Hikuyini Nungungulu a vumelelako kuxaniseka?

I TI ZWISA KUYINI NUNGUNGULU HI KUXANISEKA KA HINA?

Maria: O, Sofia. Nzi tsakile hi ku ta ku kuma na u hi kona.

Sofia: Minawu nza tsaka hi ku ku wona.

Maria: A siku lego nzi nga tile, hi wulawulile hi lezi Nungungulu a ti zwisako zona hi kuxaniseka ka hina.a U wulile lezaku u na ni malembe yo tala na u ti wutisa hi mhaka leyi, nguvunguvu nzhako ka kuva mamani wa wena a humelwe hi mhango ya mova. Makunu zalezi i vukisa kuyini mamani?

Sofia: Ku na ni masiku a nga chukwana ni masiku zi karatako. Nyamutlha i chukwana.

Maria: Za tsakisa a kuzwa mahungu lawo. Nzi alakanya lezaku a xiyimo lexi xa karata nguvu ku yimisana naxo.

Sofia: Kunene, a zi olovi. Nza tshuka nzi ti wutisa a ku i ta xaniseka kala rini.

Maria: Za zwisiseka. Wa alakanya lezaku kumbheleni ka mabhulo ya hina ya siku lego, nzi ku siyele xiwutiso xaku hikuyini Nungungulu a tsikako kuxaniseka ku simama kuveni i na ni ntamu wa ku ku fuvisa ke.

Sofia: Ina, nza alakanya.

Maria: Na hi nga se wona hlamulo wa Biblia, wa ha zi alakanya lezi hi nga bhula hi zona siku lego?

Sofia: Kutsongwani!

Maria: A xinwe xa zilo hi gonzileko, hi lezaku hambu a wanuna wo kari wo tsumbeka wa xikhatini xa kutsaliwa ka Biblia i wutisile a ku hikuyini Nungungulu a vumelelako kuxaniseka ke. Hambulezo, Nungungulu a nga tshukangi a mu bhongela hi ku wutisa lezo, ge hambu ku mu byela ntsena lezaku i fanele ku tiyisa kukholwa kakwe.

Sofia: Lowo wu’ve nchumu wuswa ka mina.

Maria: Hi gonzile kambe lezaku Jehova Nungungulu a nga xalali hi ku hi wona na hi xaniseka. Hi xikombiso, a Biblia gi hi byela lezaku laha vanhu vakwe va nga hi zikaratweni, “i lo karateka zinwe navo.”b A zi hi chaveleli a ku tiva lezaku Nungungulu wa hi zwela wusiwana loku hi xaniseka ke?

Sofia: Za hi chavelela hakunene.

Maria: Hi kugumesa hi wonile lezaku hi ntamu lowu a Muvangi wa hina a nga nawo, a nga zi kota ku fuvisa kuxaniseka ni ka xihi xikhati a zi lavako.

Sofia: Hi zalezo nzi kalako nzi nga zi zwisisi. Hikuyini Nungungulu a tsikako a zilo zontlhe lezi zo biha zi humelela na a hi ni ntamu wa ku zi sivela?

HIMANI A NGA KARI A WULAWULA LISINE?

Maria: Hi nga sangula ku kuma a hlamulo wa xiwutiso xa wena ka bhuku go sangula ga Biblia, ku nga Genesisi. Wa ma tiva a matimu ya Adamu na Eva ni hanzu lowu wu nga beletelwa?

Sofia: Ina, nzi gonzile matimu lawo Katikezeni. Nungungulu i wa wulile lezaku va ngangi hanzu wo kari, kanilezi vona va lo ala vaga.

Maria: Hi zona. Zalezi a hi veke kupima ka lezi zi nga yisa Adamu na Eva xionhweni lexo. A zimaho lezo zi yelana hi kukongoma ni xiwutiso lexi xa ku hikuyini hi xanisekako. U nga hi gonzela Genesisi xipimo 3, vesi ga 1 kala 5?

