Hi nga gonza yini ka xigevenga?

A xigevenga lexi hi lavako ku gonza ka xona hi lexi u xi wonako laha ka mufota na xi wulawula na Jesu. A xigevenga lexi xa ti laya hi wubihi ga xona. Xi kombela Jesu xiku: “Nzi alakanye loku u chikele mufunweni wa wena.” Khwatsi hi lezi u zi wonako laha ka mufota, Jesu i wulawula naxo. Wa zi tiva lezi Jesu a xi byelako? — a Jesu o xi tsumbisa lezi: “Hizinene nziku ka wena nyamutlha, u tava na mina Paradiseni.”

U alakanya ku a Paradise lego gi ta tshamisa kuyini? —  Kasi hi kuma a hlamulo wa lisine, a hi wulawule hi Paradise legi Nungungulu a maheleko a wanuna wo sangula ni wasati wo sangula Adamu na Eva. Gi wa hi kwihi a Paradise lego? Gi wa hi le tilweni, kutani gi wa hi laha misaveni? — 

U wula zona loku uku gi wa hi laha misaveni. Hikwalaho loku hi kari hi alakanyela a xigevenga “Paradiseni,” hi fanele ku xi alakanyela na xi hanya kwalaha misaveni a xikhati lexi yi tova paradise. Xana a Paradise lego gi ta tshamisa kuyini? —  A hi zi wone.

Anzhako ka kuva Jehova Nungungulu a mahile a patswa wo sangula wa vanhu, ku nga Adamu na Eva, a Biblia gi wula lezaku i lo va veka ka paradise kwalaha misaveni. Gi wa vitaniwa ‘simu ga Edeni.’ U alakanya ku gi wa tshamisile kuyini a ‘simu ga Edeni’? —  Kunene, gi wa hi wutshamu ga gi nene ni go saseka nguvu kasi ku hanya kona a ku hunza ni gihi wutshamu legi munhu a tshukileko a gi wona nyamutlha!

Hi wahi mawonela ya wena? Xana Jesu i tava laha misaveni zinwe ni xigevenga lexi xi nga ti sola ka zionho za xona? —  Ne, Jesu i ta ngha a hi le tilweni na a fuma kota Hosi ya misava leyi yi tova Paradise. Hikwalaho Jesu i tava zinwe ni xigevenga hi ku xi vuxa hi ka vafileko a tlhela a maha zontlhe zi lavekako kasi xi khatalelwa laha misaveni leyi yi tova Paradise. Hambulezo, hikuyini Jesu a to tsika a munhu a nga hi xigevenga a hanya Paradiseni? —  A hi wone a xigelo xa kona.

Lisine lezaku a xigevenga lexi xi mahile zilo zo biha nguvu. Hambulezo ku na ni vanhu vanwani va tibiliyoni va nga hanya laha misaveni lava vonawu va mahileko zo biha. Kanilezi, a kutala ka vona va mahile zilo zo biha hi ku kala va nga zangi va gonzisiwa xungetano hi Jehova ni lezi a zi lavako ka vona.

Hikwalaho a vanhu lavo, a ku patsa ni xigevenga lexi xi nga wulawula na Jesu laha mhanzeni, va ta vuxiwa va hanya Paradiseni kwalaha misaveni. Va ta gonzisiwa a kuranza ka Nungungulu. Laho hi kona va to kombisa lezaku va mu ranza Jehova ke.

Wa zi tiva ku va ta zi kombisisa kuyini lezo? —  Va ta zi kombisa hi ku maha lezi Nungungulu a zi lavako. A zi ngo to ku tsakisa a ku hanya Paradiseni hi tlhela xikhati xontlhe hiva zinwe ni vanhu va ranzako Jehova va tlhela va ranzana!