Kwadru Ga Ziwutiso

◼ Tinguwo ta matshamela muni leti hi faneleko ku ambala loku hi enzela a miako leyi yi tiriselwako a ntiro wa Jehova?

Misaveni yontlhe, a Masalawu ya Mufumo, Masalawu ya Mitlhangano ya Hombe, mingango ya Beteli, ni miako ya maravi matshamu yo hlawuleka ma hendleletelweko a ntiro wa Jehova. A matshamu lawo ma cuwukeka, ma basile, niku ma hlayisiwa khwatsi, na ma hi ni xiyimo xi dzunzekako. Lezi zi hambana kule nguvu ni lezi hi talako ku zi wona mafambiseleni ya zilo ya Satani. Lava va enzelako a matshamu lawa ma tiriselwako a ntiro wa Jehova vonawu va fanele ku tiviwa kota vanhu va lumbako Jehova, va mahako kuranza kakwe.

Kota maKristu, hi “ranza ku kombisa lezaku hi malanza ya Nungungulu” zilweni zontlhe, a ku patsa ni kuambala ni kutisasekisa ka hina hi ndlela yi faneleko. (2 Kor. 6:3, 4) Ku rinzelwa kambe lezaku hi kombisa xichawo xi faneleko. Zikhati zontlhe a maambalela ni kutisasekisa ka hina zi fanele ku kombisa a wudzunzo ni xichawo xi fanelako a malanza ya Jehova Nungungulu. Hi fanele ku mahisa lezo nguvunguvu loku hi enzela a miako ya zinza le Nova Iorque a ku patsa ni loku hi enzela a maravi misaveni yontlhe.

Na gi wulawula hi lisima la kuambala ni kutisasekisa ku faneleko, a bhuku Organizados para Fazer a Vontade de Jeová gi tlhamusela a xilaveko xa kubasa ka miri, tinguwo ti kombisako xichawo, ni kutisasekisa ku nene a xikhati lexi hi nga wutirelini ga simu ni mitlhanganwini ya wuKristu. Zonake, ka phajina 138, nzimana 3, gi ngalo: “Alakanya lezaku a vito Beteli gi wula ku ‘Muti wa Nungungulu.’ Hikwalaho, a maambalela, kutisasekisa, ni mahanyela ya hina zi fanele ku fanana ni lezi zi rinzelwako ka hina a xikhati lexi hi nga mitlhanganwini kasi ku khozela lomu Salawini ya Mufumo.” A nayo lowu wo tlakuka wa mahanyela wu fanele ku lanzelwa hi vahuweleli va Mufumo lava va enzelako Beteli na va suka hi lomu kusuhani zinwe ni lava va sukako ka matshamu ya le kule. Hi ndlela leyo, a mupfhumba i kombisa kubonga ni xichawo xi faneleko. — Tis. 29:2.

A tinguwo ta hina ti fanele ku hi tivekisa kota lava “va ti wulako lezaku va chava Nungungulu.” (1 Tim. 2:10) A kuambala ni kutisasekisa ku faneleko ku na ni kucetelo wu nene ka lezi a vanwani va gi wonisako zona a wukhozeli ga lisine ga Jehova. Hambulezo, ku woneka lezaku a xikhati lexi va enzelako miako leyi yi tiriselwako a ntiro wa Jehova, a vamakabye vo kari va byekelela ka ku boha tinguwo ti nga kombisiko xichawo, ti nga khatalelwangiko, kutani to vangamela. A tinguwo leto a ti faneli maKristu ne ni ka xihi xikhati. Mhakeni leyi, a ku fana ni ka zipanze lezi zinwani zontlhe wutomini ga muKristu, hi xuva ku hlayisa a milayo yo tlakuka ya mahanyela leyi yi hambanyisako a vanhu va Nungungulu ni tiko, hi maha zontlhe ziva kudzunzwa ka Nungungulu. — Rom. 12:2; 1 Kor. 10:31.

Hikwalaho, loku u enzela zinza ni ravi le Doropeni ga Nova Iorque kutani miako yinwani ya maravi, ku nga hava ka lienzo u li maheleko makungo kutani loku u hi ka maferiya na u hi lomu kufambeni, ti wutise: ‘Xana a kuambala ni kutisasekisa ka mina ka kombisa xichawo, kubasa, ni wudzunzo ga wutshamu legi nzi to gi enzela? Xana ku komba yini xungetano hi Nungungulu loyi nzi mu khozelako? Xana a vanwani va ta lahleka kupima kutani ku khunguvanyeka hi kulanguteka ka mina?’ Hi kuambala ni kutisasekisa ka hina, ngha xikhati xontlhe ‘hi bombisa a gonzo ya Nungungulu a Muhanyisi wa hina zilweni zontlhe.’ — Tit. 2:10.