CIGONDZO 52
Hikuyini hi faneleko ku boha khwatsi ni ku ti sasekisa hi ndlela ya yinene?
Hontlheni ha tsaka hi ku ti hlawulela lezvi hi lavako ku boha ni lezvi hi lavako ku ti sasekisisa zvona. Kanilezvi ku na ni matshinya yo kari ya Bhibhiliya ma nga hi vhunako ku hlawula tinguwo ti hi tsakisako na hi nga zangarisi Jehovha. A hi wone yo kari ya matshinya lawo.
1. Hi wahi matshinya ya milayo ma faneleko ku hi rangela laha hi hlawulako tinguwo to boha ni lezvi hi ti sasekisisako zvona?
Hi fanele ku hlawula a “tinguwo ta cichavo, hi kuringanisela ni kupima ku nene” hi tlhela hi tshama na hi basile contlhe cikhati kasi a van’wani va zvi wona lezvaku hi vanhu va “chavako Nungungulu”. (1 Timote 2:9, 10) Wona a matshinya lawa ya mune: 1) Hi fanele ku boha a “tinguwo ta cichavo”. Kota lezvi u zvi wonako mitlhanganweni ya bandla, a vanhu va Jehovha va boha a tinguwo to hambanahambana kanilezvi a tinguwo ta hina ni masasekisela ya hina ya misisi zvi kombisa cichavo hi Nungungulu wa hina loyi hi mu khozelako. 2) A ku boha tinguwo hi “kuringanisela” zvi wula ku lezvi hi bohako a zvi faneli ku vangela van’wani a manyawunyawu ya masango ne ku koka kupima ka van’wani. 3) Hi kombisa “kupima kunene” loku hi nga landzeleli timodha ni tifexeni ta tinguwo ti bohiwako hi votala nyamutlha. 4) Lezvi hi ti sasekisisako zvona contlhe cikhati zvi fanele ku komba van’wani lezvaku hi vanhu va “chavako Nungungulu” niku hi khozela a Nungungulu wa lisine. — 1 Va Le Korinte 10:31.
2. Lezvi hi ti sasekisisako zvona zvi nga ma khumbisa kuyini a maKristu-kulori?
Hambu lezvi hi tlhatlhekileko ku hlawula lezvi hi lavako ku boha, hi fanele ku ehleketa hi lezvi a van’wani va to hi wonisa zvona. Hi maha zvontlhe lezvaku hi nga khunguvanyisi van’wani, kanilezvi kasi ku “tsakisa a muakelani [wa hina] kasi a vhuneka ni ku mu aka”. — Va Le Roma 15:1, 2.
3. Lezvi hi ti sasekisisako zvona zvi nga va kokisa kuyini van’wani lezvaku vata wukhozelini ga lisine?
Hambu lezvi contlhe cikhati hi ti karatelako ku boha khwatsi, hi zama ku boha hi ndlela ya yinene, nguvhunguvhu loku hiya mitlhanganweni ya hina ya bandla ni ntirweni wa kuchumayela. A hi lavi ku boha hi ndlela yi to maha vanhu va nga ingiseli a mahungu ya hina. Wutshan’wini ga lezvo, hi lava ku boha hi ndlela yi to koka van’wani lezvaku va gondza lisine ni ku “sasekisa a gondzo ya Muhanyisi wa hina”. — Titusi 2:10.
GONDZA ZVI ETA
Gondza u tiva ku zvini lezvi hi nga mahako kasi a mabohela ya hina ni lezvi hi ti sasekisisako zvona zvi vhuna van’wani a ku tiva ku hakunene hi maKristu.
A mabohela ya hina ma nga komba ku ha va kombisa cichavo a vanhu lava va nga ni wuhosi kutani ahihi. Hambu lezvi Jehovha a wonako lezvi zvi nga mbilwini ya hina, a mabohela ya hina ni kutisasekisa ka hina zvi fanele zvi komba ku ha mu kombisa cichavo
4. Hi kombisa cichavo hi Jehovha loku hi ti sasekisa hi ndlela ya yinene
Hi cihi cigelo ca lisima nguvhu ci hi mahako hi ti sasekisa khwatsi? Lerani Lisimu 47:2, mu gumesa mu bhula hi zviwutiso lezvi:
A ku tiva ku hi yimela Jehovha, zvi fanele ku ma khumbisa kuyini a mabohela ya hina?
