Xana hi fanele ku khongela ka vobasa?

A VANHU vo tala va tshuka va kumana ni zikarato laha ka kuza va lava xivuno. Hi kuya hi xikarato xa kona, hi nga ha hlawula ku kombela a xivuno lexo ka munghana loyi hi mu tivako lezaku wa zwela wusiwana niku i na ni wutlhari ga ku lwisana ni xikarato lexo. A kuzwela kakwe wusiwana ni wutlhari gakwe zi mu maha ava munghana wo ranzeka nguvu.

A vokari va nga ha ti zwisa lezo xungetano hi mukhongelo. Wutshanwini ga ku tshinela ka Nungungulu — loyi va nga ha mu wonako na a hunzelele nguvu kutlakuka a tlhela a chavisa nguvu — vona va zi wona na zi olova a ku khongela ka wobasa wo kari. Vona va ti byela lezaku a vobasa va kumene ni minzhingo zinwe ni zikarato lezi a vanhu va kumanako nazo, hikwalaho va ta zwisisa khwatsi a zikombelo zabye. Hi xikombiso, a vanhu va lahlekelweko hi zilo va zi wonako na zi hi za lisima va nga ha hlawula ku khongela ka “Santo” Antônio de Pádua — a nga nduna ya zilo zi lahlekileko kutani zi yivilweko. Loku va kari va khongelela xihari xi babyako, va nga ha hlawula ku khongela ka “São” Francisco de Assis kutani ka “São” Judas Tadeu loku va nga ha tivi ni xo maha hi kota ya nchumu wu lahlekileko.

Makunu, hi nga zi tivisa kuyini lezaku a ku khongela ka vobasa za zwanana ni Mitsalo ke? Kota lezi a mikhongelo ya hina yi nga magezu ma yako ka Nungungulu, handle ko kanakana hi fanele ku tiva lezi: Xana a mikhongelo ya hina ya zwiwa? Niku zi nga va zi nene kambe a ku ti wutisa lezi: I ti zwisa kuyini Nungungulu loku munhu a khongela ka vobasa?

MAWONELA YA BIBLIA XUNGETANO HI KU KHONGELA KA VOBASA

A mukhuwo wa ku khongela ka vobasa wu seketelwa ka gonzo ya Chechi ya Katolika ya lezaku a vobasa va chiketa a mikhongelo ya vanhu ka Nungungulu. Hi kuya hi New Catholic Encyclopedia (Enciclopédia Yiswa ya Katolika), a gonzo leyo yi wula ku “kombela wuxinji ka Nungungulu hi ku tirisa munhu loyi yena Nungungulu a mu wonako na a hi ni fanelo ya ku maha lezo.” Hikwalaho, a munhu a khongelako ka vobasa i maha lezo na a rinzela ku mahelwa wuxinji go hlawuleka hi ku tirisa vona hi kota ya xiyimo xabye xo hlawuleka mahlweni ka Nungungulu.

Xana a gonzo leyo yi kona lomu ka Biblia? A vokari va wula lezaku mupostoli Paule hi yena a nga sangula a gonzo ya ku khongela ka vobasa, ka mapapilo yakwe. Hi xikombiso, na a tsalela maKristu ya le Roma i te ngalo: “Makunu nza mu khongotela, vamakabye, hi Hosi ya hina Jesu Kristu, ni liranzo la moya, lezaku mu hlengela na mina a kulwa hi mikhongelo ka Nungungulu ha mina.” (Va Le Roma 15:30) Xana i wo kombela maKristu-kulobye lezaku ma mu chiketisela a mikhongelo ka Nungungulu ke? Ne ni ku tsongwani. Loku ku wa hi ku lezo za mahiwa, ku wa tava vona va kombelako Paule, loyi a nga hi mupostoli wa Kristu, lezaku a va kombelela. Paule i wo komba lezaku a zi bihangi ku kombela a muKristu-kulori lezaku a hi khongelela ka Nungungulu. Hambulezo, zi hambene nguvu ni ku khongela ka munhu a alakanyelwako a ku ngha a hi le tilweni lezaku a chiketisa a zikombelo za hina ka Nungungulu. Hikuyini?

Ka Ivangeli ya mupostoli Johani, Jesu i ngalo: “Mina nzi ndlela, ni zinene, ni wutomi; a nga kona a tako ka Dadani, loku a ngati ha mina.” (Johani 14:6) I wula lezi kambe: “Kasi ni xihi lexi mu ta nga mu kombela Dadani hi vito ga mina, a fela ku mu nyika xona.” (Johani 15:16) Jesu a nga wulangi ku hi fanele a ku khongela ka yena kasi a ya hi wulawulela ka Nungungulu. Wutshanwini ga lezo, kasi ku a mikhongelo ya hina yi zwiwa, hi fanele ku khongela ka Nungungulu ha Jesu, na ku nga hi munhu munwani.

