MIHLAMULO YA BIBLIA
Hi gihi kungo ga kuwuya ka Kristu?
Na a nga se tlakukela tilweni hi 33 Nguveni ya Hina, Jesu Kristu i tsumbisile lezaku i ta wuya. Jesu i ti fananisile ni wanuna wa xikhundla xa hombe loyi a sukileko aya ka wutshamu ga le kule hi xikhati xo leha, zonake a wuya na a hi ni ntamu wa ku fuma kota hosi. A kungo ga kuwuya ka Jesu, ku neha mufumo wa wu nene hehla ka vanhu. — Gonza Luka 19:11, 12.
Jesu i ta neha mufumo wa wu nene hehla ka vanhu
Xana Jesu i ta wuya na a hi ni miri muni? I vuxilwe hi ka vafileko kota munhu wa moya. (1 Pedro 3:18) Anzhako ka lezo, i loya tilweni, a ya tshama tlhelweni ga xinene ga Nungungulu. (Tisimu 110:1) Loku ku hunzile xikhati xo leha, Jesu i lo yisiwa mahlweni ka Jehova Nungungulu, a “Wakale hi Masiku,” loyi a mu nyikileko ntamu wa ku fumela vanhu. Hikwalaho, Jesu a nga wuyi kota munhu wa nyama, kanilezi kota Hosi yi nga xivangwa xa moya. — Gonza Danieli 7:13, 14.
Zini lezi Jesu a to maha loku a chikela?
A xikhati lexi Jesu a to wuya kota xivangwa xi nga wonekiko, zinwe ni tingelosi takwe, i ta lamula vanhu. I ta lovisa vanhu vo biha, kanilezi a va nyika wutomi ga pinzukelwa lava va mu amukelako kota Hosi. — Gonza Mateu 25:31-33, 46.
A mufumo wa Jesu wu ta hunzula misava yiva paradise. I ta vuxa vafileko lezaku va ti buza hi wutomi go nanziha paradiseni lego laha misaveni. — Gonza Luka 23:42, 43.