CIGONDZO 55
Seketela a bandla ga wena
Misaveni yontlhe, ku na ni vanhu va timiliyoni va tirelako Jehovha na va tsakile ka mabandla yabye. Va tsaka nguvhu hi zvileletelo ni wurangeli legi va gi kumako niku va ti yimisele ku seketela bandla hi tindlela to tala. Wenawu u ti zwisa lezvo bandleni ga wena?
1. Hi tihi tindlela to kari ta ku tirisa a cikhati ca wena ni ntamu wa wena kasi ku seketela bandla?
Hontlheni hi nga vhuna bandla. Hi cikombiso, lomu bandleni ga wena ku na ni vokari va khosaheleko kutani va babyako? U nga va teka u va vhuna kuya mitlhanganweni? Kutani u nga va vhuna hi tindlela tin’wani, to kota ku va lavela zvakuga ni zvin’wani va zvi lavako kutani hi ku va vhuna ku basisa a mimiti yabye? (Lera Jakobe 1:27.) Hi nga ti nyikela kambe kasi ku basisa ni ku lungisa a Salawu ya hina ya Mufumo. I hava a hi kurumetako ku maha zvilo lezvi. A lirandzo la hina hi Jehovha ni vamakabye va hina li hi kuca ku hi “ti nyikela hi kuzvirandza”. — Lisimu 110:3.
A Vakustumunyu va Jehovha va bhabhatisilweko va na ni thomo ga ku vhunetela a bandla hi tindlela to tala. A vamakabye va cinuna lava va nga ni matshamela lawa ma kumbukiwako lomu ka Bhibhiliya va nga tira kota malandza yo vhunetela kutani madhota. A vamakabye va cinuna ni va cisati va nga seketela nguvhu a ntiro wa ku chumayela hi ku tira kota maphayona. A Vakustumunyu vo kari va nga vhunetela hi ku aka a matshamu ya ku khozela ka wona ni ku rura vaya lomu ku nga ni bandla gi lavako ku vhunetelwa hi tindlela tin’wani.
2. Hi nga yi tirisisa kuyini a mali ya hina ni titshomba ta hina kasi ku seketela bandla?
Hi nga “dzundza Jehovha hi zvilo zva [hina] zva lisima”. (Mavingu 3:9) Ka hina, i thomo ga hombe a ku maha minyikelo hi mali ya hina ni titshomba ta hina kasi ku seketela a bandla ga hina ni ntiro wa kuchumayela wu mahiwako misaveni yontlhe. (Lera 2 Va Le Korinte 9:7.) A minyikelo ya hina ya tirisiwa kambe kasi ku vhunetela lava va welwako hi timhango. A votala va hlawula ku ‘khweketa zvokari’ kasi ku maha minyikelo hi khandzakanya. (Lera 1 Va Le Korinte 16:2.) Hi nga maha minyikelo lomu ka makaxa ma kumekako ka matshamu lawa hi khozelako ka wona kutani hi internet hi ku tirisa a saite donate.jw.org. Hi nga komba ku ha mu randza Jehovha hi ku tirisa a mali ya hina ni titshomba ta hina kasi ku seketela a bandla.
GONDZA ZVI ETA
Gondza u wona a tindlela leti u nga ti tirisako kasi ku seketela a bandla ga wena.
3. Hi nga seketela bandla hi titshomba ta hina
Jehovha na Jesu va va randza lava va nyikako na va tsakile. Hi cikombiso, Jesu i dzundzile a noni leyi yi nga maha a munyikelo hambu lezvi yi nga hi ni mali ya yi tsongwani. Lerani Luka 21:1-4, mu gumesa mu bhula hi zviwutiso lezvi:
A ku zvi lava ku hi nyikela a mali yo tala kasi hi tsakisa Jehovha?
Jehovha na Jesu va yi wonisa kuyini a minyikelo leyi hi yi mahako hi mbilu yontlhe?
Kasi ku wona lezvi a minyikelo ya hina yi tirisiswako zvona, bisani VHIDHIO. Andzhako ka lezvo, bhulani hi ciwutiso ci landzelako.
