Nyika nguvu lisima a matshamela ya Jehova

1. (a) Matshamela muni ya Jehova lawa a muKristu a tekelako ku ma alakanya? (b) Hi ta vunekisa kuyini hi ku gonza a matshamela ya Nungungulu?

LOKU u alakanya a wumunhu ga Jehova, matshamela muni ma tako maalakanyweni ya wena ke? A kutala ka hina hi alakanya liranzo, kululama, wutlhari, ni ntamu. Hambulezo, ha zi tiva khwatsi lezaku Nungungulu i na ni matshamela yo tala yo naveleka. Kunene, loku hi wo ma xaxameta, hi wa ta kuma yo hunza 40 wa wona, lawa a ginwe ni ginwani gi tlhamuselweko lomu ka mabhuku ya hina. Hi nga alakanya a zilo za lisima lezi u nga wa ta zi tiva xungetano hi Jehova loku u wo gonza a tshamela ginwe ni ginwani gakwe xigonzweni xa wena wutsumbu kutani xa ngango! Hi nga vunekisa kuyini hi xigonzo lexo? U ta ma nyika nguvu lisima a matshamela ya Jehova, a Dadani wa hina wa le tilweni. Kota wuyelo ga kona, laha hi yako hi mu nyika nguvu lisima hi tlhela hi mu tsakela, hi xuva nguvu a kuva hi tshinela kakwe ni ku tlhela hi mu pimanyisa. — Jox. 23:8; Tis. 73:28.

2. (a) Kombisa lezi hi nga engetelisako zona a lisima leli hi nyikako a matshamela ya Jehova.

² Makunu, zi wula yini a “ku nyika lisima” a nchumu wo kari? Maringano ni lezi hi to gi tirisisa zona a gezu legi ka nzima leyi, zi wula ku tiva lisima leli a nchumu lowo wu nga nalo. A lisima leli hi nyikako a nchumu wo kari li nga kula kutsongwani-kutsongwani. Kasi ku kombisa: A lisima leli hi nyikako a zakuga zo kari hi gonzako kuga la kula a xikhati lexi hi zwako kunuhela ka zona, hi khema xiponi hi zi ringa, hi gumesa hi ti bhikela ha hoce. Hi ku fanana, hiya mahlweni hi gi nyika nguvu lisima a tshamela go kari ga Jehova a xikhati lexi hi yako hi gi tiva khwatsi, hi ehleketa hi lezi a gi kombisisako zona, ni laha hi mu pimanyisako wutomi ga hina. (Efe. 5:1) A kungo ga nzima leyi ni ga leti ta timbiri ti lanzelako, ku hi vuna a kuya mahlweni hi nyika nguvu lisima a matshamela manwani ya Nungungulu lawa kuzilava hi nga toloveliko ku ehleketa hi wona. Ka ginwe ni ginwani, hi ta lava ku tiva lezi: Gi wula yini a tshamela lego? Xana Jehova i gi kombisisa kuyini? Niku hi nga mu pimanyisisa kuyini kukombiseni ka tshamela lego?

JEHOVA WA TSHINELELEKA

3, 4. (a) Hi mawonela ya wena, a munhu wa kutshineleleka hi loyi wa kuyini? (b) Xana Jehova i hi tiyisekisa kuyini lezaku wa tshineleleka?

³ A kusangula a hi bhuleni hi tshamela ga kutshineleleka. Hi mawonela ya wena, a munhu wa kutshineleleka hi loyi wa kuyini? U nga haku, ‘Munhu wa mu nene, u mu kumako xontlhe xikhati, ni ku tshama na a longile ku bhula.’ A kutala ka zikhati, u nga zi pola lezaku a munhu wa tshineleleka kutani a nga tshineleleki hi kuzwa lezi a zi wulako ni ku wona lezi a miri wakwe wu zi wulako — kutihenyahenya ka miri, nghohe yakwe, ni zinwani a to zi wula na a nga vululi nomu.

