi buva.

² Anzhako ka kuva a munhu a kulile aza a ti hendleleta ni ku bapatizwa, i simama a kula. A kungo gakwe kuva nanza go buva ga Nungungulu. A kubuva loku hi wulawulako hi kona a hi ka miri, kanilezi ka moya. Mupostoli Paule i tsalele maKristu ya le Efesusi xungetano hi xilaveko xa kuva ma kula hi tlhelo ga moya. I lo ma kuca ku lwela ku “chikela kuzwaneni ka kukholwa, ni ka ku tiva a N’wana wa Nungungulu, ni ka wudota gi mbheleleko, ni ka lipimo la xiyimo xi mbheleleko xa Kristu.” — Efe. 4:13.

3. Xiyimo muni xi nga hi kona bandleni ga le Efesusi xi nga kona xikari ka vanhu va Jehova nyamutlha?

³ A xikhati lexi Paule a nga tsala papilo gakwe, a bandla ga le Efesusi gi wa sina gi hi kona hi malembe yo kari. A vapizani vo tala va wa sina va kulile nguvu hi tlhelo ga moya. Kanilezi a vanwani va wa ha fanele ku ti karata kasi ku kuma kubuva loko. A xiyimo xa Timboni ta Jehova nyamutlha hi xalexo. A vamakabye vo tala va na ni malembe na va tirela Nungungulu niku va buvile hi tlhelo ga moya. Kanilezi zi te dlunya lezaku a hi vontlhe va nga ka xiyimo lexo. Hi xikombiso, lembe ni lembe ka bapatizwa makume ya mazana ya vanhu va vaswa, hikwalaho va fanele ku lwela kubuva. Wena ke? — Kol. 2:6, 7.

KUKULA KA WUKRISTU

4, 5. A maKristu yo buva ma nga hambana hi yini, kanilezi zini lezi ma fanako hi zona? (Wona a mufota kusanguleni ka nzima.)

⁴ Loku u hlola mihanzu yo buva bazarini, wa zi wona lezaku a yi fani. Hambulezo, yi na ni matshamela yo fana ma kombako lezaku yi buvile. A maKristu yo buva wonawu ma ngava ya matiko, ni midawuko, ni lihanyo, ni titanga, ni wutlhari go hambana. Hambu wumunhu ga wona ni mikhuwo zi hambene. Hambulezo, vontlhe lava va kulako hi tlhelo ga moya va hlakulela matshamela ma kombako lezaku va buvile. Hi ndlela muni?

⁵ A nanza go buva ga Jehova gi hanya hi ku lanzela xikombiso xa Jesu, lexi a hi siyeleko kasi hi fela “ku lanzela a nkonzo wakwe.” (1 Ped. 2:21) Xini lexi Jesu a nga xi khanyisa kota xa lisima nguvu? Ku ranza Jehova hi mbilu yontlhe, ni muhefemulo wontlhe, ni kupima kontlhe, ni ku ranza muakelane a ku khwatsi hi wena wutsumbu. (Mat. 22:37-39) A muKristu wo buva i ti karatela ku lanzela wusungukati lego wutomini gakwe. A wutomi gakwe gi komba lezaku wa rangisa wunghana gakwe na Jehova ni ku kombisa liranzo la kutitsona hi vanwani.

6, 7. a) Hi wahi matshamela yo kari ma kombisako kubuva ka muKristu? b) Zini hi to wulawula hi zona?

⁶ Hambulezo, ha zi zwisisa lezaku a liranzo lova tshamela ginwe ntsena ga mbhanzu wa moya lowu a maKristu yo buva ma wu kombisako. (Gal. 5:22, 23) A matshamela manwani — yo kota kurula, kutikhoma, ni kutimisela — wonawu nja lisima. Ma nga mu vuna ku lwisana ni ziyimo zo nonoha na a nga swireki a tlhela a timisela zilo zi panzako mbilu na a nga mbhelelwi hi kutsumba. Ka longoloko wakwe wa xigonzo xa munhu wutsumbu, i tshama hi ku hlota matshinya ya milayo lawa ma nga mu vunako ku hambanisa a zo saseka ni zo biha. Hi kulanzela, i maha ziboho zi kombako lezaku i buvile hi tlhelo ga moya. Hi xikombiso, i ingisa a livalo lakwe li gonzisilweko hi Biblia. A muKristu a buvileko i kombisa kutikoramisa hi ku alakanya xontlhe xikhati lezaku a tindlela ni mawonela ya Jehova zi chukwana ku hunza mawonela ya yena wutsumbu.a I xumayela mahungu yo saseka hi kuhiseka a tlhela a vuvumisa a wumunwe ga bandla.