A xikhati lexi a vapizani va Jesu va nga mu kombela lezaku a va gonzisa ku khongela, Jesu i te ngalo: “Laha mu khongelako wulani, muku: Dada, a vito ga wena a gi hlawuliwe.” (Luka 11:2) Xontlhe xikhati hi khongelako, a hi faneli ku kongomisa a mikhongelo ya hina ka Jesu kutani ka munwani munhu, kanilezi ka Nungungulu wutsumbu. Xana a gonzo leyi yo dlunyateka ya Jesu a yi hi vuni ku wona lezaku a mikhongelo ya hina yi fanele kuya ka Nungungulu hi Jesu Kristu, na ku nga hi ka “wakubasa” kutani munhu munwani?

A mukhongelo wu maha xipanze xa lisima nguvu ka wukhozeli ga hina, niku a ku khozela munhu munwani ahandle ka Nungungulu handle ko kanakana a zi yelani ni lezi a Biblia gi zi gonzisako. (Johani 4:23, 24; Kuvululelwa 19:9, 10) Hikwalaho hi fanele ku kongomisa a mikhongelo ya hina ka Nungungulu ntsena.

XANA U FANELE KU CHAVA KU TSHINELELA NUNGUNGULU?

Ka Kanelo yakwe ya le Xitsungeni Jesu i nyikile a xikombiso xa nwanana a kombelako a zakuga ka papai wakwe. Xana a papai i wa ta nyika ribye a n’wana wakwe wutshanwini ga xibaba? Kutani a nyoka ya wuxungu wutshanwini ga xidluwani? (Mateu 7:9, 10) A papai wa liranzo a nge mahi lezo!

Hi nga ti alakanyela na u hi mupswali ka mufananiso lowu wu lanzelako. A n’wana wa wena i lava ku ku kombela nchumu. Wena na yena mu na ni kuzwanana ka hombe, niku a wu tshuki u mu bohela ximombo. Kanilezi, hi kota ya ku chava lezi u to mu hlamulisa zona, yena i kombela a munhu munwani lezaku a ta ku byela a xikombelo xakwe. U wa ta ti zwisa kuyini? Ahati loku o tirisa a munhu loye a khati ni khati a lavako ku wulawula na wena, na zi wonekisa ku khwatsi i lava ku simamisa zezo? U wa ta gi tsakela a lulamiselo lego ke? Ne ni kutsongwani! A vapswali va nga ni liranzo va lava lezaku a vana vabye va va tshinelela hi kukongoma va tlhela va tlhatlheka a ku kombela ni xihi va xi lavako.

Na a kari a tlhamusela mufananiso wakwe wa n’wana a kombelako zakuga, Jesu i te ngalo ka xidlemo: “Hikwalaho loku nwina, na mu bihile, mu zi tiva ku nyika le’zo saseka ka vanana va nwina, nguvunguvu a Raru wa nwina wa le tilweni a nga ta va nyika zilo zo saseka lava va mu kombelako ke?” (Mateu 7:11) Handle ko kanakana, a mupswali i xuva nguvu a ku mu nyika a za zi nene a n’wana wakwe. A Dadani wa hina wa le tilweni yenawu wa xuva nguvu a kuzwa a tlhela a hlamula a mikhongelo ya hina.

Nungungulu i lava lezaku hi mu tshinelela hi mukhongelo hambu loku hi binziwa hi zihoxo za hina. A nga rumi vanhu lezaku vazwa a mikhongelo ya hina. A Biblia gi hi byela lezi: “Rula a nzhwalo wa wena ka Jehova, i ta ku seketela.” (Tisimu 55:22) Wutshanwini ga ku rinzela ku chiketiselwa zikombelo za hina hi vobasa kutani munhu munwani, hi fanele ku hlakulela a mawonela ma nene xungetano hi Jehova Nungungulu.

A Dadani wa hina wa le tilweni wa khatala hi munwe ni munwani wa hina. I lava ku hi vuna loku hi hi ni zikarato niku wa hi ramba lezaku hi tshinela ka yena. (Jakobe 4:8) A hi kutsakisa ka zona a kuva ni lungelo ga ku tshinela ka Nungungulu wa hina ni Dadani wa hina, loyi a “zwako mikhongelo”! — Tisimu 65:2.