U nga maha yini kasi u vhuneka khwatsi hi ku lera Bhibhiliya?

U tshuka u lava ku maha a ntiro wo kari kanilezvi u mbhela ntamu hi ku alakanya ku wa hombe ke? Kasi ku wu olovisa, kuzvilava zvi lavile ku u wu ava hi zvipandze zva zvitsongwani. U nga maha zvalezvo a cikhati leci u lerako a Bhibhiliya. Kuzvilava u nga ti wutisa ku: ‘Ndzi ta sangulela kwihi?’ Ka cigondzo leci, hi ta wona a zvilo zvo kari zvo olova zva ku u nga maha kasi u tsaka hi ku lera ni ku gondza a Bhibhiliya.

1. Hikuyini hi faneleko ku lera a Bhibhiliya siku ni siku?

A munhu loyi a lerako a Bhibhiliya kutani “nayo wa Jehovha” siku ni siku, i ta tsaka zvi tlhela zvi mu fambela khwatsi. (Lera Lisimu 1:1-3.) Kasi kusangula, zama ku lera ku tsongwani siku ni siku. Laha u toya u yi tiva khwatsi a Mhaka ya Nungungulu, u ta ya u zvi randza nguvhu a ku lera Bhibhiliya.

2. Hi nga maha yini kasi hi vhuneka khwatsi hi ku lera Bhibhiliya?

Kasi hi vhuneka khwatsi hi ku lera Bhibhiliya, hi fanele ku lera na hita hi nyima hi pimisa hi lezvi hi lerako. Hi fanele ku gi lera ni ku “ehleketisisa hi gona”. (Joxuwa 1:8, tlhamuselo wa lahasi) Laha u lerako Bhibhiliya ti wutise zvo khwatsi hi lezvi: ‘Lezvi zvi ndzi gondzisa yini hi Jehovha? Ndzi nga zvi tirisisa kuyini lezvi wutomini ga mina? Ndzi nga ma tirisisa kuyini mavhesi lawa kasi ku vhuna van’wani?’

3. U nga ci kumisa kuyini cikhati ca ku lera Bhibhiliya?

Zva ku karatela ku kuma cikhati ca ku lera Bhibhiliya? A kutala ka hina zva hi karatela. Ti karatele ku “ci tirisa khwatsi a cikhati ca [wena]”. (Va Le Efesusi 5:16) U nga maha lezvo hi ku ti vekela cikhati co kongoma ca ku lera Bhibhiliya siku ni siku. A vanhu vo kari va zvi wona na zvi hi chukwana ku lera Bhibhiliya ni mixo. A van’wani va hlawula ku gi lera hi cikhati ca ku humula ni mumu. Ni van’wani kambe va lera Bhibhiliya ni wusiku na va nga se etlela. Wena ke, hi cihi cikhati ca ci nene ka wena?

GONDZA ZVI ETA

4. Lezvi u nga mahako kasi u randza ku lera Bhibhiliya

Hi nga wula ku a zvi olovi ku sangula ku lera Bhibhiliya. Kanilezvi u nga zvi kota ku sangula ku randza a ku lera Bhibhiliya a ku khwatsi hi lezvi u nga ha sangulako a ku tsakela kuga zvakuga zva ku cima u wa nga se zvi ringa. Lerani 1 Pedro 2:2, mu gumesa mu bhula hi ciwutiso leci:

• U alakanya ku a ku lera Bhibhiliya siku ni siku zvi nga ku vhuna a ku randza ku gi lera?

Bisani VHIDHIO kasi ku wona lezvi a vokari va nga maha kasi va randza ku lera Bhibhiliya. Hi kulandzela, bhulani hi zviwutiso zvi landzelako.

VHIDHIO: Vaswa va gondzako ku randza Mhaka ya Nungungulu (5:33)

• Zvikarato muni zvi nga maha a vaswa lava va nga leri Bhibhiliya?

• Zvini zvi va vhunileko ku va simama ku lera Bhibhiliya siku ni siku?

• Zvini va mahileko kasi lezvi va lerisako zvona Bhibhiliya zvi tsakisa?

Mawonela ma to ku vhuna ku sangula ku lera:

• Hlawula Bhibhiliya go tsumbeka, gi tirisako mawulawulela yo olova. Pima ku lera a Wuhundzuluseli ga misava yiswa loku gi kumeka hi lirimi la wena.

