BHIBLIOTEKA YA SAITE ya Watchtower
BHIBLIOTEKA YA SAITE
ya Watchtower
ciTshwa
  • BHIBHILIYA
  • MABHUKU
  • MITLHANGANO
  • w25 Agosto pp. 2-7
  • Lezvi Jehovha a hi vhunisako zvona a ku timisela

Ka cipandze leci a ku na vhidhyu

Hi tsetselele, kuve ni cikarato kasi a vhidhyu leyi yiba.

  • Lezvi Jehovha a hi vhunisako zvona a ku timisela
  • A Murindzeli i huwelela a Mufumo wa Jehovha (Wa cigondzo)—2025
  • Zvihlokwana zva mhaka
  • Mahungu yo yelana ni lawa
  • MUKHONGELO
  • MHAKA YA NUNGUNGULU
  • MAKRISTU-KULONI
  • KUTSUMBA KA HINA
  • U nga rivali lezvaku Jehovha i “Nungungulu loyi a hanyako”
    A Murindzeli i huwelela a Mufumo wa Jehovha (Wa cigondzo)—2024
  • Ti koramise, u vhumela lezvaku zvi kona u kalako u nga zvi tivi
    A Murindzeli i huwelela a Mufumo wa Jehovha (Wa cigondzo)—2025
  • Papilo gi nga hi vhunako ku timisela hi kutsumbeka kala magumo
    A Murindzeli i huwelela a Mufumo wa Jehovha (Wa cigondzo)—2024
  • Jehovha “wa hanyisa lava va timbilu ti tshovekileko”
    A Murindzeli i huwelela a Mufumo wa Jehovha (Wa cigondzo)—2024
Wona zvinwani
A Murindzeli i huwelela a Mufumo wa Jehovha (Wa cigondzo)—2025
w25 Agosto pp. 2-7

NDZIMA YA CIGONDZO N.° 32

LISIMU 38 Jehovha i ta ku tiyisa

Lezvi Jehovha a hi vhunisako zvona a ku timisela

“A Nungungulu wa tipswalo tontlhe . . . i ta mu tiyisa, a mu nyika ntamu, ni ku mu zimeka mu tiya”. — 1 PED. 5:10.

LEZVI HI TO GONDZA

Hi ta wona a malulamiselo lawa Jehovha a hi nyikako kasi ma hi vhuna ku timisela ni lezvi hi nga ma londzowotisako zvona.

1. Hikuyini zvi lavako ku hi timisela, niku himani a nga hi vhunako? (1 Pedro 5:10)

MASIKWINI lawa yo gumesa ya zvikarato zvi lava ku a vanhu va Jehovha va timisela. A vokari va na ni mababyi yo kala ma hundzi. A van’wani va karateka hi ku felwa hi munhu va mu randzako. A van’wani kambe va kumana ni kuvhukelwa, ku ngava hi maxaka kutani hi wuhosi. (Mat. 10:18, 36, 37) Tiyiseka lezvaku kani hi cihi cikarato u kumanako naco Jehovha i ta ku vhuna ku timisela. — Lera 1 Pedro 5:10.

2. Zvini zvi mahako ku hi zvi kota ku timisela?

2 A ku timisela zvi wula a ku simama hi tsumbekile ka Jehovha hi tlhela hi mu tirela na hi tsakile hambu loku hi kumana ni zvikarato, ni kuvhukelwa, ni zviringo. A maKristu a ma timiseli hi ntamu wa wona wutsumbu; ma timisela ntsena hi lezvi Jehovha a ma nyikako “a ntamu wa hombe wo hundza lowu wo toloveleka”. (2 Kor. 4:7) Ka ndzima leyi, hi ta bhula hi mune wa malulamiselo lawa Jehovha a hi nyikako kasi ma hi vhuna ku timisela. A cin’wani kambe, hi ta wona lezvi hi nga ma londzowotisako zvona a malulamiselo lawo.