⁴ Xana Jehova i zi kombisa kuyini a ku wa tshineleleka? Hambu lezi a nga yena Muvangi wa ntamu-wontlhe wuakweni gontlhe, Jehova i hi tiyisekisa lezaku i ti yimisele, niku i xuva nguvu a kuzwa ni ku hlamula mikhongelo ya hina. (Gonza Tisimu 145:18; Isaya 30:18, 19.) Hi nga wulawula na Nungungulu hi mbheta xikhati lexi hi xi lavako ni ka gihi wutshamu. Hi nga tshinela kakwe na hi tlhatlhekile, na hi tiyiseka lezaku a nga ta tshuka a hi kawuka hi kota ya lezo. (Tis. 65:2; Jak. 1:5) A Mhaka ya Nungungulu yi wulawula hi Jehova na yi mu fananisa ni munhu wa nyama kasi ku komba lezaku i lava ku tshinelelwa. Hi xikombiso, Davida a mutsali wa tisimu i tsalile lezaku “a mahlo ya Jehova ma tshonometa” hina, ni lezaku ‘a canja gakwe ga xinene ga hi seketela.’ (Tis. 34:15; 63:8) Muprofeti Isaya i fananisile Jehova ni murisi, aku: “I ta tsombanyisa a tiyivana mawokweni yakwe, a ti rwala laha xifuveni xakwe, a fambisa khwatsi leti ti anwisako.” (Isa. 40:11) Hi nga alakanya! Jehova i lava lezaku hi tshinela kakwe khwatsi i yivana yi wukarelweko xifuveni xa murisi wa yona wo khatala. Hi nga wona a kutshineleleka ka Dadani hi nga naye! Hi nga mu pimanyisisa kuyini Jehova mhakeni leyi?

TSHAMELA GA LISIMA NGUVU

5. Hikuyini zi nga za lisima lezaku a madota ma tshineleleka?

⁵ Ka masikwana ma ha hi ku hunzako, ku lo wutisiwa a Timboni to hiseka ti hanyako matikweni yo tsalangana lezaku, “i tshamela muni u gi nyikako nguvu lisima ka dota?” A kutala ka vona va lo hlamula vaku: “Ku tshineleleka.” Hi lisine, a muKristu munwe ni munwani i fanele ku ti karatela kuva ni tshamela lego hi kumbhelela, kanilezi za lisima nguvu ka madota lezaku mava yo tshineleleka. (Isa. 32:1, 2) Na a tlhamusela ku hikuyini a ka yena a tshamela legi gi nga ga lisima nguvu, a makabye wo kari wa xisati i te ngalo: “Ntsena loku a dota gi hi go tshineleleka hi kona hi to vuneka hi matshamela manwani ya ma nene lawa kuzilava gi nga nawo.” A magezu lawa hakunene nja lisine. Xini xi mahako munhu lezaku a tshineleleka?

6. Hi wihi nchumu wo ranga wu lavekako kasi a munhu a tshineleleka ke?

⁶ A xo ranga kasi a munhu a tshineleleka ku khatala hi vanwani. Loku a dota gi khatalela vanwani gi tlhela gi ti tsitsirita hi kota ya vona, a vamakabye va gona va xinuna ni va xisati, a ku patsa ni vanana, va ta gi wona a tshamela legi. (Mar. 10:13-16) Carlos wa 12 wa malembe i ngalo: “Nza wona madota lomu Salawini na ma nwayitela ni ku kombisa wunene, niku nza xalala nguvu loku nzi ma wona na ma maha lezo.” Kunene, a kuva dota gi wula ntsena lezaku ga tshineleleka a hi zona basi zi lavekako; gona gi fanele ku zi kombisa hi mitiro. (1 Joh. 3:18) Gi nga zi mahisa kuyini?

7. Hikuyini a ku boha karaxa ga gotsovanyano a kutala ka zikhati zi tlhotlhako mabhulo, niku hi gonza yini ka lezo ke?

⁷ Hi nga ehleketa hi kuecanyisa loku. Ka masikwana ma ha hi ku hunzako, a makabye wo kari a nga enzile a ya wona gotsovanyano matiko-wundle i lo khilela xihaha-pfhuka kasi a wuya kaya na a ha bohile karaxa gakwe ga gotsovanyano. A xikhati lexi a mutiri wo vuna vaenzi nzeni ka xihaha-pfhuka a nga wona karaxa gakwe gi nga hi ni magezu “A wute Mufumo wa Nungungulu!” i te ngalo ka makabye wa hina, “A wute futsi — nzi lava ku hi bhula zinwani xungetano hi mhaka leyi.” Hi nzhako ka xikhati, va lova ni mabhulo niku a mutiri loyi wo vuna vaenzi lomu nzeni ka xihaha-pfhuka i lo amukela marevista ya hina. A kutala ka hina hi vile ni matshango yo fana ni legi. Makunu, hikuyini a karaxa ga gotsovanyano gi talako ku tlhotlha mabhulo? Gi tlhotlha mabhulo hakuva hi lisine, gi byela vanhu giku: “Tshinela ka mina. Nzi wutisi ku nziya kwihi.” A karaxa xikombiso xo dlunyateka xi byelako vanhu lezaku hi longile ku va bhulela lezi hi zi kholwako. Hi ku fanana, a madota ya maKristu ma fanele ku nyika xikombiso xo dlunyateka ka vamakabye vabye xaku: “Hi mina loyi makabye, tana!” Hi zihi a zikombiso lezo?