• Sangula hi ku lera a zvipandze zvi ku tsakisako nguvhu. Kasi u kuma mawonela yo kari, wona a kwadru “Sangula ku lera Bhibhiliya”.

• Funga lezvi makunu u lerileko. Tirisa a kwadru “Funga laha u nga nyima kona” gi nga ka bhuku legi.

• Tirisa a aplikativho ya JW Library^®. Loku u hi ni aplikativho leyi, u nga lera ni ku ingisela a Bhibhiliya ni kwihi u nga kona, na u tirisa a fone kutani muchini wun’wani.

• Tirisa a Maapendise ma nga ka Wuhundzuluseli ga misava yiswa. A maapendise lawo ma na ni mimapa, ni makwadru ni tlhamuselo wa magezu ya Bhibhiliya zvi nga mahako ku a kulera ka wena Bhibhiliya ku tsakisa.

5. Longisela a cigondzo ca wena ca Bhibhiliya

Lerani Lisimu 119:34, mu gumesa mu bhula hi ciwutiso leci:

• Hikuyini zvi nga zvinene a ku ranga hi ku khongela na u nga se lera Bhibhiliya kutani ku longisela a cigondzo ca wena ca Bhibhiliya?

U nga maha yini kasi u vhuneka khwatsi hi cigondzo ca wena ca Bhibhiliya? Laha u longiselako a cigondzo co kari ca bhuku legi, zama ku maha lezvi:

1. Lera a maparagrafo yo sangula ya cigondzo.

2. Lera a mitsalo ya Bhibhiliya u tlhela u zama ku zwisisa ku yi yelanisa kuyini ni mhaka leyo.

3. Funga magezu ma hlamulako a ciwutiso cin’we ni cin’wani. Lezvo zvi ta ku vhuna nguvhu laha mu bhulako hi cigondzo leco ni mugondzisi wa wena

U wa zvi tiva?

A Vakustumunyu va Jehovha va sina va tirisile a wuhundzuluseli go hambanahambana ga Bhibhiliya. Kanilezvi hina hi gi randza nguvhu a  Wuhundzuluseli ga Misava Yiswa ga Bhibhiliya go Basa hakuva gi wula lisine, ga olova a ku gi zwisisa niku ga tirisa a vito ga Nungungulu. — Wona a ndzima yi nga ka jw.org yi nge: “A Vakustumunyu va Jehovha va na ni Bhibhiliya ga vona voce ke?”

LEZVI HI NGA GONDZA

Kasi u vhuneka khwatsi hi Bhibhiliya, ti nyike cikhati ca ku gi lera, u khongela kasi u zwisisa lezvi u lerako u tlhela u longisela a cigondzo ca wena ca Bhibhiliya.

Zviwutiso zva kuvhuxeta

• U nga maha yini kasi u vhuneka khwatsi hi ku lera Bhibhiliya?

• U nga ci kumisa kuyini cikhati ca ku lera ni ku gondza Bhibhiliya?

• Hikuyini zvi nga zvi nene a ku longisela a cigondzo ca wena ca Bhibhiliya?

GONDZA ZVIN’WANI

Wona mawonela yo kari ma nga ku vhunako ku u vhuneka khwatsi hi ku lera Bhibhiliya.

“Ndlela ya ku vhuneka nguvhu loku u lera Bhibhiliya” (A Murindzeli, N.° 1 2017)

Wona mawonela manharu ya lezvi u nga lerisako zvona Bhibhiliya.

“A Bhibhiliya gi nga ndzi vhunisa kuyini? — Cipandze 1: Gi tive khwatsi a Bhibhiliya ga wena” (Ndzima yi nga ka jw.org)

Wona lezvi u nga mahako kasi u randza ku lera Bhibhiliya.

“A Bhibhiliya gi nga ndzi vhunisa kuyini? — Cipandze 2: Maha ku a kulera ka wena ka Bhibhiliya ku tsakisa”(Ndzima yi nga ka jw.org)

Wona mawonela ya lezvi u nga lerisako zvona Bhibhiliya ka lava va sinako va gi lera hi malembe.

Maha cigondzo ca munhu wutsumbu ci bhindzulako (2:06)