⁷ Na ku nga khataliseki a xikhati lexi hi nga naxo na hi tirela Jehova, a munwe ni munwani wa hina a nga ti wutisa lezi: ‘Xana xi kona nza ha faneleko ku xi cica kasi ku lanzela khwatsi a konzo wa Jesu, lezaku nzi simama nzi kula hi tlhelo ga moya ke?’

‘A KUGA KU TIYILEKO KU FANELA A VANHU VA KULILEKO’

8. Ku nga wuliwa yini hi lezi Jesu a nga yi tivisa zona a Mitsalo a tlhela a yi zwisisa ke?

⁸ Jesu Kristu i wa yi zwisisa khwatsi a Mhaka ya Nungungulu. Hambu a xikhati lexi a nga hi ni 12 wa malembe ntsena, i zi kotile ku bhulisana hi timhaka ta Mitsalo ni vagonzisi le tempeleni. “Vontlhe lava va nga muzwa va lo hlamala hi kutlhariha kakwe ni mihlamulo yakwe.” (Luka 2:46, 47) Hi kufamba ka xikhati, wutirelini gakwe laha misaveni, Jesu i lo miyeta vakaneti vakwe hi ku kumbuka mitsalo yi faneleko ya Mhaka ya Nungungulu. — Mat. 22:41-46.

9. a) I mahela muni ga xigonzo xa Biblia gi nga ga lisima ka munhu a lavako ku kula hi tlhelo ga moya? b) Hi gihi a kungo ga xigonzo xa Biblia?

⁹ Hi ku yelana ni xikombiso xa Jesu, a muKristu a lavako ku kula hi tlhelo ga moya a nga ta eneliswa hi wutivana gi tsongwani ga Biblia. I maha xigonzo xo eta xa Biblia hi kukhanzakanya, na a zi tiva lezaku “a kuga ku tiyileko ku fanela a vanhu [va] kulileko.” (Maheb. 5:14) Zi te dlunya lezaku a muKristu wo buva i lava “ku tiva a N’wana wa Nungungulu.” (Efe. 4:13) U na ni longoloko wa ku gonza Biblia siku ni siku? Xana wa lanzela longoloko wa xigonzo xa munhu wutsumbu, u maha zontlhe u zi kotako kasi ku ti siyela xikhati xa wukhozeli ga ngango viki ni viki? Laha u gonzako a Mhaka ya Nungungulu, hlota matshinya ya milayo ya Mitsalo lawa ma nga ku vunako ku wona khwatsi a mawonela ya Jehova ni lezi a ti zwisako zona. Hi kulanzela, zama ku tirisa matshinya lawo ya milayo ya Biblia, u khegela ka wona zibohweni za wena, zonake u tshinela nguvu ka Jehova.

10. A wutivi ga muKristu wo buva gi khumbisa kuyini a wutomi gakwe ga siku ni siku?

¹⁰ A muKristu wo buva wa zi zwisisa lezaku a wutivi goce a gi eneli. Ahandle ka lezi a zi tivako, liranzo lo kota kwihi a nga nalo hi lezi a zi tivako xungetano hi tindlela ta Nungungulu ni matshinya Yakwe ya milayo? A xinwe xa zikombiso za liranzo lelo ku rangisa zilo zi zwananako ni kuranza ka Nungungulu wutomini gakwe. Tlhatakumbiri, a muKristu loye handle ko kanakana wa ti karata kasi ku “tlhatlha” a mahanyela yakwe ya kale. A xikhati lexi a muKristu a cicako wutomi gakwe hi ndlela leyo, i ambala a wumunhu giswa go fana ni ga Kristu, legi gi vangiwako “ku fanana ni Nungungulu kululameni ni kubaseni ka [lisine].” (Gonza Va Le Efesusi 4:22-24.) A Biblia gi tsalilwe hi ku rangelwa hi moya wa ku basa wa Nungungulu. Laha a muKristu a engetelako wutivi gakwe ni liranzo lakwe hi matshinya ya milayo ya Biblia, i vulula mbilu yakwe ni mapimo kasi ku rangelwa hi moya wa ku basa. Lezo zi mu maha a kula hi tlhelo ga moya.