A minyikelo yi tirisiwa hi ndlela muni kasi ku vhuna mabandla misaveni yontlhe?
4. Hi nga seketela bandla hi ku ti nyikela kasi ku vhunetela
Cikhatini ca kutsaliwa ka Bhibhiliya, a vakhozeli va Jehovha va wa ti tsitsirita kasi ku hlayisa a matshamu yabye ya wukhozeli. Kanilezvi, lezvo zvi wa patsa zvo hundza ku nyikela mali basi. Lerani 2 Kronekele 34:9-11, mu gumesa mu bhula hi ciwutiso leci:
Zvini lezvi a muIzrayeli mun’we ni mun’wani a nga maha kasi ku hlayisa a yindlu ya Jehovha kutani wutshamu ga wukhozeli?
Kasi ku wona lezvi a Vakustumunyu va Jehovha va ci pimanyisisako zvona a cikombiso leco ci nga lomu ka Bhibhiliya, bisani VHIDHIO. Andzhako ka lezvo, bhulani hi zviwutiso zvi landzelako.
Hikuyini zvi nga zva lisima a ku a Salawu ya hina ya Mufumo yi tshama yi basile ni ku hlayiseka khwatsi?
Zvilo muni zvo kari u nga mahako kasi ku vhunetela?
5. A vamakabye va cinuna va nga ti karatela ku ringanelwa hi ku maha mitiro yo tala lomu bandleni
A Bhibhiliya gi kuca a vavanuna va nga maKristu lezvaku va ti karatela ku maha zvontlhe va zvi kotako kasi ku seketela bandla. Kasi ku wona a cikombiso co kari, bisani VHIDHIO. Andzhako ka lezvo, hlamula a ciwutiso ci landzelako.
Zvini lezvi Ryan wa lomu ka vhidhio a nga maha kasi ku seketela khwatsi a bandla?
A Bhibhiliya ga tlhamusela ku matshamela muni lawa a vamakabye va cinuna va faneleko kuva nawo kasi va ringanelwa hi kuva malandza yo vhunetela ni madhota. Lerani 1 Timote 3:1-13, mu gumesa mu bhula hi zviwutiso lezvi:
A WOKARI A NGA HA WUTISA KU: “A Vakustumunyu va Jehovha va yi kuma kwihi a mali ya ku seketela ntiro wabye?”
U wa ta mu hlamulisa kuyini?
LEZVI HI NGA GONDZA
Jehovha wa tsaka nguvhu hi lezvi hi mahako kasi ku seketela a bandla hi cikhati ca hina, ni ntamu wa hina, ni titshomba ta hina.
Zviwutiso zva kuvhuxeta
Hi nga ci tirisisa kuyini a cikhati ca hina ni ntamu wa hina kasi ku seketela bandla?
Hi nga ti tirisisa kuyini a titshomba ta hina kasi ku seketela bandla?
Hi tihi tindlela u tsakelako ku seketela hi tona a bandla?
GONDZA ZVIN’WANI
Gondza u wona ku hikuyini Nungungulu a nga ha laviko ku a vakhozeli vakwe va humesa zvawukhume.
“Zvini lezvi a Bhibhiliya gi wulako xungetano hi zvawukhume?” (Ndzima yi nga ka jw.org)
A Bhibhiliya ga va nyika mitiro yo kari a vavanuna va bhabhatisilweko. Kanilezvi, zvini lezvi a wasati a bhabhatisilweko a faneleko ku maha loku a lava ku maha mitiro leyo?
“A madhota ma rangela wutomi gontlhe ga vamakabye laha bandleni?” (A Murindzeli, Fevereiro wa 2021)
Tiva a Vakustumunyu vo kari va cinuna va ku tiya hlanha lava va ti karatelako ku heleketa mabhuku ka vakhozeli-kulobye.
Kuavelwa ka mabhuku ma seketelweko ka Biblia le Kongo (4:25)
Gondza u tiva lezvi a ntiro wa hina wu seketeliswako zvona a ku hambana ni tihlengeletano tin’wani ta wukhongeli.