CIGONDZO 11

Wulawula hi kuchivirika

Va Le Roma 12:11

LEZVI U FANELEKO KU MAHA: Hlanganyeta timbilu ta lava u bhulako navo u tlhela u va kuca hi ku wulawula hi kuchivirika.

A mhaka leyi u lavako ku gondzisa yi wa range yiva mbilwini ya wena. A cikhati u longiselako a kanelo ya wena, ehleketa khwatsi hi lisima la mahungu ya wena. Ti karatele ku ma tiva khwatsi a mahungu lawo kasi u wulawula na zvi sukela mbilwini.
Alakanyela hi lava u bhulako navo. Ehleketa hi lezvi a mahungu lawa u lavako ku lera kutani ku gondzisa ma to va vhunisa zvona van’wani. Hlota tipulani ta ku kanela mahungu lawo hi ndlela yi to vhuna lava u bhulako navo lezvaku va ma nyika nguvhu lisima.
Kanela mhaka ya wena hi ndlela yo hanya. Wulawula hi kuchivirika. Tirisa majesto hi ndlela yo toloveleka, ni ku kombisa hi nghohe ya wena lezvi hakunene u ti zwisako zvona hi mhaka leyo.

Ti wonele kasi u nga va juji kupima lava u bhulako navo hi ku tirisa a jesto yaleyi ya yin’we hi kuphindaphinda zvi ku khwatsi mukhuwo. Maha majesto yo wulawula. Wulawula hi kuchivirika nguvhunguvhu loku u gondzisa timhaka-tshinya ni loku u kuca lava u bhulako navo lezvaku va maha cokari. U nga chiviriki kusukela kusanguleni kala magumo laha ka kuza lava u bhulako navo va kolwa hi wena.