MUKHONGELO

3. Hikuyini hi nga wulako lezvaku a mukhongelo cihlamaliso?

3 Jehovha i hi nyikile nchumu wo hlamalisa nguvhu wu hi vhunako ku timisela. I maha lezvaku zvi koteka a ku hi wulawula naye hambu lezvi hi nga vawonhi. (Mah. 4:16) Hi nga ehleketa hi lezvi: Hi nga khongela ka Jehovha ni cihi cikhati hi tlhela hi mu byela ni cihi hi ci lavako. Jehovha wazwa ni lihi lirimi a tlhela a hizwa ni kwihi hi nga kona, hambu loku hi hi hoce kutani hi vhalelwe. (Jona 2:1, 2; Miti. 16:25, 26) Loku hi karatekile nguvhu laha ka ku hi nga zvi koti a ku kuma magezu ya ku tlhamusela lezvi hi ti zwisisako zvona, hambu ka ciyimo leco Jehovha wa zvi zwisisa lezvi hi lavako ku wula. (Rom. 8:26, 27) Kunene, a mukhongelo cihlamaliso!

4. Hikuyini hi nga wulako lezvaku a mikhongelo ya hina ya ku kombela ku vhuniwa ku timisela ya yelana ni kurandza ka Jehovha?

4 Lomu ka Mhaka yakwe, Jehovha i hi tiyisekisa lezvaku “kani cini hi kombelako ci yelanako ni kurandza kakwe, wa hizwa”. (1 Joh. 5:14) Xana hi nga kombela Jehovha lezvaku a hi vhuna ku timisela? Ina! Lezvo zva yelana ni kurandza kakwe. Hikuyini hi wulako lezvo? A cikhati leci hi timiselako zviringo, hi maha lezvaku Jehovha a hlamula loyi a mu rukako, ku nga Sathani Dhiyabho. (Mav. 27:11) Hi cigelo leco, a Bhibhiliya gi wula lezvaku Jehovha i zvi xuva nguvhu a ku “kombisa a ntamu wakwe ka lava a mbilu yabye yi mbheleleko kakwe”. (2 Kro. 16:9) Hikwalaho, hi nga tiyiseka lezvaku Jehovha i na ni ntamu niku wa zvi lava a ku hi vhuna ku timisela. — Isa. 30:18; 41:10; Luka 11:13.

5. A mukhongelo wu hi nyikisa kuyini a kurula ka maalakanyo? (Isaya 26:3)

5 A Bhibhiliya gi wula lezvaku laha hi khongelako hi mbilu yontlhe xungetano hi lezvi zvi hi karatako, “a kurula ka Nungungulu, loku ku hundzako a kupima kontlhe, ku ta hlayisa a timbilu ta [hina] ni maalakanyo ya [hina]”. (Filp. 4:7) Wona ku lezvo zvi wula yini. Lava va kalako va nga tireli Jehovha va kumana ni zvikarato niku va nga hlota kurula ka maalakanyo hi tindlela to hambanahambana. Hi cikombiso, a vokari va zama ku susa zvontlhe maalakanyweni yabye a ku patsa ni kukarateka loku va ku zwako kasi va kuma kurula. A ku susa zvontlhe maalakanyweni zvi na ni mhango hi tlhelo ga moya. (Fananisa na Matewu 12:43-45.) Ahandle ka lezvo, a kurula loku Jehovha a hi nyikako a cikhati leci hi khongelako kakwe ka hombe nguvhu a ku hundza ni kwihi kurula loku a munhu a nga ku kumako hi ku susa zvontlhe maalakanyweni yakwe. A cikhati leci hi khongelako ka Jehovha hi komba lezvaku ha mu tsumba hi kumbhelela niku yena i hi nyika “kurula ko kala ku nga mbheli”. (Lera Isaya 26:3.) A yin’we ya tindlela leti Jehovha a hi nyikako ha tona a kurula loko ku hi vhuna a ku alakanya a lisine lo tiyisa hi gondzako lomu ka Mhaka yakwe. A lisine lelo li rulisa maalakanyo ya hina ni timbilu ta hina hakuva ha zvi tiva lezvaku Jehovha wa khatala hi hina niku i lava lezvaku zvi hi fambela khwatsi. — Lis. 62:1, 2.