I VUVUMISA WUMUNWE

11. Zini lezi Jesu a yimiseneko nazo kuhanyeni kakwe ni maxaka yakwe zinwe ni vapizani vakwe ke?

¹¹ Wutomini gakwe laha misaveni kota munhu wo mbhelela, Jesu i wa ranzelwe hi vanhu va nga mbhelelangiko. I wundlilwe hi vapswali va nga mbhelelangiko, niku i mbhetile malembe yo tala na a tshama kaya ni maxaka ma nga mbhelelangiko. Hambu valanzeli vakwe va hombe va wa khumbiwa hi moya wa makangwa ni wo khohlisa lowu wu nga va ranzele. Hi xikombiso, ka wusiku legi Jesu a nga khonwa hi gona a ta dawa hi manziko wa kona, “ku lo huma a kukanetisana xikari kabye, lezaku himani a alakanyelwako a kuva wa hombe.” (Luka 22:24) Kanilezi Jesu i wa tsumba lezaku a valanzeli vakwe va nga mbhelelangiko va wa ta kula hi tlhelo ga moya, va wumba bandla gi nga ni kubohana. Ka wusiku galego, Jesu i lo khongelela a wumunwe ga liranzo ga vapostoli, a kombela Dadani wakwe wa le tilweni aku: “[Ngha] vontlhe va fela kuva munwe, kota lezi wena Dadani u nga ka mina, na mina nzi nga ka wena, lezaku na vona va fela ku tshama ka hina; . . . kasi va fela kuva munwe, kota hina hi nga munwe.” — Joh. 17:21, 22.

12, 13. a) A bhuku ga Va Le Efesusi 4:15, 16 gi khanyisisa kuyini a xilaveko xa ku vuvumisa wumunwe lomu bandleni? b) Makabye Uwe i gonzisile kuyini ku hlanganyetela wumunwe ke?

¹² A nanza go buva ga Jehova gi vuvumisa wumunwe nzeni ka bandla. (Gonza Va Le Efesusi 4:1-6, 15, 16.) Hi xuva lezaku a vanhu va Nungungulu va ‘tlhanganyiswa’ ni lezaku a ziro zontlhe zi tirisana. Hi kuya hi Mhaka ya Jehova, kasi ku kuma kubohana loko, ku laveka kutikoramisa. A makabye wo buva wa ti koramisa a hlota wumunwe, hambu loku a yimisana ni kungambheleli ka vanwani. U hlamulisa kuyini loku u wona kungambheleli ka makabye wo kari lomu bandleni? Ahati loku a wokari lomu bandleni a ku mahela kubiha ke? Xana u byekelela ku tsema wuxaka naye, kutani ku nyima ku wulawula naye ke? Kutani u ti karatela ku lulamisa a kuzwanana ka nwina? Kunene, a muKristu wo buva a nga dayi wuxaka kanilezi i ti karatela ku vuxa kuzwanana.

¹³ Wona xikombiso xa Uwe. A kale i wa tsika a kungambheleli ka makholwa-kulobye ku mu zangarisa. Kanilezi i lo boha ku tirisa Biblia ni Estudo Perspicaz das Escrituras kasi ku gonza a wutomi ga Davida. Hikuyini a nga hlawula Davida? Uwe i ngalo: “Davida i wonile a mahanyela yo biha ya makholwa-kulobye. Hi xikombiso, Hosi Saule i zamile ku mu daya, a vanhu vo kari va lavile ku mu gandla hi maribye, niku hambu sati wakwe wutsumbu i mu tseketsele. (1 Sam. 19:9-11; 30:1-6; 2 Sam. 6:14-22) Kanilezi Davida a nga tshukangi a tsika a mahanyela ya vanwani ma tlimba a liranzo lakwe hi Jehova. Tlhatakumbiri, Davida i wa hi ni mbilu ya tipswalo, leyi minawu nzi nga fanele ku yi hlakulela. Lezi nzi zi gonzileko ka xigonzo lexo zi lo cica a mawonela ya mina mayelano ni kungambheleli ka makholwa-kulori. A nza ha veketeli a zihoxo za vanwani. Kanilezi nzi ti karatela ku hlanganyetela a wumunwe ga bandla.” Xana wenawu u ti yimisele ku hlanganyetela a wumunwe ga bandla?

