CIGONDZO 8

Tirisa mifananiso yi gondzisako

Matewu 13:34, 35

LEZVI U FANELEKO KU MAHA: Engetela a ntamu wa gondzo ya wena hi mifananiso yo olova yi to koka kupima ka lava u bhulako navo yi tlhela yi va gondzisa timhaka ta lisima.

U TA ZVI MAHISA KUYINI?

Hlawula mifananiso yo olova. Pimanyisa Jesu, u tirisa zvilo zva zvitsongwani kasi ku tlhamusela zvilo zvahombe, u tlhela u tirisa zvilo zvo olova kasi ku tlhamusela zvilo zvo karata. U nga tateli mitlhamuselo yi nga lavekiko yi to karatisa mufananiso. Tiyiseka lezvaku a matshamela ya mufananiso wa wena ma yelana khwatsi ni mhaka leyi u gondzisako kasi ku lava u bhulako navo va nga lahleki hi ku wona ku a timhaka to kari ta mufananiso wa wena a ti yelani ni lezvi u gondzisako.

Cuwukisisa khwatsi. Cuwukisisa zvilo lomu u tshamako kona, u gondza mabhuku ya hina, u tlhela u ingisela a vagondzisi vo buvha. A cikhati u mahako lezvo, tsala mifananiso u to yi tirisa kasi ku engetela a ntamu wa gondzo ya wena. Hlayisa a mifananiso leyo.
Alakanyela lezvi zvi to vhuna lava u bhulako navo. Hlawula a mifananiso yi taleleko ka mitiro ya lava u bhulako navo ni lezvi va zvi randzako kutani zvi va karatako. Ti wonele kasi a mifananiso ya wena yi nga va wisi tingana ne ku va khunguvanyisa.
Gondzisa mhaka-tshinya. Maha mifananiso ka timhaka-tshinya, na ku nga hi ka mitlhamuselo ya yitsongwani. Ti karatele a ku loyi u bhulako naye a nga alakanyi a mufananiso basi, kanilezvi a alakanya ni mhaka leyi a gondzileko ka mufananiso lowo.