Hi Ta Nyika Wukustumunyu Ga Ntamu
1. Ahandle ka kanelo, zini zinwani zi nga khumbako a vapfhumba Xialakanyisweni? Tlhamusela.
1 Rini? Ka wusiku ga Xialakanyiso. Hi ti karatela nguvu ku ramba vanhu lezaku vava zinwe na hina. A vapfhumba lavo va nga ta khumbiwa ntsena hi lezi va to zizwa. Anzhako ka Xialakanyiso, a wasati wo kari i wulawulile hi lezi a nga zi wona — ku nga wunghana xikari ka vontlhe, ni salawu yo saseka ni yo basa leyi yi akilweko yi tlhela yi hlayisiwa hi vatiri va kuziranza. Hikwalaho, hontlheni, na ku nga hi mukaneli ntsena, ha hlengela kunyikeni ka wukustumunyu ka ximaho lexi xa lisima nguvu xa lembe. — Efe. 4:16.
2. Hi nga nyikisa kuyini wukustumunyu ka vapfhumba?
2 Losa A Vapfhumba Hi Matsenya: A ku amukela vapfhumba hi matsenya ni ku kombisa wunghana zi ta nyika wukustumunyu. (Joh. 13:35) Hambu loku u nga zi koti a ku bhula ni vontlhe, i chukwana a ku losana ni lava va nga kusuhani na wena. (Maheb. 13:1, 2) Ti karatele nguvu ku bhula ni vapfhumba lava zi wonekisako ku khwatsi a va tivi munhu. Za koteka ku ngha va amukele xirambo hi xikhati xa tsima. U nga ha va wutisa, “Wo sangula a kuta laha ke?” Va rambe lezaku va tshama zinwe na wena, u tlhela u hlamula ziwutiso zontlhe va mahako. Loku ku hi ni xilaveko xa lezaku a bandla ga nwina gi hatla gi huma kasi ku nghena ginwani bandla, u nga ha wula lezi: “Nzi tsakela ku tiva lezi u nga wu wonisa zona a mutlhangano lowu. Za koteka a ku tlhela hi kumana?”
3. Xana hi nga va hoyozelisa kuyini lava va holileko?
3 Hoyozela Lava Va Holileko: Handle ko kanakana a vahuweleli lava va holileko va tata, a ku patsa ni lava va tlhanganako ni bandla hi siku ga Xialakanyiso xa lembe ni lembe ntsena. Va hoyozele, u tlhela u kombisa lezaku hakunene u tsakile hi ku va wona. (Rom. 15:7) A madota ma zi kota kuya mitini yabye zalezo ku hunzako Xialakanyiso kasi ma ya va kuca lezaku va simama kuta mitlhanganweni. Hi khongelela lezaku a vanhu vo tala lava va tota va dumisa Nungungulu ‘hi kota ya lezi va to zizwa, zinwe ni mitiro ya hina yo saseka leyi va to yi wona.’ — 1 Ped. 2:12.