U alakanya ku zva laveka a ku hi ti karatela ku boha khwatsi loku hiya mitlhanganweni ni ntirweni wa kuchumayela? Hikuyini?
5. Zvini zvi nga hi vhunako a ku hlawula tinguwo ni lezvi hi lavako ku ti sasekisisa zvona?
Kani a tinguwo ta hina ti dhurile kutani ahihi, ti fanele kuva ti hlazvilwe ti basa ti tlhela ti ringana a ciyimo leci hi kumekako ka cona. Lerani 1 Va Le Korinte 10:24 na 1 Timote 2:9, 10. Hi kulandzela, bhulani hi ku hikuyini hi faneleko ku potsa ku boha tinguwo . . .
to kala kubasa kutani ti nga kombisiko cichavo?
to manya ni to vangamela kutani ti vhuxelako van’wani a manyawunyawu ya masango?
A maKristu a ma landzeli a Nayo wa Mosi, kanilezvi a nayo lowo wu nga ma vhuna a ku tiva lezvi Jehovha a ma wonisako zvona a mabohela ya hina. Lerani Dhewuteronome 22:5, mu gumesa mu bhula hi ciwutiso leci:
Hikuyini hi faneleko ku potsa a mabohela ni kutisasekisa ku mahako a vavanuna va wonekisa ku khwatsi vavasati ni vavasati a ku khwatsi vavanuna?
Lerani 1 Va Le Korinte 10:32, 33 na 1 Johani 2:15, 16, mu gumesa mu bhula hi zviwutiso lezvi:
Hikuyini zvi nga zvinene a ku ti wutisa lezvi: A mabohela ya mina ma khunguvanyisa vokari lomu cipandzeni kutani lomu bandleni?
A vanhu lomu cipandzeni ca wena va tolovela ku bohisa kuyini?
U alakanya ku a timodha leto ta ringanela maKristu? Hikuyini?
Hi boha hi tlhela hi ti sasekisa hi tindlela to hambanahambana, kanilezvi na hi simama ku tsakisa Jehovha
A VOKARI VE: “Ndzi tlhatlhekile a ku boha ni cihi ndzi ci lavako.”
Wa ma seketela a mawonela lawo? Hikuyini?
LEZVI HI NGA GONDZA
Loku hi hlawula khwatsi a tinguwo to boha ni ndlela ya kutisasekisa hi yona, hi kombisa cichavo hi Jehovha ni van’wani.
Zviwutiso zva kuvhuxeta
Hikuyini lezvi hi bohisako zvona ni lezvi hi ti sasekisisako zvona zvi nga zva lisima ka Jehovha?
Hi wahi matshinya yo kari ya milayo ma faneleko ku hi rangela laha hi hlawulako tinguwo to boha ni lezvi hi ti sasekisisako zvona?
A mabohela ya hina ma yi khumbisa kuyini a ndlela leyi a vanhu va gi wonisako zvona a wukhozeli ga lisine?
GONDZA ZVIN’WANI
Wona ku zvini lezvi a van’wani va zvi pimisako loku va wona a tinguwo ta wena.
“Zvini lezvi a tinguwo ta mina ti wulako hi mina?” (Ndzima yi nga ka jw.org)
Gondza u tiva ku hikuyini gi nga wutlhari a ku ranga hi ku ehleketa khwatsi na u nga se maha a tatuaji?
“Zvini lezvi a Bhibhiliya gi wulako hi matatuaji?” (Ndzima yi nga ka jw.org)
Wona matshinya yo engeteleka ma nga hi vhunako ku maha zviboho zva hina.
“A mabohela ya wena ma dumisa Nungungulu ke?” (A Murindzeli, Setembro wa 2016)
Wona lezvi a wasati wo kari a nga lava ku tsakisa Nungungulu a nga gondzisa zvona a ku vhumela a zviboho zva van’wani xungetano hi ku ti sasekisa ni mabohela yabye.