Va lo ti hendleleta hi kuziranza le Filipinas

Ka xipimo xa khume ga malembe ma hunzileko, Gregorio na Marilou, wu nga patswa wu chadileko wu nga kwalomu ka 30 wa malembe ni kuhunza, va wa tira kota maphayona le Manila na va tira xontlhe xikhati mitirweni yabye ya kutihanyisa. Zi wa karata kanilezi va wa zi kota. Hi kufamba ka xikhati, Marilou i lo nyikwa xikhundla xa kuva muwoneleli wa bhanko leyi a nga tira ka yona. I ngalo: “Hi wa hanya mafureni hakuva hi wa hi ni mitiro yi nene leyi yi nga hi holela mali yo tala.” Kunene, a patswa lowu wu wa tshamisekile hi tlhelo ga timali laha ka kuza wu longa ku aka yindlu leyi wu nga yi donela ni mari ka wutshamu go saseka nguvu ka pfhuka wa 19 wa tikilometro mutsuwuka-gambo wa Manila. Va lo thola koponi lezaku yi va akela va tlhela va sayina xivumelwano xo hakhela a yindlu leyo hweti ni hweti nzeni ka khume ga malembe.

“NZI LO WONA LEZAKU NZI WO YIVELA JEHOVA”

Marilou i bika lezi: “A ntiro wa mina wa wuswa wu wa koxa zotala ka mina laha ka kuza nzi nga ha salelwi hi xikhati ni ntamu wa ku maha mitiro ya moya. Nzi lo wona lezaku nzi wo yivela Jehova.” I tlhamusela aku: “Nzi wa nga ha zi koti a ku nyika Jehova a xikhati lexi nzi nga hlambanyile ku xi mbheta ntirweni wakwe.” Hi kota ya ku swiriwa hi xiyimo lexi, Gregorio na Marilou va lo tshama hasi ka siku go kari va bhula xungetano hi lomu a wutomi gabye gi nga cuwuka kona. Gregorio i ngalo: “Hi wa lava ku cica wutomi ga hina kanilezi hi wa nga xi tivi lexi hakunene hi nga fanele ku maha. Hi bhulile hi ndlela yo tirisa wutomi ga hina gontlhe ntirweni wa Jehova, nguvunguvu kota lezi hi nga hava vana. Hi lo khongela ka Jehova hi kombela wurangeli.”

Ka xikhati lexo, va lozwa tikanelo to tala xungetano hi ku ya tira lomu ku nga ni xilaveko xa hombe xa vahuweleli va Mufumo. “Hi lo zi wona lezaku a tikanelo leto ti wa hi hlamulo wa Jehova ka mikhongelo ya hina,” ku wula Gregorio. A patswa lowu wu lo khongela wu kombela kukholwa ka hombe kasi wu tiya hlana wu maha ziboho za zi nene. A nchumu wa hombe ni wo karata lowu va nga hi nawo ku wa hi yindlu leyi va nga ha aka. Va wa hakhele tihweti tinharu. Makunu va wa ta kuyini? Marilou i ngalo: “Loku hi tlhatlha xivumelwano, hi wa ta luza mali yontlhe leyi hi nga hakhele kala ka siku lego  —  niku yi wa nga hi yitsongwani. Kanilezi hi zi wonile kota lungelo ga ku hlawula xikari ka ku rangisa a kuranza ka Jehova ni ku rangisa kunavela ka hina wutsumbu.” Na va alakanya a magezu ya mupostoli Paule xungetano hi “kulahlekelwa,” va lo tlhatlha xivumelwano xo akelwa yindlu, va tsika mitiro yabye, va xavisa a kutala ka zibya zabye, zonake va rura vaya ka xidoropana xa le kule xihlaleni xa Palauã, ka xipimo xa 480 wa tikilometro dzongeni wa Manila. — Fil. 3:8.

VA “GONZILE A KU XALALA”

Na va nga se rura, Gregorio na Marilou va wa zamile ku ti longisela ku hanya wutomi go olova, kanilezi a va zi tivangi lezaku a wutomi gabye gi wa tava ga nyalidede nguvu a ku hunza lezi va nga zi alakanya kala va chikela lomu va ngaya kona. Marilou i wula lezi: “Hi lo dzuka hi tala hi kuhlamala. A ku na magezi, a ku na nchumu wo vevukisa mahanyela. Wutshanwini ga ku lumeka fogawu kasi ku bhika zakuga, hi wa fanele ku tshova tihunyi hi bhika hi tona. Nzi wa xuva nguvu a kuya zitolo, ku yaga handle, ni zilo zinwani zi yelanako ni wutomi ga doropa.” Hambulezo, a patswa lowu wu lo simama ku ti alakanyisa lexi xi nga va maha va rurela ka wutshamu lego, niku zalezo va lo tolovela. Marilou i bika lawa: “Makunu nza tsaka hi ku wona a kusaseka ka ntumbuluko, a ku patsa ni tinyeleti leti ti nge phanjalala ni wusiku. A ku tsika zontlhe lezo, lexi xi tsakisako nguvu ku wona vanhu na va nwayitela hi kutsaka a xikhati lexi hi va xumayelako. Hi ku tira laha, hi ‘gonzile a ku xalala.’” — Fil. 4:12.

