CIGONDZO 02

A Bhibhiliya gi hi nyika kutsumba ko tsakisa

Ka bhuku go gandliwa

Misaveni yontlhe, a vanhu va kumana ni zvikarato zvi va mahako va karateka, va nga tsaki va tlhela va rila hi kuzwa kubayisa. U tshuka u ti zwisa lezvo wutomini ga wena? Kuzvilava laha u nga kona wa karateka hi kota ya mababyi kutani hi ku felwa hi munhu u mu randzako. U nga ha ti wutisa ku: ‘Xana a zvikarato lezvi zvi ta tshuka zvi mbhela?’ A Bhibhiliya gi hlamula ciwutiso leci hi magezu yo tiyisa.

1. Kutsumba muni loku a Bhibhiliya gi hi nyikako?

A Bhibhiliya gi tlhamusela ku hikuyini ku nga ni zvikarato zvo tala, gi tlhela gi hi byela a mahungu ya manene ya ku zvezvanyana a zvikarato zvontlhe zvi ta mbhela. A zvitsumbiso zva Bhibhiliya zvi nga hi maha hi ‘rindzela zvazvinene, hiva ni kutsumba’. (Lera Jeremiya 29:11, 12.) A zvitsumbiso lezvo zvi nga hi vhuna ku timisela a zvikarato zva hina hi tlhela hi tsaka, zvezvi ni kala kupindzuka.

2. A Bhibhiliya gi tsumbisa wutomi go tshamisa kuyini?

A Bhibhiliya gi wula lezvaku cikhatini ci tako “ku nga ta hava ni kufa, hambu ni hlomulo, kutani kurila, ne kubayisa”. (Lera Kuvhululelwa 21:4.) A zvikarato lezvi zvi xanisako vanhu nyamutlha, zvo kota wusiwana, wubihi, mababyi ni kufa, zvi nga ta hava kona. A Bhibhiliya gi tsumbisa lezvaku a vanhu va ta ti buza hi wutomi kala kupindzuka paradhiseni kwalaha misaveni.

3. U nga tiyisekisa kuyini lezvaku lezvi a Bhibhiliya gi tsumbisako zvi ta maheka?

A vanhu vo tala va rindzela ku a zvilo zvi chukwata ka masiku ma tako, hambulezvo a va tiyiseki ku lezvo hakunene zvi ta maheka. Kanilezvi lezvi a Bhibhiliya gi tsumbisako zvi ta maheka futsi. Hi nga tiyisa kukholwa ka hina hi ku “hlola khwatsi Mitsalo”. (Mitiro 17:11) Laha u yako u gondza Bhibhiliya, u ta zvi kota a ku ti mahela ciboho hi wece ca ku u ta kholwa kutani u nga ta kholwa lezvi a Bhibhiliya gi zvi tsumbisako.

GONDZA ZVI ETA

Wona zvilo zvo kari lezvi a Bhibhiliya gi tsumbisako ku zvi ta maheka cikhatini ci tako. Wona kambe lezvi a zvitsumbiso zva Bhibhiliya zvi vhunisako zvona vanhu nyamutlha.

Mifota yi kombako kuhambana ka lezvi a wutomi gi nga tshamisa zvona zvezvi, ni lezvi gi to tshamisa zvona cikhatini ci tako. A mifota leyi yi tlhela yi kombisiwa kambe lahasi.

4. A Bhibhiliya gi hi tsumbisa ku hanya kala kupindzuka na hi nga ha xaniseki

Wona zvitsumbiso zvi landzelako zva Bhibhiliya. Hi zvihi zvi ku tsakisako nguvhu? Hikuyini?

Lerani mitsalo yi nga ka citsumbiso cin’we ni cin’wani, mu gumesa mu bhula hi zviwutiso lezvi:

A mitsalo leyi ya ku vhuna? U alakanya ku a maxaka ni vanghana va wena vonawu va nga vhuneka hi ku gondza mitsalo leyi?

Hi nga ti alakanyela na u hanya ka misava ya ku

A KU NA MUNHU . . ..	A VANHU VONTLHE . . .
a zwako kubayisa, a khosahalako kutani a fako. — Isaya 25:8.	va wona a maxaka yabye ni vanghana na va vhuxiwa hi ka vafileko va tlhela va hanya laha misaveni. — Johani 5:28, 29.
a babyako kutani a nga limala. — Isaya 33:24; 35:5, 6.	va na ni lihanyo la linene ni ntamu. — Joba 33:25.
a mahelwako kubiha. — Isaya 32:16, 17.	va na ni zvakuga zvo tala, mimiti ya yinene ni mitiro yo tsakisa. — Lisimu 72:16; Isaya 65:21, 22.
a xanisekako hi kota ya tiyimpi. — Lisimu 46:9.	va ti buza hi kurula ka hombe. — Lisimu 37:11.
a xanisiwako hi maalakanyo ya hava. — Isaya 65:17.	va hanya khwatsi kala kupindzuka. — Lisimu 37:29.