8. Xana a madota ma kombisa kuyini a kukhatala hi vanwani, niku a vamakabye laha bandleni va ti zwisa kuyini loku ma maha lezo?

⁸ Lisine lezaku a midawuko ya vanhu ya hambana, kanilezi hi tolovelo loku hi hlekela vamakabye va hina va xinuna ni va xisati, hi va hoyozela hi ku va khoma mandla, hi tlhela hi va losa na hi nga djahangi, hi va komba lezaku ha khatala hi vona. Himani a faneleko ku ranga hi yena a maha lezo ke? Wona a xikombiso xa Jesu. Mateu i bika lezaku ka mutlhangano wo kari lowu a nga hi ni vapizani vakwe, “Jesu i lo tshinela ka vona.” (Mat. 28:18) Hi ku fanana, a madota inyamutlha hi wona ma rangako ma tshinelela a vamakabye vabye ma tlhela ma bhula navo. Xana a vamakabye laha bandleni va ti zwisa kuyini loku a madota ma maha lezo ke? A makabye wa xisati wa phayona a nga ni 88 wa malembe i te ngalo: “A mahleko ni mabhulo yo tiyisa hlana lawa nzi tolovelako kuva nawo ni madota a xikhati lexi nzi nghenako lomu Salawini ya Mufumo, zi nzi maha nzi va ranza nguvu.” A makabye munwani wa xisati wo tsumbeka i lo engeta aku: “Zi nga wonekisa ku khwatsi a hi za nchumu, kanilezi loku a dota gi nzi hoyozela mitlhanganweni na gi nwayitela, zi na ni lisima nguvu ka mina.”

KUTSHINELELEKA NI KU TI NYIKA XIKHATI

9, 10. (a) Xikombiso muni xa xi nene lexi Jehova a xi nyikako? (b) Hi yihi ndlela ya kuva a madota ma komba lezaku ma tshineleleka?

⁹ Zi la su dlunya lezaku a hi nge tshineleleki loku hi nga ti nyiki xikhati. Jehova i nyika xikombiso xi nene mhakeni leyi. ‘A nga kule ka munwe ni munwani wa hina.’ (Miti. 17:27) A yinwe ya tindlela ta ku a madota ma kombisa kutshineleleka ka wona ku ti nyika xikhati mahlweni ni nzhako ka mitlhangano ya bandla lezaku ma bhula ni vamakabye vabye va xinuna ni va xisati — vanana ni vahombe. A makabye wa xinuna a nga phayona i lo wula lezi: “A xikhati lexi a dota gi nzi wutisako ku zo yini, gi tlhela gi nyima kasi kuzwa hlamulo wa mina, nzi tizwa na nzi hi wa lisima.” A makabye munwani wa xisati loyi a tirelako Jehova hi xipimo xa 50 wa malembe i lo wula magezu lawa: “A madota lawa ma ti nyikako xikhati ma bhula na mina anzhako ka mitlhangano, ma nzi maha nzi tizwa na nzi hi wa lisima.”

¹⁰ Ha zi tiva lezaku a varisi va maKristu va fanele ku khatalela mitiro yinwani. Hambulezo, a kungo gabye go ranga mitlhanganweni ya bandla gi fanele kuva ku khatalela tiyivu.

JEHOVA A NGA NA XIHLAWULELA

11, 12. (a) Zi wula yini a ku ngavi na xihlawulela? (b) Xana Jehova xikombiso xa ku ngavi na xihlawulela ka hina hi ndlela muni?

