CIGONDZO 59
U nga zvi kota ku timisela loku u xanisiwa!
Hambu zvo hlwela, a maKristu wontlhe ma ta vhukelwa kutani ku xanisiwa. A ku lezvo zvi fanele ku hi chavisa?
1. Hikuyini hi rindzelako kuxanisiwa?
A Bhibhiliya gi wula lezvi: “Vontlhe lava va xuvako ku hanya hi kukholwa loku ku nga ka Kristu Jesu, vonawu va ta xanisiwa.” (2 Timote 3:12) Jesu i xanisilwe hakuva i wa nga mahi cipandze ca tiko legi ga Sathani. Hinawu a hi mahi cipandze ca tiko, hikwalaho a zvi hi hlamalisi loku hi xanisiwa hi mifumo ya tiko legi ni tihlengeletano ta wukhongeli. — Johani 15:18, 19.
2. Zvini hi nga mahako kasi hi ti longisela kuxanisiwa?
Hi fanele ku mu tsumba nguvhu Jehovha zvezvi. Ti nyike cikhati siku ni siku ca ku khongela kakwe ni ku gondza Mhaka yakwe. Kumeka mitlhanganweni hi kukhandzakanya. A zvilo lezvi zvontlhe zvi ta ku nyika ntamu u wu lavako kasi u tiya hlanha u timisela a tixanisa tontlhe, hambu loku tita hi ka maxaka. Mupostoli Pawule, loyi a nga tala ku xanisiwa, i tsalile lezvi: “Jehovha hi yena muvhuni wa mina; ndzi nga ta chava nchumu.” — Mahebheru 13:6.
A ku chumayela hi kukhandzakanya zvonawu zvi nga hi vhuna a kuva ni kutiya-hlanha. A kuchumayela ku hi gondzisa ku tsumba Jehovha ni ku hlula kuchava vanhu. (Mavingu 29:25) Loku u zvi kota ku tiya hlanha zvezvi u chumayela, zvi ta ku vhuna ku u simama u chumayela hambu loku a mifumo yi betela a ntiro wa hina. — 1 Va Le Tesalonika 2:2.
3. Hi vhunekisa kuyini loku hi timisela kuxanisiwa?
I hava a tsakako hi kuxanisiwa, kanilezvi loku hi timisela a tixanisa, a kukholwa ka hina ku tiya nguvhu. Hi tshinela nguvhu ka Jehovha loku hi wona ku i hi vhunile a cikhati leci hi nga alakanya ku a hi na ntamu wa ku timisela. (Lera Jakobe 1:2-4.) Zva mu pandza nguvhu mbilu Jehovha a ku hi wona na hi xaniseka, kanilezvi zva mu tsakisa loku a hi wona na hi timisela. A Bhibhiliya gi wula lezvi: “Loku mu timisela a tixanisa hi kota ya ku maha zvazvinene, lezvo zvi sasekile mahlweni ka Nungungulu.” (1 Pedro 2:20) Loku hi simama hi tsumbekile, Jehovha i ta hi chachazela hi wutomi ga pindzukelwa misaveni yiswa, lomu vontlhe va to tirela Jehovha na ku nga ha hi na wa ku va xanisa. — Matewu 24:13.
GONDZA ZVI ETA
Gondza u tiva ku hikuyini zvi kotekako ku simama u tsumbekile ka Jehovha hambu loku u xanisiwa. Wona kambe ni makatekwa u to ma kuma loku u maha lezvo.
4. U nga zvi kota ku timisela loku u vhukelwa hi va laha ngangweni
Jesu i wa zvi tiva ku a hi vontlhe laha ngangweni zvi nga wa ta va tsakisa a ku hi tirela Jehovha. Lerani Matewu 10:34-36, mu gumesa mu bhula hi ciwutiso leci:
Zvini zvi nga humelelako loku a wokari laha ngangweni a boha ku tirela Jehovha?
Kasi ku wona cikombiso ca lezvo, bisani VHIDHIO, mu gumesa mu bhula hi zviwutiso zvi landzelako.
Zvini u nga mahako loku a xaka kutani munghana a zama ku ku tsikisa ku tirela Jehovha?