6. Hi nga gi londzowotisa kuyini a lulamiselo ga mukhongelo? (Wona ni mufota.)

6 Lezvi u nga mahako. Laha u timiselako zviringo zva kukholwa “hoxela a ndzhwalo wa wena ka Jehovha” u tlhela u mu kombela lezvaku a ku nyika kurula. (Lis. 55:22) A cin’wani kambe, kombela Jehovha lezvaku a ku nyika wutlhari legi gi lavekako kasi ku lwisana ni zvikarato zva wena. (Mav. 2:10, 11) Ka mikhongelo ya wena ya ku kombela ku vhuniwa ku timisela u nga rivali ku bonga. (Filp. 4:6) Hlota zvikombiso zva ku Jehovha wa ku vhuna a cikhati leci u kumanako ni zvikarato u tlhela u mu bonga hi kota ya lezvi a ku vhunako. U nga tsiki a zvikarato lezvi u kumanako nazvo zvi ku tsandzekisa a ku wona a makatekwa lawa u sinako u hi nawo. — Lis. 16:5, 6.

Makabye a kulileko hi tanga a tshamileko loku ndlwini yakwe a khongela hi nguva ya cirami. Laha madzolweni yakwe ku na ni Bhibhiliya gi vhululweko ni cibotorana ca muri ci nga laha mezeni yi nga kusuhani kakwe.

A cikhati leci u khongelako, hi wena u wulawulako na Jehovha. A cikhati leci u lerako Bhibhiliya, hi Jehovha a wulawulako na wena (Wona paragrafo 6)b


MHAKA YA NUNGUNGULU

7. A ku gondza Bhibhiliya zvi hi vhunisa kuyini ku timisela?

7 Jehovha i hi nyikile Mhaka yakwe kasi yi hi vhuna ku timisela. A Bhibhiliya gi na ni mavhesi yo tala ma hi tiyisekisako lezvaku Jehovha wa hi vhuna. Wona cikombiso cin’we basi. Matewu 6:8 i wula lezvi: “A Papayi wa n’wina wa zvi tiva lezvi mu zvi lavako hambu loku mu nga se mu kombela”. A magezu lawa ma wulilwe hi Jesu, niku yena i mu tiva khwatsi Jehovha a ku hundza ni wihi munhu. Hikwalaho, a hi na cigelo ca ku kanakana lezvaku Jehovha wa khatala hi zvilaveko zva hina laha hi kumanako ni zvikarato. A Bhibhiliya gi na ni mavhesi man’wani yo fana ni lawa ma tiyisako a kutiyimisela ka hina ka ku hi timisela. — Lis. 94:19.

8. a) Nyika cikombiso ca tshinya ga nayo ga Bhibhiliya gi nga hi vhunako ku timisela. b) Zvini zvi nga hi vhunako ku alakanya matshinya ya milayo ya Bhibhiliya loku zvi lava ku hi ma tirisa?

8 A matshinya ya milayo ya Bhibhiliya ma nga hi vhuna ku timisela. A ku hundza lezvo, a matshinya ya milayo ya Bhibhiliya ma na ni wutlhari gi nga hi vhunako ku maha zviboho zva zvinene. (Mav. 2:6, 7) Hi cikombiso, a Bhibhiliya gi hi kuca lezvaku hi nga karateki ku hundza mpimo hi zva mandziko kanilezvi hi hanyela ga nyamutlha. (Mat. 6:34) Loku hi tolovela ku lera Mitsalo ni ku ehleketa hi yona zvi ta hi olovela nguvhu a ku hi alakanya matshinya ya milayo loku ma laveka ku hi ma tirisa.

9. A matimu ya Bhibhiliya ma tiyisisa kuyini a kutsumba ka hina ka ku Jehovha i ta hi vhuna?

9 A cin’wani kambe, a Bhibhiliya gi na ni matimu ya lisine ya vanhu va kukholwa ko hlamalisa lava va tsumbileko Jehovha a tlhela a va vhuna. (Mah. 11:32-34; Jak. 5:17) A cikhati leci hi ehleketako hi matimu lawo, hi tiyisa a kutsumba ka hina ka ku Jehovha “wuchavelo ga hina ni ntamu wa hina, civhuno ci tekelako ku kumiwa zvikhatini zva zvikarato”. (Lis. 46:1) Laha hi wonako lezvi a malandza ya Jehovha ya cikhatini ci hundzileko ma nga kombisa zvona kukholwa ma tlhela ma simama ma tirela Jehovha hambu loku ma kumana ni zvikarato, zvi hi kuca a ku pimanyisa a kukholwa ni kutimisela kabye. — Jak. 5:10, 11.