LAVA VANGHANA VA MAHAKO KURANZA KA NUNGUNGULU

14. Jesu i hlawulile vanhu vo tshamisa kuyini lezaku va maha vanghana vakwe?

¹⁴ Jesu i wa hi ni xinghana ka vanhu vontlhe. A vanhu va tixaka tontlhe — a vavanuna, a vavasati, a vaswa, hambu ni vanana — va wa tlhatlheka loku va hi na yena. Kanilezi loku zita ka vanghana va laha kusuhani, Jesu i wa cuwuka khwatsi kasi ku hlawula. I lo byela vapostoli vakwe vo tsumbeka aku: “Nwina mu [vanghana va] mina, loku mu maha lezi nzi mu leletelako.” (Joh. 15:14) Jesu i hlawulile vanghana lavo xikari ka lava va nga mu lanzela hi kutsumbeka va tlhela va tirela Jehova hi mbilu yontlhe. Xana wenawu wa hlawula vanghana va wena va hombe xikari ka lava va tirelako Jehova hi mbilu yontlhe? Hikuyini zi nga za lisima?

15. A vaswa va nga vunekisa kuyini hi ku tolovelana ni maKristu yo buva?

¹⁵ A mihanzu yo tala yi buva loku yi kuma masani. Hi kufanana, a kukufumela ka wumakabye ga hina ku hi vuna ku kula hiza hi buva hi tlhelo ga moya. Kuzilava u muswa a zamako ku maha xiboho xa lezi a to maha wutomini gakwe. Gi wa tava wutlhari ga hombe loku wo tolovelana ni makholwa-kulori lawa ma nga ni matimu yo tala ya ku tirela Jehova ni ku hlanganyetela wumunwe ga bandla! Wutomini gabye, kuzilava va lwisene ni zikarato za wutomi zinwe ni minzhingo ntirweni wa Nungungulu. A vanhu lavo va nga ku vuna ku hlawula a ndlela ya chukwana ya ku tirisa wutomi ga wena. A wunghana gi nene ni gi akako ga vamakabye lavo gi nga ku vuna ku maha ziboho za wutlhari ha wece u tlhela u buva hi tlhelo ga moya. — Gonza Maheberu 5:14.

16. A vanghana va kulileko lomu bandleni va vunisile kuyini makabye wo kari a nga ha hi muswa?

¹⁶ Hi xikombiso, Helga i alakanya lezaku ka lembe go gumesa xikoleni, a zigonzani-kulobye zi wa tshamela ku wulawula hi mixuvo ya zona. A kutala ka zona zi wa lava kuya universidade kota zambo go sangula kasi ku humelela wutomini. Helga i lo bhula hi mhaka leyo ni vanghana lomu bandleni. I bika lawa: “A kutala kabye va wa hi va hombe ka mina, niku va nzi vunile nguvu. Va lo nzi kuca ku nghenela ntiro wa xikhati xontlhe. Hi kulanzela nzi lo zi kota ku tira ntlhanu wa malembe kota phayona. Zalezi ku hunzako malembe yo kari nza tsaka hi kuva nzi tirisile a wuswa ga mina kasi ku tirela Jehova. A nzi na xigelo xa ku ti sola hi kuva nzi mahile lezo.”

17, 18. A kukula ka moya ku nga hi vunisa kuyini ku tatisa a kungo ga hina wutomini?

¹⁷ A ku ti karatela ku lanzela xikombiso xa Jesu wutomini ga hina zi ta hi vuna kukuleni ka hina ka wuKristu. Hi ta tshinela ka Jehova, niku a kuxuva ka hina ko lava ku mu tirela hi laha zi kotekako hi kona ku ta kulawo. A nanza ga Nungungulu gi nga mahela Jehova zontlhe gi zi kotako loku gi kulile hi tlhelo ga moya — giva muKristu wo buva. Jesu i lo kuca valanzeli vakwe aku: “Ngha na kuwonekela ka nwina ku woninga mahlweni ka vanhu, kasi va wona mitiro ya nwina yo saseka, va dumisa a Raru wa nwina wa le tilweni.” — Mat. 5:16.

¹⁸ Kota lezi hi zi wonileko, a muKristu a buvileko a nga vuna nguvu lomu bandleni. Niku a kubuva loko ka moya ku woneka ka lezi a muKristu a tirisisako zona a livalo lakwe, leli li nga xinyikiwo xi tako hi ka Nungungulu. A livalo la hina li nga hi vunisa kuyini ku maha ziboho za wutlhari? Niku hi nga kombisisa kuyini xichawo hi ziboho za tivalo ta makholwa-kulori? A timhaka leti hi ta wulawula hi tona ka nzima yi lanzelako.