A wutomi ga mina gi waya gi biha nguvu

KALE KA MINA: Nzi kulele doropeni ga Los Angeles, le Califórnia, Estados Unidos.

A kutala ka maruwa ya lomu nzi nga hanya kona ma wa tiveka nguvu hi kuva ni zigevenga ni vadzahi va timbangi. A vapswali va mina va wa hi ni 6 wa vana, mina nzi wa wumbiri.

Mamani i hi wundlile kota ziro za chechi yi vitaniwako ku Igreja Evangélica. Hambulezo, a xikhati nzi nga hi muswa, nzi wa hanya wutomi gimbiri. Hi tiSonto nzi wa yimbelela zinwe ni ntlawa wa vayimbeleli le chechini. Ka masiku lawa manwani ya viki, nzi wa tshama mibuzweni, nzi dzaha timbangi yi nga chayi, ni ku maha wubhayi.

Nzi wa hi munhu wa xizangazangani ni wa tiholova. Loku hi holovisana, nzi wa tirisa ni xihi kota tlhari kasi nzi hlula. Lezi nzi nga zi gonza le chechini zi wa nga nzi vuni nchumu. Nzi wa ti byela lezi: “A kuphota ku lumba Hosi — niku i tirisa mina kasi ku mu photela!” Laha nzi nga gonza ka xikola sekundaria kwalomo ka va 1960, nzi lo kucetelwa nguvu hi ntlawa wu nga vitaniwa ku Panteras Negras — ku nga hi ntlawa wa politika wu nga tirisa zibhamu kasi ku lwela tifanelo ta vanhu. Nzi lo ti patsa ni ntlawa wa zigonzani zo kari zi nga lwela tifanelo ta vanhu. Hi wa tolovela ku vuxa zitereka, niku khati ni khati, a xikola xi wa valiwa hi xikhati xo kari.

Zi wa wonekisa ku khwatsi a zitereka zi wa nga timi a tora ga mina ga ku ranza tiholova. Hikwalaho, nzi lo sangula ku ti patsa ni vanwani hi maha wugevenga hi kota ya livengo. Hi xikombiso, ka khati go kari mina ni vanghana va mina hi lo hlalela a filme gi nga kombisa zimaho za kale za kuxanisiwa ka tikhumbi ta le Afrika, le Estados Unidos. Hi ku zangarisiwa hi wubihi lego, hi lo sangula kuba majaha ya hlonge yo basa lawa ma nga hi kwalomo hi nga hlalela kona mafilme. Hi lo gumesa hiya mitini ya laha kusuhani hi ya lava vanhu vanwani va hlonge yo basa kasi hiba.

Laha nzi ngaya nzi maha wa hombe, mina ni makabye wa mina hi wa maha wugevenga go tala go tshisa. Hi wa tshama hi ku xuxisiwa timhaka hi maphoyisa. A yinwe ya tinzisana ta mina yi wa hi xiro xa ntlawa wa zigevenga za ndhuma, niku nzi lo ti patsa navo. A wutomi ga mina gi waya gi biha nguvu.

LEZI A BIBLIA GI NGA CICISA ZONA A WUTOMI GA MINA:

Nzi wa hi ni munghana wo kari loyi a vapswali vakwe va nga hi Timboni ta Jehova. Va lo nzi ramba kuya mitlhanganweni yabye ya bandla, zonake nzi vumela. Ka siku galego go sangula, nzi lo tekela ku wona a kuhambana ka Timboni ta Jehova ni vanhu laha va yileko. Vontlhe va wa hi ni maBiblia va tlhela va ma tirisa mitlhanganweni leyo. Hambu a vanana, va wa veka tikanelo nzeni ka mitlhangano leyo! Nzi lo khumbiwa nguvu hi ku tiva lezaku Nungungulu i na ni vito, Jehova, ni ku gizwa na gi tirisiwa. (Tisimu 83:18) A bandla gi wa wumbiwa hi vanhu va matiko yo hambanahambana, kanilezi zi wa hi laha kubaseni lezaku ku wa nga hi na xihlawulela xa hlonge.

Kusanguleni, nzi wa nga zi lavi ku gonza a Biblia ni Timboni, kanilezi nzi wa tsakisiwa hi kuya mitlhanganweni ya tona. Ka wusiku go kari, na nzi hi mitlhanganweni ya Timboni, a ntlawa wa vanghana va mina wu loya ka xipetakulo xo kari. Na va hi kwaseyo va loba a muswa wo kari kala afa, hi kota ya lezi a nga kari a ala ku va nyika bhaji gakwe ga xikhumba. Ka siku gi nga lanzela, va lo ti dzunza hi lezi va nga zi mahile. Hambu a xikhati lexi va nga kari va lamuliwa le hubyeni, va wa nga wu woni na wu hi nchumu wa hombe lowu va nga wu mahile. A kutala kabye va lo konelwa ku fela paxweni. A zizi zi lava ku nzi wula lezaku nzi tsakile nguvu hi lezi nzi nga kala nzi nga hi navo ka wusiku lego! Nzi lo maha xiboho xa ku cica wutomi ga mina zonake nzi sangula ku gonza a Biblia.