10. Hi nga gi londzowotisa kuyini a lulamiselo ga Mhaka ya Nungungulu?

10 Lezvi u nga mahako. Lera Bhibhiliya siku ni siku u tlhela u maha lista ya mavhesi lawa ma ku vhunako nguvhu. A cin’wani kambe, a votala va polile lezvaku zva vhuna nguvhu a ku sangula siku hi ku lera mutsalo wa siku. Lezvo zvi maha ku va ehleketa hi zvilo zvo tiyisa zvi nga lomu Bhibhiliya. A makabye wo kari wa ku hi Mariea i zvi wonile a ku lezvo hakunene zva vhuna a cikhati leci a vapswali vakwe va nga khon’wa kankro. Zvini zvi mu vhunileko a ku timisela laha a nga kari a khatalela vapswali vakwe ndzeni ka tihweti tabye to gumesa? Marie i wula lezvi: “Mixo ni mixo ndzi wa lera mutsalo wa siku ni ku ehleketa hi wona. Lezvo zvi wa ndzi vhuna a ku tata maalakanyo ya mina hi Mitsalo leyi yi nga ndzi vhuna a ku veka kupima ka zvilo zva hombe nguvhu a ku hundza mina wutsumbu ni ciyimo co bayisa leci ndzi nga kumana naco.” — Lis. 61:2.

MAKRISTU-KULONI

11. Hikuyini zvi hi tiyisako a ku tiva lezvaku a hi hoce laha hi timiselako zvikarato?

11 Jehovha i hi nyika vamakabye misaveni yontlhe kasi va hi vhuna ku timisela. A ku tiva basi lezvaku “a kuxaniseka ko fana ni [loku] ka humelela a vamakabye va [hina] vontlhe misaveni” zvi hi tiyisekisa lezvaku a hi hoce. (1 Ped. 5:9) Kunene, hi nga tiyiseka lezvaku kani ciyimo muni hi kumanako naco, a van’wani vonawu va kumene ni ciyimo co fana va tlhela va timisela. Lezvo zvi wula ku hinawu hi nga zvi kota ku timisela! — Miti. 14:22.

12. A maKristu-kuloni ma nga hi vhunisa kuyini, niku zvini lezvi hi nga ma mahelako? (2 Va Le Korinte 1:3, 4)

12 Laha hi timiselako, a maKristu-kuloni ma nga hi tiyisa. Mupostoli Pawule i zvi wonile hi lawa yakwe lezvo. A kutala ka zvikhati i wa wula magezu ya kubonga lava va nga mu vhuna a cikhati leci a nga vhalelwe laha kaya kakwe a tlhela a va kumbuka hi mavito. A vamakabye lavo va wa maha ku Pawule a chavelelwa ni ku tiyisiwa, va tlhela va mu vhuna nguvhu. (Filp. 2:25, 29, 30; Kol. 4:10, 11) Hinawu lezvo zvi nga hi humelela. A cikhati leci hi lavako ku vhuniwa ku timisela, a vamakabye va hina va tshama va longile kasi ku hi vhuna; niku a cikhati leci vonawu va lavako ku vhuniwa hi tshama hi longile kasi ku va vhuna. — Lera 2 Va Le Korinte 1:3, 4.

13. Zvini zvi vhunileko a makabye wo kari wa ku Maya lezvaku a timisela?

13 A vamakabye va misava yontlhe va mu vhunile nguvhu a makabye wo kari wa le Rússia, wa ku hi Maya. Hi 2020 a maphoyisa ma no nghena laha kaya kakwe hi citshuketi ma secha muti wakwe, a gumesa a xuxisiwa hi ku byela van’wani lezvi a zvi kholwako. Maya i wula lezvi: “Ndzeni ka cikhati leci ndzi nga karele maalakanyo, a vamakabye va no ndzi fonela ni ku ndzi tsalela va ndzi tiyisekisa lezvaku va ndzi randza. Ndzi wa sina ndzi zvi tiva lezvaku ndzi na ni ngango wa hombe nguvhu wa lirandzo. Kanilezvi kusukela hi 2020 ndza tiyiseka nguvhu lezvo.”