N’wanana a nga babya a bharasarako mamani wakwe.

Wanuna a nga khosahele, loyi makunu a nga muswa, a chovhako karinya wo tala hi zvakuga.

5. A zvitsumbiso zva Bhibhiliya zvi nga ku vhuna ku wona wutomi hi ndlela yin’wani

A vanhu vo tala va mbhela ntamu va tlhela va bayiseka hi ku wona zvikarato zvi nga kona lomu tikweni. A vokari va kulula va n’watseka na va zama ku mbheta zvikarato lezvo. Wona lezvi a citsumbiso ca Bhibhiliya caku a zvikarato zvi ta mbhela ci vhunisako zvona vanhu nyamutlha. Bisani VHIDHIO, mu gumesa mu bhula hi zviwutiso zvi landzelako.

VHIDHIO: Ndzi wa lava kulwa ni cihlawulela (4:07)

Mifota yi kombako cipandze ca vhidhio leyi yaku: ‘Ndzi wa lava kulwa ni cihlawulela.’ 1. Hi Rafika na a ha hi n’wanana a khayako algodão ni vanhu va hlonge yakwe. 2. Hi Rafika a tsakako hi ku wona vanhu va tihlonge to hambana na va hanya hi kuzwanana laha a ngaya ka gotsovanyano wa Vakustumunyu va Jehovha hi khati go sangula.

Zvilo muni zva hava zvi nga karata Rafika?
Hambu lezvi zvi nga kala ku hundza, a Bhibhiliya gi mu vhunisile kuyini?

A zvitsumbiso zva Bhibhiliya zvi nga hi vhuna ku hi nga mbheli ntamu hi tlhela hi tsaka hambu loku hi kumana ni zvikarato. Lerani Mavingu 17:22 na Va Le Roma 12:12, mu gumesa mu bhula hi zviwutiso lezvi:

U alakanya ku a ku kholwa lezvi a Bhibhiliya gi tsumbisako zvi nga ku vhuna ku hanya na u tsakile zvezvi? Hikuyini?

A VOKARI VE: “Lezvi a Bhibhiliya gi wulako go mahela ku hi mbuwatela basi.”

Hikuyini zvi nga zvinene a ku hlola hi wece u tiva a lisine la kona?

LEZVI HI NGA GONDZA

A Bhibhiliya ga hi nyika kutsumba gi tlhela gi hi vhuna ku timisela zvikarato hi ku hi tsumbisa wutomi go tsakisa cikhatini ci tako.

Zviwutiso zva kuvhuxeta

Hikuyini a vanhu va lavako kutsumba?
Zvini lezvi a Bhibhiliya gi wulako xungetano hi wutomi cikhatini ci tako?
A ku tiva lezvaku a wutomi gi ta tsakisa cikhatini ci tako, zvi nga ku vhunisa kuyini zvezvi?

Ndzi mbhetile a cigondzo leci hi dhiya:

Zama ku maha lezvi

Lera mavhesi ma nga ka cigondzo leci kasi u zvi tiva khwatsi a zvitsumbiso zva Bhibhiliya.

Zvin’wani:

Your other goal

GONDZA ZVIN’WANI

Wona lezvi a kutsumba ku nga ku vhunisako zvona loku u kumana ni zvikarato.

“Kutsumba — u nga ku kuma kwihi?” (Khindlimuka! wa 22 ka Abril wa 2004)

Wona lezvi a kutsumba ku nga va vhunisako zvona lava va nga ni mababyi yo kala ma nga hundzi.

“Loku u hi ni mababyi yo kala ma nga hundzi — xana a Bhibhiliya gi nga ku vhuna?” (Ndzima yi nga ka jw.org)

A cikhati u sixtirako a muzka lowu, zama ku ti alakanyela, wena ni ngango wa wena na mu ti buza hi wutomi paradhiseni legi a Bhibhiliya gi tsumbisako.

Alakanyela cikhati ci tako (3:37)

Wona lezvi a wutomi ga wanuna wo kari a nga zama ku cica tiko gi nga cicisa zvona laha a nga tiva a zvitsumbiso zva Bhibhiliya.

“A ndza ha ti rwexi ndzhwalo wa ku cica tiko” (A Murindzeli wa 1 ka Julho wa 2013)