“A vanhu vo tala va wa nzi nyenya”

KALE KA MINA:

Nzi kulele doropeni ga Santiago, le Chile, ka xipanze xi nga tele hi vadzahi va timbangi, maninja, ni wugevenga. Papai wa mina i lo dawa na nzi hi ni ntlhanu wa malembe. Anzhako ka lezo, mamani i lo hanya ni wanuna wa xapi. I wa tshama hi ku hi fumbutela. Ni zalezi nza ha ti alakanya a tixanisa leti hi ngava nato ka malembe lawo.

Laha nzi ngaya nzi kula, nzi lo tekelela mahanyela yo biha hi kuva munhu wa xapi ya hombe nguvu. Nzi wa ingisela wucenje ga rock, nzinwa ku hunza mpimo, nzi tlhela nzi dzaha mbangi ka zikhati zinwani. Nzi wa tolovela kulwa zibhakela lomu maruweni ni vaxavisi va timbangi, lava a kutala ka zikhati va nga zama ku nzi daya. Ka khati go kari, a ntlawa wo kari wa zigevenga hi nga zondana, wu lo nzi xavela xigevenga xa nduma lezaku xi nzi daya. Nzi zi kotile ku pona, kanilezi xi nzi tlhavile hi mukwana. Ka khati ginwani, a ntlawa wo kari wa vaxavisi va timbangi va lo nzi tlhateka pistola laha ka hloko zonake va zama ku nzi tlimba.

Hi 1996, nzi lo ranzana ni wasati waku hi Carolina, hi chada hi 1998. A xikhati hi nga pswala n’wana wa hina wo sangula, nzi wa chava ku tshuka nzi fana ni nuna loyi a nga tekene na mamani, nzi xanisa a ngango wa mina hi kota ya mahanyela ya mina ya xapi. Hikwalaho, nzi lo kombela xivuno ka xipitali xa ku vuna vanhu a ku tsika mahanyela ya hava. Va zamile ku nzi tira, va nzi nyika mimuri yo kari, kanilezi a zi vunangi nchumu. Nzi wa ha simama ku zangariswa hi nchunwanyana wa wu tsongwani; nzi wa nga zi koti ku ti khoma. Nzi lo ti karata hi ndlela ya hava a ku tsika ku xanisa a ngango wa mina, nzi zama ku ti sunga. Lexi xi tsakisako hi ku a nzi zi kotangi.

Nzi wa hi ni malembe yo tala na nzi nga kholwi ka Nungungulu, kanilezi makunu nzi wa zi lava ku kholwa. Hikwalaho nzi lo sangula kuya ka chechi yo kari hi xikhatanyana. Ka xikhati lexo, a sati wa mina i wa kari a gonza Biblia ni Timboni ta Jehova. A Timboni nzi wa ti venga niku nzi wa tolovela ku ti rukatela. Kanilezi ka makhati wontlhe, tona ti wa hlamula khwatsi, ku nga lezi nzi nga kala nzi nga zi rinzeli.

Ka siku go kari, Carolina i lo nzi kombela ku lera a bhuku ga Tisimu 83:18 lomu ka Biblia ga mina wutsumbu. A vesi lego gi wula ziku dlunya lezaku a vito ga Nungungulu hi Jehova. Nzi hlamalile hi ku wona lezaku a chechini ka mina va wa wulawula hi nungungulu, kanilezi va wa nga tshuki va wulawula hi Jehova. Kusanguleni ka lembe ga 2000, minawu nzi lo sangula ku gonza Biblia ni Timboni.

LEZI A BIBLIA GI NGA CICISA ZONA A WUTOMI GA MINA:

Laha nzi ngaya nzi gonza a Biblia, nzi tiyisilwe nguvu hi ku tiva lezaku Jehova i Nungungulu wa tipswalo niku wa tsetselela. Hi xikombiso, ka Eksodusi 34:6, 7, a Biblia gi wulawula hi Jehova kota “Nungungulu wa wuxinji ni tipswalo, loyi a nonokako ku zangara, loyi a teleko hi wuxinji ni kutsumbeka; loyi a nga ni wuxinji ka khume ga mazana, loyi a tsetselelako munhu wa kubiha, ni wa kuhambuka ni kuonha.”

Hambulezo, zi wa nga olovi a ku hanya hi lezi nzi nga zi gonza. Nzi wa ti byela lezaku nzi nga ta ha tshuka nzi zi kota ku ti khoma mahanyeleni ya mina ya xapi. Khati ni khati nzi nga tsanzeka ku ti khoma, Carolina i wa nzi tiyisa hlana hi ndlela ya liranzo. I wa nzi alakanyisa lezaku Jehova wa ku wona a kutikarata ka mina. A xivuno xakwe xi wa nzi nyika ntamu wa ku simama nzi ti karatela ku tsakisa Jehova, hambu lezi ka zikhati zinwani nzi nga zi wonisa ku khwatsi nzi wa nga ta tshuka nzi zi kota.

Ka siku go kari, Alejandro, a mugonzisi wa mina wa Biblia i lo nzi kombela ku gonza Va Le Galatia 5:22, 23. A mavesi lawa ma komba lezaku a mbhanzu wa moya wa ku basa “liranzo, ni kutsaka, ni kurula, ni kutimisela, a wunene, ni kusasa, ni kutsumbeka, ni kuolova, ni kutikhoma.” Alejandro i lo tlhamusela lezaku a kuva nzi kombisa matshamela lawa wutomini ga mina a zi le ntanwini wa mina ntsena, kanilezi zi koteka hi ku vuniwa hi moya wa Nungungulu. A lisine lelo li cicile a mawonela ya mina!

Hi nzhako ka xikhati, nzi loya ka gotsovanyano wa Timboni ta Jehova. A kutshamiseka, basiselelo, ni kuzwanana loku nzi ku wonileko ka mutlhangano lowo zi nzi mahile nzi tiyiseka lezaku nzi kumile a wukhongeli ga lisine. (Johani 13:34, 35) Nzi lo bapatizwa hi Fevereiro wa 2001.

LEZI NZI NGA VUNEKISA ZONA:

Nzi wa hi munhu wa xapi kanilezi Jehova i nzi cicile nzi maha munhu wo rula. Nzi ti zwisa ku khwatsi i no nzi humesa ka nkele wa chaka nzi nga wele ka wona. A vanhu vo tala va wa nzi nyenya, niku a nzi va nyiki nanzu. Kanilezi, zalezi nzi tirela Jehova hi kurula zinwe ni sati wa mina ni vana va hina va vambiri.

A maxaka ya mina ni vanghana lava nzi nga hlakana navo kale va hlamala nguvu hi lezi nzi nga cicisa zona. Kota wuyelo ga lezo, a kutala kabye va tsakela ku gonza a lisine la Biblia. Nzi na ni lungelo kambe ga ku vuna vanwani lezaku va tiva Jehova. A zo ku tsakisa ku wona a lisine la Biblia na li cica a wutomi ga vonawu!