Va hoyozele!
1. Ximaho muni xi hi nyikako a lungelo ga gi nene kasi ku nyika wukustumunyu, niku hikuyini?
1 A ku na ximaho xinwani xi hi nyikako a lungelo ga hombe kasi ku nyika wukustumunyu a kuhunza a Xialakanyiso xa lembe ni lembe. Hi xikombiso, a lembe legi hi rinzela vanhu va ku hunza 10 wa timiliyoni a kuta va ta wona Xialakanyiso, va tlhela vazwa xungetano hi zikombiso zimbiri za hombe za liranzo lezi zi kombisilweko hi nzhiho. (Joh. 3:16; 15:13) Vona va ta gonza xungetano hi makatekwa va to ma kuma hi kota ya xinyikiwo xa Jehova. (Isa. 65:21-23) Kanilezi, a mukaneli a hi yena yece a to nyika wukustumunyu ka ximaho lexi. Hontlheni hi tava ni lungelo ga ku nyika wukustumunyu ga ntamu hi ku hoyozela vapfhumba hi matsenya. — Rom. 15:7.
2. Hi nga hoyozelisa kuyini a vapfhumba hi wunghana?
2 Wutshanwini ga ku ti lavela ko tshama uku xawu u rinzela a kusangula ka longoloko, a hi chukwana u tshinelela lava va nga kusuhani na wena u bhula navo? A vapfhumba va nga ha chava va tlhela va ti wutisa zotala xungetano hi ximaho lexi. Loku hi va hlekela hi tlhela hi va losa hi wunghana hi ta va maha va tizwa na va tlhatlhekile. Kasi ku tiva ku a munhu loye i tile hi kuva na a amukele xirambo ke, u nga ha mu wutisa a ku i khati go sangula a tako mitlhanganweni ya hina kutani wa tiva wo kari lomu bandleni. Kuzilava u nga mu ramba lezaku a tshama na wena mu tirisa zinwe a Biblia ni bhuku ga tisimu. Loku ku hi Salawu ya Mufumo yi tiriswako, u nga ha ti nyika xikhatana u mu komba matshamu yo hambanahambana. Anzhako ka kanelo, ti yimisele ku hlamula a ziwutiso zakwe. Loku ku hi lezaku a bandla ga wena gi fanele ku hatlisa gi suka kasi gi siyela wutshamu ginwani bandla u nga haku: “Nzi tsakela kuzwa lezi u nga wu wonisa zona a mutlhangano lowu. Nzi nga ku kumisa kuyini?” Maha malulamiselo ya kuva u mu enzela kasi u ya hlakulela a kutsakela kakwe. A madota nguvunguvu ma fanele ku ti karatela ku tiyisa a vahuweleli lava va holileko va to ngha va hi kona.
3. Hikuyini zi nga za lisima a kuva hi ti karatela ku hoyozela vapfhumba Xialakanyisweni?
3 Ka vapfhumba vo tala, legi gi tava khati go sangula ku wona litsako, kurula ni wumunwe gi nga kona paradiseni ga moya legi a vanhu va Jehova va ti buzako hi gona. (Tis. 29:11; Isa. 11:6-9; 65:13, 14) Kupima muni loku a vapfhumba va to suka nako? Lezo zi ta khegela nguvunguvu ka lezi hi to va amukelisa zona.