Gregorio i bika lezi: “A xikhati lexi hi nga chikela laha, a kova ni mune wa Timboni ntsena. Va lo tsaka laha nzi nga sangula ku veka kanelo ya laha kubaseni viki ni viki nzi tlhela nziba viyola na nzi lanzela a tisimu ta Mufumo a xikhati lexi hi yimbelelako.” Nzeni ka lembe ginwe, a patswa lowu wu wonile lezi a ntlawa lowo wa wutsongwani wu nga kulisa zona wuva bandla ga 24 wa vahuweleli. Gregorio i ngalo: “Lezi a vamakabye va hi ranzisako zona laha bandleni za khumba nguvu a timbilu ta hina.” Loku nyamutlha va cuwuka nzhako, ka 6 malembe na va tira ka wutshamu lego ga le kule, ve ngalo: “A ku na nchumu wu nehako litsako lo hunza ku wona kukula hi tlhelo ga moya. Makunu ha zi wona lezaku a wutomi ga hina gi na ni kungo.”

“NZI ‘RINGILE NZI WONA LEZAKU JEHOVA I NENE’!”

Le Filipinas, xipimo xa 3.000 wa vamakabye va xinuna ni va xisati va rurile vaya matshanwini lawa ku nga ni xilaveko xa hombe xa vahuweleli va Mufumo. A xipimo xa 500 wabye vamakabye va xisati va nga chadangiko. Wona a xikombiso xa Karen.

Karen, loyi zalezi a nga kwalomu ka 25 wa malembe i kulele Baggao, Cagayan. Na a ha hi tangeni yo rama i wa tala ku alakanyela hi tindlela ta ku engetela wutireli gakwe. I bika lezi: “Hi ku tiva lezaku a xikhati xi seleko xi komile ni lezaku a vanhu vontlhe va fanele kuzwa a mahungu ya Mufumo, nzi wa lava a ku tira lomu ku nga ni xilaveko xa hombe xa vahuweleli.” Hambu lezi a vanhu vo hlaya va ngango wakwe va nga mu kuca a ku lanzelela a zigonzo zo tlakuka wutshanwini ga ku rura a ya hanya kule kasi ku xumayela, Karen i lo khongela ka Jehova lezaku a mu rangela. I wulawulile kambe ni lava va tirako ka wutshamu ga le kule. Laha a nga hi ni 18 wa malembe, i lo rura a ya ka wutshamu ga le kule gi nga ka pfhuka wa 64 wa tikilometro ku suka hi doropeni gabye.

A bandlana legi Karen a ngaya gi vunetela gi xumayela ka wutshamu ga zitsunga mbhirini ya Bimbi ga Pacífico. Karen i ngalo: “Kasi hi chikela bandleni legi na hi suka Baggao, hi lo famba masiku manharu, na hi noma zitsunga na hi relela ni ku tsemakanya micongo ku hunza a 30 wa makhati.” I engeta aku: “Kasi nzi chikelela zigonzani zo kari za Biblia, nzi famba pfhuka wa 6 wa tihora, nzi etlela mutini wa xigonzani; hi manziko wa kona nzi famba kambe a pfhuka wa 6 wa tihora na nzi wuya kaya.” Xana a kutikarata loko ku’ve ni bhinzu? Karen i engetela magezu lawa na aku nwe: “Ka zikhati zo kari a milenge ya mina ya tshuka yi bayisa, kanilezi nzi fambisa a 18 wa zigonzo za Biblia. Nzi ‘ringile nzi wona lezaku Jehova i nene’!” — Tis. 34:8.

“NZI LO GONZA KU TSUMBA JEHOVA”

Xini xi nga kuca Sukhi, a makabye wa xisati wa 40 wa malembe a nga chadangiko a nga hanya Estados Unidos lezaku a rura aya Filipinas? Hi 2011, i loya ka mutlhangano wa xipanze laha ku nga bhulisiwa a patswa wu chadileko. Va lo hlawutela lezi va nga xavisisa zona a kutala ka zibya zabye lezaku va rura vaya México kasi kuya vunetela ntirweni wa kuxumayela. Sukhi i ngalo: “Kubhulisaneni loko nzi lo sangula ku telwa hi maalakanyo ya ku ti vekela mixuvo yaku cima nzi wa nga se tshuka nzi ehleketa hi yona.” A xikhati lexi Sukhi loyi a nga wa lixaka la vaIndiano, a nga tiva lezaku ku wa hi ni xilaveko xa hombe xa ku xumayela vaPunjabi va hanyako Filipinas, i lo boha a ku ya va vuna. Xana i kumene ni zikarato?