¹¹ A ku ngavi na xihlawulela i tshamela ginwani ga Jehova go naveleka. Zi wula yini a ku ngavi na xihlawulela ke? A ku ngavi na xihlawulela zi wula kuva wo lulama, u ngayi hi nghohe. A ku ngavi na xihlawulela ka lisine ku patsa zilo zimbiri: matshamela ni mitiro. Hikuyini ku lavekako a zilo lezi za zimbiri? Hakuva ntsena loku munhu a nga hi na xihlawulela mahanyeleni yakwe hi kona a to zi kota ku va mahela kululama a vanhu vontlhe a nga hlawuli nghohe. Ka Mitsalo ya xiGreki ya wuKristu, a gezu “ku ngavi na xihlawulela” hi kukongoma gi wula ku, “muvumeli wa tinghohe,” zi wulako ku nga hlawuli a nghohe ya munhu. (Miti. 10:34) Hikwalaho, a munhu loyi a nga hiko na xihlawulela i ta khoma munhu kota munhu futsi, a nga cuwuki lezi a nga tshamisa zona kutani lezi a nga nazo.

¹² Jehova hi yena a nga xikombiso xa hombe ka zontlhe xa ku ngavi na xihlawulela. A Mhaka yakwe yi ngalo ‘a nga na xihlawulela’ ni lezaku ‘a nga hlawuli nghohe ya munhu.’ (Gonza Mitiro 10:34, 35; Deuteronome 10:17.) A lisine leli li dlunyatiswa khwatsi hi mhaka yo kari yi nga humelela masikwini ya Mosi.

13, 14. (a) Xikarato muni lexi a ntlhanu wa vanhanyana va Zelofehade va kumeneko naxo? (b) Xana Jehova i kombisile kuyini a ku ngavi na xihlawulela?

¹³ Xikhatanyana mahlweni ka kuva a vaIsraeli va nghena Tikweni ga Xitsumbiso, a ntlhanu wa vanhanyana vakamakabye va nga chadangiko va lo kumana ni xikarato. Xikarato muni? Va wa zi tiva lezaku, a ku fana ni mingango leyi yinwani ya vaIsraeli, a ngango wabye wu wa ta nyikwa xipanze xa tiko kota tshomba ya vararu vabye. (Mitse. 26:52-55) Hambulezo, a papai wabye Zelofehade, wa nyimba ya ka Manasa i wa file. Hi kuya hi nayo, loyi a nga wa tava ni fanelo ya ku kuma xipanze lexi xa tshomba ya tiko ku wa tava mufana wa Zelofehade. Kanilezi, Zelofehade i wova ni vanhanyana basi. (Mitse. 26:33) Kota lezi Zelofehade a nga hi hava mufana, xana a tshomba leyi ya ngango yi wa ta nyikelwa ka maxaka yabye zonake a vanhanyana vakwe va nga nyikiwi a tshomba ya ngango wabye ke?

¹⁴ A vanhanyana lava va ntlhanu va loya ka Mosi va yaku kakwe: “Xana a vito ga raru wa hina gi ta fuva lomu ka yindlu yakwe hi kota ya lezi a nga kala ku siya a [mufana] ke?” Va lo kombela vaku: “Hi nyikeniwo a tshomba xikari ka vamakabye va raru wa hina.” Xana Mosi i va hlamulile ku: ‘A nzi nge mahi zinwani zo hambana ni lezi a nayo wu wulako’ ke? Ahihi. “Mosi i lo yisa a mhaka yabye mahlweni ka Jehova.” (Mitse. 27:2-5) I kumile yini? Jehova i te ngalo ka Mosi: “A vanhanyana va Zelofehade va wula zona. U ta va nyika tshomba xikari ka vamakabye va raru wabye, u va avela a tshomba ya raru wabye.” Jehova a nga nyimangi laho. I lo byela Mosi lezaku a tsala magezu lawa kasi mava nayo, aku: “Loku munhu afa a nga siyangi [mufana], a tshomba yakwe mu ta nyika a nhanyana wakwe.” (Mitse. 27:6-8; Jox. 17:1-6) Kusukela kwalaho, a vavasati vontlhe va vaIsraeli lava va nga tshuka vava ka xiyimo lexi va wa ta vikelwa hi Nayo.

15. (a) Xana Jehova i va khomisa kuyini vanhu vakwe, nguvunguvu lava va nga hava munhu wo va vikela? (b) Hi wahi matimu manwani ya Biblia lawa ma kombako lezaku Jehova a nga na xihlawulela?