Sofia: Ina, nzi nga gonza. “A nyoka yi wa hi ni mano ku hunza zihari zontlhe za tiko, lezi Jehova Nungungulu a nga wa zi mahile. Yi ku ngalo ka wasati: Hakunene Nungungulu i wulile lezaku mu ngagi ni sinya yinwe ya simu ke? Ni wasati aku ngalo ka nyoka: Hi ngaga a mihanzu ya tisinya tontlhe, kanilezi a mihanzu ya sinya leyi yi nga xikari ka simu, Nungungulu i te ngalo, mu nga ta yiga, hambu ni ku yi henya, kasi mu ngafi. Ni nyoka yi ku ngalo ka wasati: Mu nga tafa futsi; hi lezaku Nungungulu wa zi tiva lezaku, a siku lego mu gako yona, a mahlo ya nwina ma ta vululeka, mu kota Nungungulu, mu tiva kusasa ni kubiha.”

Maria: Nzi bongile. Zalezi a hi kambisise a mavesi lawa hi xikhatanyana. A kuranga, wona lezaku a nyoka yi wulawulile ni wasati, Eva. A xipanze xinwani xa Biblia xi komba lezaku hi lisine hi Satani a nga wulawula naye hi ku tirisa nyoka.c Satani i lo wutisa Eva xungetano hi xileletelo xa Nungungulu mayelano ni sinya yo kari. U zi wonile lezi Nungungulu a nga wulile lezaku zi wa ta humelela loku Adamu na Eva vaga a sinya leyo?

Sofia: Va wa tafa.

Maria: Lisine. Makunu ka magezu ma nga lanzela, Satani i lo maha xilumbeto xa hombe ka Nungungulu. Wona lezi a zi wulileko: “Mu nga tafa futsi.” Satani i waku Nungungulu muhembi!

Sofia: Cima nzi wa nga se tshuka nzizwa matimu lawo.

Maria: Niku ka xikhati lexi Satani a nga wula lezaku Nungungulu muhembi, i wo vuxa mhaka ya hombe leyi yi nga wa ta lava xikhati xo leha kasi ku yi lulamisa. Wa zi wona ku hikuyini?

Sofia: Umm, a nzi zi tivi khwatsi.

Maria: Kuzilava nzi nga zi fananisa hi ndlela leyi. Hi nga alakanya loku nzo tshuka nzi ku tela nzi tako nzi na ni ntamu nguvu ku hunza wena. U wa ta maha yini kasi ku komba lezaku a nzi na ntamu wa nchumu?

Sofia: Nzi alakanya lezaku ku wa ta laveka ku maha zilo zo kari zi lavako ntamu.

Maria: Hi zalezo. Kuzilava hi wa ta lava nchumu wo binza hi wona ku himani a zi kotako ku wu tlakula. Hi lisine a ku tiva loyi a nga ni ntamu za olova nguvu.

Sofia: Nza ku zwisisa.

Maria: Kanilezi, ahati loku nziku nzi munhu wo tsumbeka nguvu ku hunza wena? Leyo makunu i mhaka yo karatanyana, a hi zona?

Sofia: Ko khwatsi hi zona.

Maria: Kunene, a kutsumbeka a ku fani ni ntamu waku u nga wu tiva hi ku ringisa ntsena.

Sofia: Hi zona.

Maria: Hi lisine, i ndlela yinwe ntsena yi nga kona ya ku tiva lezo, ku nga ku tsika xikhati xo kari xi hunza na vanhu vanwani va hi cuwukela kasi ku wona lezaku himani loyi hakunene a tsumbekileko xikari ka hina.

Sofia: Za zwisiseka.

Maria: Zalezi a hi nga wuye ka mavesi lawa hi nga gonza ka Genesisi. Satani i waku i na ni ntamu ku hunza Nungungulu?

Sofia: Ahihi.

Maria: Loku zi wa hi lezo, Nungungulu na a tekele ku mu komba lezaku o hemba. Kanilezi, Satani i te i tsumbekile nguvu ku hunza Nungungulu. Hi mawulela manwani, i byelile Eva aku, ‘Nungungulu o mu hembela, a lisine hi leli mina nzi ku byelako.’

