Hi nga maha yini kasi a makhozelela ya hina ma tsakisa Nungungulu?

Kota lezvi hi zvi wonileko ka cigondzo ci hundzileko, a hi gontlhe wukhongeli gi tsakisako Nungungulu. Hambulezvo, hi nga zvi kota ku khozela a Muvangi wa hina hi ndlela yi mu tsakisako. Hi wahi a makhozelela [kutani “wukhongeli”] legi gi mu tsakisako? (Jakobe 1:27, tlhamuselo wa lahasi) A hi wone lezvi a Bhibhiliya gi gondzisako.

1. A makhozelela ya hina ma fanele ku seketelwa ka yini?

A makhozelela ya hina ma fanele ku seketelwa ka Bhibhiliya. Jesu i byelile Nungungulu, aku: “A mhaka ya wena lisine.” (Johani 17:17) A wukhongeli go kari a gi na mhaka ni lisine li kumekako lomu ka Bhibhiliya, ku nga Mhaka yi pimisilweko hi Nungungulu. Gi vhaleta a lisine lelo hi tigondzo ta vanhu ni zvihena. Hambulezvo, Jehovha a nga tsakisiwi hi lava va ‘hambunyetako a nayo wa Nungungulu’. (Lera Marku 7:9.) Kanilezvi hi tsakisa a mbilu ya Nungungulu loku hi seketela a makhozelela ya hina lomu ka Bhibhiliya hi tlhela hi landzela a wusungukati ga gona.

2. Hi fanele ku mu khozelisa kuyini Jehovha?

Hi fanele ku khozela Jehovha yece hakuva hi yena Muvangi wa hina. (Kuvhululelwa 4:11) Lezvo zvi wula ku hi fanele ku mu randza hi tlhela hi khozela yena yece na hi nga tirisi zvifananiso. — Lera Isaya 42:8.

A makhozelela ya hina ma fanele kuva yo ‘basa ni yo amukeleka’ ka Jehovha. (Va Le Roma 12:1) Lezvo zvi wula ku hi fanele ku ingisa milayo yakwe. Hi cikombiso, lava va randzako Jehovha va yi randza a milayo yakwe xungetano hi wukati va tlhela va yi landzela. Va potsa zvilo zvo biha zvo kota kudzaha, kutirisa madroga ni kunwa nguvhu.a

3. Hikuyini hi faneleko ku khozela Jehovha na hi hi zvin’we ni makholwa-kulori?

A mitlhangano ya hina ya vhiki ni vhiki yi hi nyika thomo ga ku “dhumisa Jehovha . . . lomu bandleni”. (Lisimu 111:1, 2) A yin’we ya tindlela ta ku maha lezvo ku yimbelela tisimu ta ku dhumisa Nungungulu. (Lera Lisimu 104:33.) Jehovha i lava ku hiya mitlhanganweni hakuva wa hi randza niku wa zvi tiva ku a mitlhangano yi ta hi vhuna a ku hi ti buza hi wutomi kala kupindzuka. Ahandle ka lezvo, loku hi hi mitlhanganweni ha kucana ni van’wani.

GONDZA ZVI ETA

4. A hi faneli ku tirisa zvifananiso wukhozelini ga hina

VHIDHIO: Zva mu tsakisa Nungungulu a ku hi tirisa zvifananiso wukhozelini? (3:26)

• Zvini zvi nga humelela laha a vanhu vo kari va Nungungulu va cikhatini ca kutsaliwa ka Bhibhiliya va nga zama ku mu khozela na va tirisa cifananiso?

A vanhu vo kari va tirisa zvifananiso a cikhati leci va khozelako Nungungulu, hakuva ve loku va maha lezvo va tizwa na va hi kusuhani naye. A ku hakunene a ku maha lezvo zva va tshineta kakwe? Lerani Eksodhusi 20:4-6 ni Lisimu 106:35, 36, mu gumesa mu bhula hi zviwutiso lezvi:

• Zvifananiso muni u zvi wonako na zvi tirisiwa hi vanhu wukhozelini gabye?

• Jehovha i ti zwisa kuyini loku hi tirisa zvifananiso?

• Wena ke, hi wahi mawonela ya wena xungetano hi kutirisiwa ka zvifananiso kasi ku khozela Nungungulu?

5. A ku khozela Jehovha yece zva hi tlhatlhisa ka tigondzo ta mawunwa

VHIDHIO: A lisine li mu tlhatlhisile (5:16)

Lerani Lisimu 91:14, mu gumesa mu bhula hi ciwutiso leci:

• Zvini lezvi Jehovha a tsumbisako ku hi mahela loku hi kombisa ku ha mu randza hi ku khozela yena yece?

6. Hi khozela Nungungulu mitlhanganweni ya bandla

Hi dhumisa Jehovha hi tlhela hi tiyisana loku hi yimbelela ni ku hlamula mitlhanganweni ya bandla. Lerani Lisimu 22:22, mu gumesa mu bhula hi zviwutiso lezvi:

• Zva ku tsakisa a kuzwa mihlamulo mitlhanganweni?

• Wa zvi lava ku ti longisela kasi wenawu u hlamula?

7. Jehovha wa tsaka loku hi byela van’wani lezvi hi gondzako

Ku na ni tindlela to tala ta ku hi nga ti tirisa kasi ku bhulela van’wani a lisine la Bhibhiliya. Lerani Lisimu 9:1 ni 34:1, mu gumesa mu bhula hi ciwutiso leci:

• Zvilo muni u gondzileko lomu ka Bhibhiliya u tsakelako ku bhulela mun’wani hi zvona?

LEZVI HI NGA GONDZA

Hi tsakisa a Muvangi wa hina loku hi khozela yena yece, loku hi mu dhumisa mitlhanganweni ya bandla ni loku hi bhulela van’wani lezvi hi gondzako.

Zviwutiso zva kuvhuxeta

• Hi nga gondzisa kuyini a ku tiva lezvi hi nga mu khozelisako zvona Nungungulu hi ndlela yi mu tsakisako?

• Hikuyini hi faneleko ku khozela Jehovha yece?

• Hikuyini hi faneleko ku khozela Nungungulu na hi hi ni lava va lavako ku mu tsakisa?

GONDZA ZVIN’WANI

Ka ndzima “A ndza ha khozeli zvifananiso,” gondza u wona lezvi a wasati wo kari a nga tsikisa zvona ku khozela zvifananiso.

“A Bhibhiliya ga cica wutomi ga vanhu” (A Murindzeli wa 1 ka Julho wa 2011)

Wona lezvi zvi nga ku vhunako a ku hlamula mitlhanganweni ya bandla.

“Dhumisa Jehovha lomu bandleni” (A Murindzeli, Janeiro wa 2019)

Wona lezvi a jaha go kari gi nga vhunekisa zvona hi mitlhangano ya bandla hambu lezvi zvi nga gi karatela a kuya ka yona.

Jehovha i ndzi khatalele (3:07)

A vanhu vo tala va kholwa ku a cihambano ci yimela a wuKristu. Kanilezvi a ku hi fanele ku ci tirisa kukhozeleni ka hina?

“Hikuyini a Vakustumunyu va Jehovha va nga tirisiko a cihambano kukhozeleni kabye?” (Ndzima yi nga ka jw.org)