MIHLAMULO YA BIBLIA

Nungungulu wa ingisela mikombelo ya vanhu vontlhe ke?

Nungungulu wa ingisela a vanhu va matiko wontlhe. (Tisimu 145:18, 19) A mhaka yakwe, a Biblia, ya hi kuca ku wulawula naye xungetano hi timhaka tontlhe ti hi karatako. (Va Le Filipi 4:6, 7) Hambulezo, a nga tsakisiwi hi mikombelo yontlhe. Hi xikombiso, a nga tsakisiwi hi mikombelo yi vekilweko hlokweni kutani yi tsalilweko ka mabhuku. — Gonza Mateu 6:7.

Xinwani kambe, Jehova a nga tsakisiwi hi mikombelo ya vanhu va kanyisako a nayo wakwe ha womu. (Mavingu 28:9) Hi xikombiso, xikhatini xa kutsaliwa ka Biblia, Nungungulu i alile ku ingisela vaIsraeli lava va nga hi ni nanzu wa nkhata. Zi la su dlunya lezaku kasi Nungungulu a hizwa, ku na ni zilo zo kari hi faneleko ku maha. — Gonza Isaya 1:15.

Zini hi faneleko ku maha kasi Nungungulu azwa mikombelo ya hina?

A ku na ndlela ya ku Nungungulu a ingisela mikombelo ya hina loku hi nga kholwi. (Jakobe 1:5, 6) Hi fanele ku kholwa lezaku i kona niku wa khatala hi hina. Hi nga tiyisa a kukholwa ka hina hi ku gonza a Biblia, hakuva a kukholwa ku seketelwa ka zilo zo dlunyateka ni zitiyisekiso zi nga lomu ka Biblia. — Gonza Maheberu 11:1, 6.

Hi fanele ku ti koramisa hi tlhela hi maha mukombelo hi mbilu yontlhe. Hambu Jesu, a N’wana wa Nungungulu, i wa ti koramisa loku a maha mukombelo. (Luka 22:41, 42) Hikwalaho, wutshanwini ga ku byela Nungungulu lezi a faneleko ku maha, hi fanele ku zama ku tiva milayo yakwe hi ku gonza a Biblia. Loku hi maha lezo, hi kona hi to zi kota ku maha mikombelo yi zwananako ni kuranza ka Nungungulu. — Gonza 1 Johani 5:14.