Kota lezi nzi nga kula xikari ka xihlawulela xa hombe xa hlonge, lezi nzi nga zi wona xikari ka Timboni, zi nzi hlamalisile nguvu. Hi xikombiso, nzi wonile a Mboni yo kari ya mulungu yi nga enza yiya matiko-wundle yi siya vana va yona va hlayisiwa hi ngango wo kari wa valandi. A ngango wunwani kambe wa valungu wu vumelele a jaha go kari ga mulandi gi nga vumala ko tshama lezaku gi tshama laha kaya kabye. Nzi lo tiyiseka lezaku a Timboni ta Jehova ti fanelwa khwatsi hi magezu ya Jesu ma tsalilweko ka Johani 13:35, ma nge: “Loku mu ranzana, a vanhu vontlhe va ta zi tiva lezaku mu vapizani va mina.” Nzi lo tiva lezaku nzi wa kumile vanhu va nga ni wumakabye ga lisine.

Laha nzi nga kari nzi gonza a Biblia, nzi lo sangula ku wona lezaku nzi wa fanele ku cica mawonela ya mina. Nzi wa fanele ku cica kupima ka mina lezaku nzi ngave munhu wo rula ntsena, kanilezi nzi wa fanele ku tlhela nzi zi wona kota ndlela yi nene ya ku hanya hi yona. (Va Le Roma 12:2) Nzi lo chukwatisa hi kutsongwani-kutsongwani. Hi Janeiro wa 1974, nzi lo bapatizwa kota Mboni ya Jehova.

Kanilezi, hambu anzhako ka ku bapatizwa, nzi wa ha fanele ku simama nzi chukwatisa a matshamela ya mina. Hi xikombiso, ka siku go kari na hi hi ntirweni wa wuKristu wa ku xumayela hi muti ni muti, nzi lo hlongolisela a khamba gi nga yivile radu ga mova wa mina. Laha nzi nga hi kusuhani nago, gi lo hoxa radu lahasi gi tsutsuma. A xikhati lexi nzi nga byela lava nzi nga hi navo lezi nzi nga gi kumisa zona a radu ga mina, a dota go kari gi lo nzi wutisa lezi: “Stephen, loku u wa no mu khoma, na u mahile yini?” A xiwutiso lexo xi lo nzi maha nzi ehleketa xi tlhela xi nzi kuca ku simama nzi ti karata kasi kuva munhu wo rula.

Hi Outubro wa 1974, nzi lo sangula kuva mutiri wa xikhati xontlhe, nzi mbheta 100 wa tihora hweti ni hweti na nzi gonzisa vanhu a Biblia. Hi nzhako ka xikhati, nzi lova ni thomo ga ku ti nyikela lezaku nzi ya tira hi kuziranza le tsinza wa misava yontlhe wa Timboni ta Jehova le Brooklyn, Nova York. Hi 1978, nzi lo tlhela le Los Angeles kasi ku ya hlayisa mamani a nga kari a babya. Loku ku hunzile malembe mambiri, nzi lo chada na Aarhonda, a sati wa mina wo ranzeka. I lo nzi vunetela nguvu laha hi nga kari hi hlayisa mamani kala afa. Hi kufamba ka xikhati, mina na Aarhonda hi lo gonza Xikola xa Biblia xa Gileade, laha hi nga gumesa hi nyikwa xiavelo xa kuya le Panamá, lomu hi tirako kota varumiwa kala inyamutlha.

Kusukela nzi bapatizwa, nza kumana ni ziyimo zi nga wa ta nzi maha nzi vuxa tiholova. Kanilezi, nzi gonzile kambe ku fambela kule ni lava va zamako ku nzi vuka, ka zikhati zinwani nzi zama ku rulisa xiyimo hi tindlela tinwani. A vanhu vo tala, a ku patsa ni sati wa mina, va nzi dzunza hi lezi nzi lulamisisako zona a ziyimo lezo. Hambu mina nwinyi, nza tshuka nzi ti hlamala! A nzi ti nyiki wudzunzo hi kota ya kucica loko ka wumunhu ga mina. A kuhambana ni lezo, ka mina lexo xikombiso xo tiya xa lezaku hakunene a Biblia gi na ni ntamu wa ku cica wutomi ga munhu. — Maheberu 4:12.

LEZI NZI NGA VUNEKISA ZONA:

A Biblia gi nzi vunile ku tiva lexi nzi hanyelako xona gi tlhela gi nzi gonzisa kuva munhu wo rula futsi. A nza habi vanhu; kanilezi, zezi nzi va vuna hi ku va chuma hi tlhelo ga moya. Nzi zile nzi gonza a Biblia ni wokari a nga hi nala wa mina a xikhati nzi nga gonza le xikola sekundaria! Anzhako ka loku a bapatizilwe, hi lo hanya ka yindlu yinwe hi xikhati xo leha. Ni nyamutlha ha hi vanghana va hombe. Kala lezi, mina ni sati wa mina hi vunile vanhu vo hunza a 80 wa vona lezaku va maha Timboni ta Jehova hi ku gonza navo a Biblia.

Nza mu bonga nguvu Jehova hi lezi a nzi mahileko nzi tiva lexi nzi hanyelako xona, a tlhela a nzi nyika litsako xikari ka vamakabye va mina va moya.