Lerani Lisimu 27:10 na Marku 10:29, 30. Andzhako ka ku lera mutsalo wun’we ni wun’wani, bhulani hi ciwutiso leci:
A citsumbiso leci ci nga ku vhunisa kuyini loku a maxaka kutani vanghana va zama ku ku tsikisa ku tirela Jehovha?
5. U nga tsiki ku tirela Jehovha hambu loku u vhukelwa
Zvi lava ku tiya hlanha kasi ku tirela Jehovha loku a van’wani va zama ku hi tsikisa a ku maha lezvo. Bisani VHIDHIO, mu gumesa mu bhula hi ciwutiso ci landzelako.
A zvikombiso u zvi wonileko lomu ka vhidhio zvi ku tiyisisa kuyini hlanha?
Lerani Mitiro 5:27-29 na Mahebheru 10:24, 25. Andzhako ka ku lera mutsalo wun’we ni wun’wani, bhulani hi ciwutiso leci:
Hikuyini zvi nga zva lisima a ku simama ku khozela Jehovha hambu loku a mufumo wu hi betela ku chumayela ni ku maha mitlhangano?
6. Jehovha i ta ku vhuna ku u timisela
A Vakustumunyu va Jehovha va titanga to hambanahambana ni midhawuko yo hambanahambana va simama va tirela Jehovha hambu loku va xanisiwa. Kasi ku wona lezvi zvi va vhunako, bisani VHIDHIO. Andzhako ka lezvo, bhulani hi ciwutiso ci landzelako.
Cini ci vhunileko a vamakabye lava lezvaku va timisela?
Lerani Va Le Roma 8:35, 37-39 na Va Le Filipi 4:13. Andzhako ka ku lera mutsalo wun’we ni wun’wani, bhulani hi ciwutiso leci:
A mutsalo lowu wu ku tiyisisa kuyini ku u nga zvi kota a ku timisela ni cihi ciringo?
Lerani Matewu 5:10-12, mu gumesa mu bhula hi ciwutiso leci:
Hikuyini u nga tsakako hambu loku u xanisiwa?
Ku na ni vakhozeli vo tala va Jehovha va simamileko ku tirela Jehovha hambu lezvi va nga xanisiwa. Wenawu u nga zvi kota!
A VOKARI VE: “A ndzi nge zvi koti ku timisela loku ndzi xanisiwa.”
Mitsalo muni yi nga tiyisako kutsumba kabye?
LEZVI HI NGA GONDZA
Jehovha wa ku nyika lisima a kutikarata ka hina ka ku mu tirela hambu loku hi xanisiwa. Hi nga zvi kota ku timisela na hi vhuniwa hi yena.
Zviwutiso zva kuvhuxeta
Hikuyini a maKristu ma faneleko ku rindzela kuxanisiwa?
Zvini u nga mahako zvezvi kasi u ti longisela kuxanisiwa?
U nga tiyisekisa kuyini ku u nga zvi kota a ku tirela Jehovha hambu loku u kumana ni cihi ciringo?
GONDZA ZVIN’WANI
Wona a muswa wa jaha na a tlhamusela lezvi Jehovha a nga mu vhunisa zvona a ku timisela a cikhati leci a nga vhalelwe hi kota ya ku nga ti ngheniseli ka zvatiko.
Wona lezvi zvi vhunileko a patswa wo kari a ku simama ku tirela Jehovha hi malembe yo tala hambu lezvi wu nga vhukelwa.
Wona lezvi u nga timiselisako zvona a kuxanisiwa hi kutiya-hlanha.
“A kuxaniseka ka tshinela — ti longisele zvezvi” (A Murindzeli, Julho wa 2019)
Gondza u tiva ku hikuyini hi nga faneliko ku hlamala loku hi vhukelwa laha ngangweni. Wona kambe lezvi u nga mahako kasi ku vhuvhumisa kurula laha ngangweni, lezvo na u simama ku tsumbeka ka Jehovha.
“A lisine ‘a li nehi kurula, kanilezi li neha supado’” (A Murindzeli, Outubro wa 2017)