MIHLAMULO YA BIBLIA
Hikuyini a kurula ku kalako nguvu laha misaveni?
A kurula laha misaveni ku ta nehiwa ntsena hi mufumo wu zi kotako ku cica a timbilu ta vanhu
A Biblia gi komba zigelo zimbiri za hombe. Xo ranga, hambu lezi a vanhu va zi kotako ku maha zilo zo hlamalisa, a va vangiwako hi ndlela ya ku va zi kota ku kongomisa a mazambo yabye ha voce. Xa wumbiri, a makungo ya vanhu ma tsanzeka hakuva “a tiko gontlhe gi le ntanwini wa loyi wa kubiha,” ku nga Satani Diabolus. Hikwalaho, a vanhu a va zi koti ku neha kurula misaveni. — Gonza Jeremia 10:23; 1 Johani 5:19.
A kutiranza wutsumbu ni makangwa ya vanhu zonawu zi maha xipanze xa kuvumaleka ka kurula misaveni. A kurula laha misaveni ku ta nehiwa ntsena hi mufumo wu zi kotako ku gonzisa vanhu a ku ranza lezi zi lulamileko va tlhela va khatalelana. — Gonza Isaya 32:17; 48:18, 22.
Himani a to neha kurula laha misaveni?
Nungungulu nyamintamu i tsumbisa ku neha mufumo wunwe lowu wu to fumela vanhu vontlhe. Wu ta valeta mifumo ya vanhu. (Danieli 2:44) Jesu, a N’wana wa Nungungulu, i ta fuma kota Hosi ya Kurula. I ta fuvisa wubihi misaveni yontlhe a tlhela a gonzisa vanhu a ndlela ya kurula. — Gonza Isaya 9:6, 7; 11:4, 9.
Na va rangelwa hi Jesu, a vanhu va timiliyoni misaveni yontlhe va sina va tirisa a Mhaka ya Nungungulu, a Biblia, kasi ku gonzisa vanhu a ndlela ya ku hanya hi kurula ni vanwani. Lokuloku, a kurula laha misaveni ku ta anza. — Gonza Isaya 2:3, 4; 54:13.