Sofia: E! Zilo za hombe.

Maria: Hi wutlhari gakwe, Nungungulu i zi wonile lezaku a ndlela ya chukwana ya ku lulamisa xikarato lexo ku wa tava ku tsika xikhati xi hunza. Hi magumo zi wa ta dlunyateka lezaku loyi a nga wula lisine hi mani.

MHAKA YA LISIMA

Sofia: Kanilezi, a xikhati lexi Eva a ngafa, xana a zi tekelangi ku woneka lezaku loyi a nga wula lisine hi Nungungulu?

Maria: Hi ndlela yo kari, zi wonekile. Kanilezi a xikarato xa Satani xi wa patsa zinwani. Cuwuka kambe laha ka vesi 5. U zi wonile ku zini zinwani lezi Satani a byelileko Eva?

Sofia: I mu byelile lezaku loku aga hanzu, a mahlo yakwe ma ta vululeka.

Maria: Hi zona, ni lezaku i wa ta ‘kota Nungungulu, a tiva kusasa ni kubiha.’ Hikwalaho, Satani i wa wula lezaku Nungungulu i tsona vanhu a nchumu wa wu nene.

Sofia: Nza zi wona.

Maria: Niku lexo xonawu xi wa hi xikarato xa hombe.

Sofia: U lava ku wula yini?

Maria: A magezu ya Satani ma wa wula lezaku Eva — ni vanhu vontlhe — va wa ta hanya khwatsi loku va nga fumelwi hi Nungungulu. Laha konawu, Jehova i zi tivile lezaku a ndlela ya chukwana ya ku lulamisa xikarato lexi ku wa hi ku tsika Satani a komba lezi a zi wulako. Hikwalaho, Nungungulu i lo tsika Satani a fumela tiko hi xikhati xo kari. Lexi hi xona xigelo xa kuva ku hi ni kuxaniseka kontlhe loku hi ku wonako — hi lezaku hi Satani a fumelako tiko, a hi Nungungulu.d Hambulezo, ku na ni mahungu yo saseka.

Sofia: Ma le yini?

Maria: A Biblia gi gonzisa zilo lezi za zimbiri za lisine xungetano hi Nungungulu. A xo sangula, Jehova wa karateka a xikhati lexi hi xanisekako. Hi xikombiso, wona magezu ya Hosi Davida ma tsalilweko ka Tisimu 31:7. Davida i xanisekile nguvu wutomini gakwe, kanilezi hi nga wona lezi a nga byela Nungungulu hi mukhongelo. U nga lera vesi lego?

Sofia: Ina. Gi ngalo: “Nzi ta tsaka nzi buma hi kota ya wuxinji ga wena; hakuva u wonile a hlomulo wa mina; u tivile a zikarato za muhefemulo wa mina.”

Maria: Hikwalaho, hambu lezi Davida a xanisekileko, zi wa mu chavelela ku tiva lezaku Jehova i wa zi wona zontlhe lezi a nga kumana nazo. Xana za ku chavelela a ku tiva lezaku Jehova wa zi wona zontlhe zi mahekako, hambu zilo zo bayisa lezi a vanhu va tshukako va nga zi zwisisi khwatsi?

Sofia: Ina, za nzi chavelela.

Maria: A nchumu wa wumbiri wa lisine hi lezaku Nungungulu a nga ta tsika kuxaniseka ku tshama kala kupinzuka. A Biblia gi gonzisa lezaku i ta lovisa a mufumo wa Satani lokuloku. Niku i ta fuvisa a zilo zontlhe zo biha lezi zi humelelako, a ku patsa ni lezi zi xanisako wena ni mamani wa wena. Nzi nga wuya viki gi tako nzi ta ku komba lexi xi hi mahako hi tiyiseka lezaku lokuloku Nungungulu i ta fuvisa a kubiha kontlhe ku hi xanisako?e

Sofia: Zi wa tava zi nene.