Sukhi i ngalo: “A ku maha xiboho xa lezaku nzi ta xavisa xihi nzi siya xihi zi karatile a ku hunza lezi nzi nga zi alakanya. Ahandle ka lezo, kota lezi nzi nga sina nzi hanyile ka matshamela ma nene hi 13 wa malembe mutini wa mina hi lo ya hanya ka matshamela yaku cima nzi belekwa nzi wa nga se ma wona. Zi wa nga olovi, kanilezi yi’ve ndlela yi nene ya ku gonza ku ti longisela kasi nzi hanya wutomi go olova.” Zikarato muni a nga kumana nazo anzhako ka ku rura aya Filipinas? “A xikarato xa mina xa hombe ka zontlhe ku wa hi kururumela hi ku chava zidodwani ni ku xuva kaya. Nzi lo gonza ku tsumba Jehova a ku hunza lezi nzi nga mu tsumbisa zona kale!” Xana zi’ve ni bhinzu? Sukhi i wula lezi na aku nwe: “Jehova i ngalo, ‘Nzi ringeni kasi ku wona lezaku nzi nga ta mu chululela a makatekwa ke.’ A magezu lawa mo khwatsi Jehova i byela mina wutsumbu a xikhati lexi a nwinyi wa muti a nzi wutisako ku, ‘U ta wuya rini kambe ke? Nza hi ni ziwutiso zo tala.’ Nzi tsaka nguvu nzi tlhela nzi xalala hi ku vuna vanhu lava va nga ni ndlala ya zakuga za moya!” (Mala. 3:10) Sukhi i engeta aku: “Kunene, a nchumu wo karata ka yontlhe ku’ve ku maha xiboho xa kurura. Zalezo nzi nga maha xiboho lexo, zi tsakisile nguvu ni ku hlamalisa a ku wona lezi Jehova a nzi maheleko.”

“NZI LO HLULA KUCHAVA KA MINA”

Sime, a makabye wa xinuna a chadileko a nga kusuhani ni ku tlhanganyisa a 40 wa malembe i lo suka Filipinas aya ka tiko go kari Dzongeni wa Asia lezaku a ya lavetela ntiro wu holelako khwatsi. Na a hi tikweni lego, i lo kuciwa hi muwoneleli wa xipanze ni kanelo yi vekilweko hi xiro xa Hubye yi Fumako. Lezo zi lo mu nyika ntamu wa ku rangisa Jehova wutomini gakwe. Sime i ngalo: “A mhaka yaku nzi tsika a ntiro wa mina yi lo nzi tsona wurongo.” Hambulezo, i lo tsika ntiro wakwe a tlhela Filipinas. Nyamutlha, Sime ni sati wakwe Haidee, va tira Davao del Sur, dzongeni wa tiko laha ku nga ni xilaveko xa hombe xa vahuweleli va Mufumo lezaku va eneta a xipanze lexo xa hombe. Sime i bika lawa: “Loku nzi cuwuka nzhako a nzo ku tsaka hi lezi nzi hlulileko a kuchava ka mina ku luza ntiro zonake nzi rangisa Jehova wutomini ga mina. A ku na nchumu wu nyikako litsako wutomini a ku hunza ku nyika Jehova lezi za chukwana u nga nazo!”

“ZA HI NYIKA LITSAKO LA HOMBE!”

A xikhati lexi Ramilo na Juliet, patswa wa maphayona wu chadileko va nga kwalomo ka 30 wa malembe va nga tiva lezaku a bandla gi nga ka pfhuka wa 30 wa tikilometro ntsena a ku suka hi kaya kabye gi wa lava xivuno, va lo ti hendleleta kasi ku gi vunetela. Hikwalaho viki ginwe ni ginwani, kani kuna vula kani ku na ni mumu, Ramilo na Juliet vaya ka bandla legi makhati yo tala hi mota wabye kasi ku ya nghena mitlhangano ni ku xumayela. Hambu lezi a ku famba ka maruwa ya zikhele ni mabhulaho yo hayekiwa ka tingoti zi nga ni zikarato za zona, va tsaka hi lezi va engeteleko a wutireli gabye. Ramilo i ngalo: “Mina ni sati wa mina hi fambisa a 11 wa zigonzo za Biblia a ku patsa zontlhe! A ku tira laha ku nga ni xilaveko xa hombe ku laveka kutikarata, kanilezi za hi nyika litsako la hombe!” — 1 Kor. 15:58.

Xana wa zi lava ku tiva zotala xungetano hi ndlela ya ku ya tira laha ku nga ni xilaveko xa hombe xa vahuweleli va Mufumo tikweni ga wena kutani matiko-wundle? Loku u zi lava, wulawula ni muwoneleli wa nwina wa xipanze, u tlhela u gonza a nzima “Xana u nga ‘tlhatuka uya Makedonia’?” ka Wutireli ga hina ga Mufumo ga Agosto wa 2011.