14. Hi vhunekisa kuyini hi civhuno ca maKristu-kuloni laha hi timiselako zvikarato? (Wona ni mufota.)

14 Lezvi u nga mahako. Laha u timiselako u nga ti tsawukanisi ni vamakabye va wena va maKristu. U nga chavi ku kombela madhota lezvaku ma ku vhuna. Wona ma ngava ‘wutumbelo ka moya ni wuchavelo ka cingulo’. (Isa. 32:2) Alakanya kambe lezvaku a maKristu-kuloni wonawu ma timisela zvikarato. A ku va mahela zvilo zva zvinene a van’wani va lavako ku vhuniwa zvi nga ku vhuna a ku simama uva ni kuringanisela ni mawonela ma nene laha u timiselako a cikarato leci u kumanako naco. — Miti. 20:35.

Makabye yaloyi wa mun’we hi mu wonileko ka mufota wu hundzileko a nga tshama lomu ndlwini yakwe hi nguva ya cimumu na a kari a bhula ni kazali ni vanhanyana vabye va vambiri. Laha kusuhani kakwe ku na ni chetengelo ni zvibotorana zva mimuri. A mun’we wa vanhanyana i mu komba mufota a dhezenyarileko wa paradhise.

U nga ti tsawukanisi ni vamakabye (Wona paragrafo 14)c


KUTSUMBA KA HINA

15. A kutsumba ku va vhunisa kuyini lava vo tsumbeka, niku ku mu vhunisile kuyini Jesu? (Mahebheru 12:2)

15 Jehovha i hi nyika kutsumba ko tiya loku ku hi vhunako ku timisela. (Rom. 15:13) Alakanya lezvi a kutsumba ku mu vhunisileko zvona Jesu a ku timisela a siku go bayisa nguvhu ka wontlhe ka ntiro wakwe wa laha misaveni. (Lera Mahebheru 12:2.) Jesu i wa zvi tiva lezvaku a kutsumbeka kakwe ku wa ta maha ku a vito ga Jehovha gi basisiwa. A cin’wani kambe, Jesu i wa zvi xuva nguvhu a ku tlhela ava zvin’we ni Papayi wakwe niku i wa ci rindzela hi mahlo yo pswhuka a cikhati leci a to tira zvin’we ni vamakabye vakwe Mufun’weni wa le tilweni. Hi kufanana, a kutsumba ka hina ka ku hanya kala kupindzuka misaveni yiswa ya Nungungulu ka hi vhuna a ku timisela ni cihi cikarato hi kumanako naco tikweni legi ga Sathani.

16. A kutsumba ku mu vhunisile kuyini a makabye wo kari wa cisati, niku zvini u gondzako ka lezvi a nga wula?

16 Wona lezvi a kutsumba ka Mufumo ku mu vhunisileko zvona a makabye wo kari wa le Rússia, wa ku hi Alla, loyi a nuna wakwe a nga khon’wa a tlhela a vhalelwa na a ha rindzela ku xuxiwa. A cikhati leci lezvo zvi nga humelela, Alla i wulile lezvi: “A ku khongela xungetano hi kutsumba ka hina ka cikhatini ci tako ni ku ehleketa hi kona zvi ndzi vhunile nguvhu. Ndzi zwisisile lezvaku lawa a hi magumo ya zvontlhe. Jehovha i ta hlula a tlhela a hi chachazela.”

17. Hi nga kombisa kuyini kubonga hi kutsumba ka hina ku seketelwako ka Bhibhiliya? (Wona ni mufota.)

17 Lezvi u nga mahako. Ti nyike cikhati ca ku ehleketa hi zvilo zvo hlamalisa nguvhu zva cikhatini ci tako lezvi Jehovha a hi tsumbisako. Ti wone na u hi misaveni yiswa ya Nungungulu u tlhela u ehleketa hi makatekwa lawa u tova nawo. Ni cihi cikarato kuzvilava u kumanako naco zvezvi ci ta woneka na ci hi ca ‘cikhatana ni ku vevuka’. (2 Kor 4:17) A cin’wani kambe, maha zvontlhe u zvi kotako kasi u bhulela van’wani lezvi u zvi kholwako. Alakanyela lezvi zvi va bindzelisako zvona a ku lwisana ni zvikarato tikweni legi ga Sathani na va nga gi tivi a kungo ga Nungungulu ga cikhatini ci tako. U nga vhuxa kutsakela kabye xungetano hi kutsumba ka hina ka cikhatini ci tako hambu loku u va bhulela zvitsongwani basi.

