Hi Nga Va Vunisa Kuyini Lava Va Tova Kona Xialakanyisweni?
1. Hi gihi a wukustumunyu ga ntamu nguvu gi to nyikelwa hi siku ga 22 ka Março wa 2008?
1 Hi siku ga 22 ka Março wa 2008, a vanhu va timiliyoni misaveni yontlhe va ta kuma wukustumunyu ga ntamu nguvu. Lava va tako Xialakanyisweni va tazwa hi liranzo la hombe la Jehova leli a li kombisileko hi ku nyikela nzhiho ka vanhu. (Joh. 3:16) Va ta gonza hi Mufumo ni lezi Jehova a to wu tirisisa zona kasi ku tatisa kuranza kakwe hi misava yontlhe. (Mat. 6:9, 10) Va ta li wona ha voce a liranzo ni kubohana ka vanhu va Nungungulu va tlhela va wona lezi hi amukelisako zona vapfhumba hi matsenya. — Tis. 133:1.
2. Hi nga zi vunisa kuyini a zigonzani za Biblia lezi zi tileko Xialakanyisweni?
2 Zigonzani Za Biblia: A vo kari xikari ka lava va tova kona hi lava va ha hi ku sangulako ku gonza a Biblia zinwe na hina. Va tivekise ka vamakabye. Va tlhamusele a mitlhangano ya viki ni viki, u tlhela u va komba a matshamu yo hambanahambana lomu Salawini ya Mufumo. Nzeni ka kanelo, a mukaneli i ta kuca vanhu lavo lezaku vaya mahlweni va kula hi tlhelo ga moya. Wa zi kota ku tirisa a magezu yakwe kota xiseketelo kasi ku kuca a zigonzani za wena.
3. Hi nga va vunisa kuyini a vahuweleli va holileko lava va tileko?
3 Lava Va Holileko: A vanwani va tova kona vahuweleli lava va holileko. Sangula hi wena u va losa hi matsenya. U nga va wutisi hi ta wutomi gabye kutani ku wula magezu lawa ma nga ha va khunguvanyisako. Xikhatanyana nzhako ka Xialakanyiso, a madota ma fanele ku vuxela a vahuweleli vontlhe va holileko lava va nga tile, va va dzunza hi kota ya mizamo yabye ya ku tava kona, va tlhela va va ramba hi matsenya lezaku vata ka mutlhangano wa bandla wu lanzelako.
4. Xana a munwe ni munwani wa hina a nga va vunisa kuyini a vapfhumba?
4 Vapfhumba: A vo kari xikari ka lava va tova kona za koteka ku ngha va hi vanghana kutani ziro za ngango lowu hina wutsumbu hi wu rambileko. Kuzilava a vanwani va amukele a xirambo nzeni ka tsima go hlawuleka. Loku u wona vanhu vo kala u nga va tivi, sangula hi wena u ti tivekisa ka vona u tlhela u va hoyozela. Za koteka ku ngha ku hi khati go sangula va tako mitlhanganwini ya hina. Mabhulweni ya wena u nga ha hlota tindlela ta ku kumana navo. Hi ku va enzela kutani ku va fonela ka masiku ma tsongwani anzhako ka Xialakanyiso, wa zi kota ku hlakulela kutsakela ni ku va fambisela a xigonzo xa Biblia.
5. Hi nga wula yini kasi ku sangula a xigonzo xa Biblia?
5 A mahungu ya kanelo wa Xialakanyiso ma nga tirisiwa kasi ku maha hi wona a xingheniso xa bhuku A Biblia Gi Gonzisako ka lienzo lo wuyela. Hi xikombiso, a mukaneli wa Xialakanyiso i ta gonza Isaya 65:21-23. Ka lienzo lo wuyela, u nga ha kumbuka kanelo zonake uku, “Khwatsi nzi ku komba a makatekwa manwani ma tisiwako hi nzhiho.” Hi kulanzela wulawula hi maphajina 4-5 ya bhuku A Biblia Gi Gonzisako. Kutani u nga ha wula lezi, “A vo tala va ti wutisa lezaku xana hi ta ku wona rini a kutatiseka ka xiprofeto xa Isaya ke.” Zonake gonza a tinzimana 1-3 ka xipimo 9. A ndlela yinwani ku kumbuka lezi a mukaneli wa Xialakanyiso a nga wula, zonake u maha xingheniso xa bhuku A Biblia Gi Gonzisako, u tlhela u kombisa a mamahela ya xigonzo.
6. Hi wahi a malungelo lawa hi nga nawo a xikhati lexi hi lanzelako a xileletelo xa Jesu xa kualakanya a kufa kakwe?
6 Ngha a munwe ni munwani wa hina a hlota tindlela ta ku vuna a zigonzani za Biblia, vahuweleli va holileko, ni vapfhumba lava va ta ngava kona. (Luka 22:19) Hi kutiyileko Jehova i ta katekisa xihi ni xihi hi mahako xo engeteleka ntirweni wa hina wa Mufumo.