¹⁵ Kunene, a xiboho lexi xi kombile lezaku Nungungulu mu nene niku a nga na xihlawulela! Jehova i va nyikile wudzunzo a vavasati lava va nga hi hava munhu wo va vikela a ku fana ni vaIsraeli lava va nga hi ka matshamela ma nene. (Tis. 68:5) A matimu lawa mova xikombiso ntsena xa matimu yo tala ya Biblia lawa ma dlunyatisako a lisine leli lo khumba mbilu: Jehova a nga na xihlawulela xikari ka malanza yakwe. — 1 Sam. 16:1-13; Miti. 10:30-35, 44-48.

HI NGA MU PIMANYISA JEHOVA

16. Hi yihi ndlela ya ku fuvisa xihlawulela?

¹⁶ Hi nga mu pimanyisisa kuyini Jehova mhakeni ya ku nga hi na xihlawulela ke? Tiva lezaku a ku nga hi na xihlawulela ku patsa zilo zimbiri. Ntsena loku hi nga hi na xihlawulela hi kona hi to tirisana ni vanhu na hi nga hlawuli nghohe. Hi lisine, hontlheni hi ranza ku ti byela lezaku a hi na xihlawulela. Hambulezo, wa zi tiva khwatsi lezaku a hi xikhati xontlhe zi olovako ku ti hlola lezi hi ti zwisako zona na hi hi ni kungo ga ku chukwatisa laha zi lavekako. Makunu, xini hi faneleko ku maha kasi hi tiva a tshamela ga hina? A xikhati lexi Jesu a nga lava ku tiva lezaku a vanhu ve hi yena mani, i lo wutisa a vanghana vakwe lava a nga va tsumba, aku: “A vanhu ve ngalo, hi yena mani a N’wana wa munhu?” (Mat. 16:13, 14) Hikuyini u nga pimanyisiko Jesu mhakeni leyi? U nga ha wutisa munghana wa wena loyi u zi tivako ku i ta ku byela lisine laku u na ni xihlawulela ni ku a wu naxo. Loku a ku byela lezaku zi wonekisa ku khwatsi u na ni nzhohwana ya xihlawulela, ni ku wa cuwuka tinghohe ta vanhu, zini u faneleko ku maha? Khongela ka Jehova hi mbilu yontlhe xungetano hi tshamela legi ga hava, u mu kombela lezaku a ku vuna ku gi fuvisa kasi u mu pimanyisa hi kumbhelela mhakeni ya ku ngavi na xihlawulela. — Mat. 7:7; Kol. 3:10, 11.

17. Hi tihi tindlela ta ku komba lezaku a hi na xihlawulela?

¹⁷ Lomu bandleni ga wuKristu, hi kombisa lezaku hi lava ku pimanyisa Jehova mhakeni ya ku ngavi na xihlawulela hi ku nyika wudzunzo ni ku kombisa wunene ka vamakabye vontlhe va xinuna ni va xisati. Hi xikombiso, mhakeni ya ku rurela vapfhumba, hi fanele ku ramba vamakabye va hina va tixaka tontlhe, a ku patsa ni lava a mudawuko wabye wu hambeneko ni wa hina, zinwe ni zisiwana; lava felweko hi vapswali, hi nuna kutani sati. (Gonza Va Le Galatia 2:10; Jakobe 1:27.) Tlhatakumbiri, loku hi hi ntirweni wa kuxumayela Mufumo, hi komba lezaku a hi na xihlawulela hi ku xumayela vanhu va midawuko yontlhe, a ku patsa ni lava va tako hi matiko-wundle. A hi kutsakisa ka zona lezi hi nga ni mabhuku ma seketelweko ka Biblia hi xipimo xa 600 wa tirimi. Kunene, lexo xikombiso xo dlunyateka xa ku nga hi na xihlawulela!

18. U ta zi kombisa kuyini lezaku wa nyika nguvu lisima a matshamela ya Jehova ya kutshineleleka ni ku nga hi na xihlawulela ke?

¹⁸ Hakunene, loku hi ti nyika xikhati hi alakanyela hi lezi Jehova a tshinelelekisako zona ni ku ngahi na xihlawulela, a liranzo la hina ha yena la kula. A xikhati lexi a liranzo leli li kulako, li fanele ku hi susumeta lezaku hi pimanyisa matshamela ya Jehova hi kumbhelela, hi ma kombisa kuhanyisaneni ka hina ni maKristu-kulori zinwe ni ka vanhu lava hi va xumayelako.