Makabye a kulileko hi tanga a tshamileko lomu ndlwini yakwe kumbheleni ka cimumu a ehleketako hi mufota wa paradhise wu nga lomu ka thableti wakwe. Laha kusuhani kakwe ku na ni chetengelo ni zvibotorana zvotala zva mimuri.

Ti nyike cikhati ca ku ehleketa hi kutsumba ka hina ko saseka ka cikhatini ci tako (Wona paragrafo 17)d


18. Hikuyini hi tsumbako zvitsumbiso zva Jehovha?

18 Andzhako ka ku timisela zviringo zvo tala, Joba i te ngalo ka Jehovha: “Makunu ndza zvi tiva lezvaku wa zvi kota ku maha zvilo zvontlhe niku ci hava ci nga maalakanyweni ya wena u ci tsandzekako ku maha.” (Joba 42:2) Kota lezvi Joba a zvi wonileko hi yece, a ku na nchumu wu nga tsandzekisako a kutatiseka ka kungo ga Jehovha. Lezvo zva hi tiyisa laha hi timiselako. Kasi ku fananisa, hi nga alakanyela a wasati a babyako a nga mbhela ntamu hi lezvi a vadhokodhela vo tala va kalako va nga zvi koti a ku tira a mababyi yakwe. Kanilezvi a cikhati leci a dhokodhela wo kari wa wutlhari ni ku tsumbeka nguvhu a zvi kotako ku zwisisa wubabyi gakwe ni ku tlhamusela lezvi a to mu tirisa zvona, a wasati loye i hefu hambu lezvi zvi to teka cikhati kasi a hanya. A wasati loye makunu wa timisela na a hi ni kutsumba ka kunene nguvhu, a kutsumba ka ku i ta hanya wubabyi gakwe. Hi ndlela yo fana, a kutsumba ka hina ka paradhesi legi gi tako ku hi vhuna a ku timisela.

19. Zvini zvi lavekako kasi hi timisela?

19 Kota hi zvi wonileko, Jehovha wa hi vhuna a ku timisela zvikarato zva hina hi ku tirisa mukhongelo, ni Mhaka yakwe, ni maKristu-kuloni, ni kutsumba ka hina. Loku hi ma londzowota khwatsi a malulamiselo lawa, Jehovha i ta hi khatalela ka zvikarato zvontlhe lezvi hi to kumana nazvo kala ka siku legi a zvikarato zvontlhe zva tiko legi ga Sathani zvi to kala zvi nga ha hi kona. — Filp. 4:13.

JEHOVHA I HI VHUNISA KUYINI KU TIMISELA HI KU TIRISA . . .

  • mukhongelo ni Mhaka yakwe?

  • maKristu-kuloni?

  • kutsumba ka hina?

LISIMU 33 Rula ndzhwalo wa wena ka Jehovha

a Ka ndzima leyi a mavito yo kari ma cicilwe.

b TLHAMUSELO WA MUFOTA: Makabye a khosaheleko a timiselako hi kutsumbeka siku ni siku.

c TLHAMUSELO WA MUFOTA: Makabye a khosaheleko a timiselako hi kutsumbeka siku ni siku.

d TLHAMUSELO WA MUFOTA: Makabye a khosaheleko a timiselako hi ku tsumbeka siku ni siku.

    Mabhuku ya ciTshwa (2000-2025)
    Huma
    Nghena
    • ciTshwa
    • Rumela
    • Ti hlawulele
    • Copyright © 2025 Watch Tower Bible and Tract Society of Pennsylvania
    • Nayo wa matirisela
    • Nayo wa cihundla
    • Privacy Settings
    • JW.ORG
    • Nghena
    Rumela