Xana Nungungulu wa khatala hi kuxaniseka ka hina?

HIKUYINI A NGA TSIKA ZILO LEZI ZI MAHEKA?

Maria: Nyamutlha nzi kari nzi nyikela a xiphephana lexi ka vontlhe va hanyako ka xipanze lexi. Xi na ni hloko ya mhaka Xana Wa Zi Lava Ku Tiva A Zinene? Lexi xa wena.

Sofia: Xa wukhongeli?

Maria: Ina. Hi nga wona a ziwutiso za ntlhanu ni xinwe zi nga laha ka kapa. Hi xihi xi — 

Sofia: Hi nga nyima. Wo ti mbhetela xikhati xa wena hi ku bhula na mina.

Maria: U wula lezo hikuyini?

Sofia: Hi ku mina a nzi kholwi niku Nungungulu i kona.

Maria: Nza bonga ku nzi byela lezo. Nzi tsakela ku ku maha xiwutiso, kale ni kale u wa ti zwisa zalezo?

Sofia: Ahihi, nzi waya chechini. Kanilezi nzi nyimile kale.

Maria: Hi zona. Ko khwatsi nzi wa nga se ku byela a vito ga mina. Hi mina Maria.

Sofia: Mina hi mina Sofia.

Maria: Nzi bongile ku tivana, Sofia.

Sofia: Nzi bongilewo.

Maria: A nzi teli ku ta ku kurumeta ku kholwa lezi mina nzi zi kholwako. Hambulezo, zi kona nzi tsakelako ku zi tiva. Ku na nchumu wo kongoma wu nga ku maha u kanakana lezaku Nungungulu i kona?

Sofia: Ina. A mamani wa mina i no humelwa hi mhango ya mova 17 wa malembe nzhako.

Maria: Ya hava. A nga bayisiwangi?

Sofia: I bayisilwe nguvu. A nga ha fambi.

Maria: O vasanwina. Lezo za bayisa.

Sofia: Zi bayisa nguvu. Hi zalezo zi nzi mahako nzi ti wutisa a ku loku Nungungulu a hi kona, Hikuyini a nga tsika zilo lezi zi maheka? I hi tsikela yini hi xaniseka?

XANA ZI BIHILE KU WUTISA?

Maria: A kutizwa ka wena ni ziwutiso za wena za zwisiseka. Loku hi xaniseka zi tolovelekile ku lava ku tiva ku hikuyini. Hi lisine hambu vavanuna ni vavasati va kukholwa va kumbukiwako lomu ka Biblia va wa ti maha ziwutiso lezo!

Sofia: Lisine lezo?

Maria: Lisine. Ku na ni xikombiso xo kari lomu ka Biblia. Nzi nga ku komba?

Sofia: Nzi kombe.

Maria: Wona lezi muprofeti Habakuka a nga wutisa Nungungulu. Zi tsalilwe ka Habakuka, xipimo 1, mavesi 2 ni 3: “Jehova, nzi ta rila kala rini, na wena u nga zizwi ke? Nza rila ka wena hi kota ya tihanyi ta vanhu, kanilezi a ku hanyisi! Hiyini u nzi kombisako kubiha, u nzi wonisa hlokiselelo?” U zi wonisa kuyini a ziwutiso lezi, xana za fana ni lezi za wena?

Sofia: Za fana.

Maria: Nungungulu a nga zangi a bhongela Habakuka hi kota ya ziwutiso lezo, ge hambu ku mu byela ntsena lezaku i fanele ku tiyisa kukholwa kakwe.

Sofia: Za hlamalisa.

JEHOVA WA VENGA A KUXANISEKA

Maria: A Biblia gi gonzisa lezaku Nungungulu wa ku wona kuxaniseka ka hina niku wa khatala hi kona.

Sofia: U lava ku wula yini?

Maria: Wona xikombiso lexi laha ka Eksodusi 3:7. U nga gi gonza?

Sofia: Hi zona. Gi ngalo: “Jehova aku: Nzi wonile kuxaniseka ka vanhu va mina le Gipite, nzi zwile kurila kabye hi kota ya lava va va xanisako; nza tiva a hlomulo wabye.”

Maria: Nzi bongile. Hi kuya hi mutsalo lowu, Nungungulu wa ku wona kuxaniseka ka vanhu kutani a nga ku woni?

Sofia: Zi wonekisa ku khwatsi wa ku wona.

Maria: Niku a hi ku khwatsi o tiva lezi zi mahekako ntsena. Hi nga gi cuwuka kambe a vesi legi. Nungungulu i ngalo: “Nza tiva a hlomulo wabye.” Hi mawonela ya wena, a magezu lawa nja Nungungulu a nga khataliko?

Sofia: Ahihi.

Maria: Kunene, a ku wona xikarato zi hambene ni ku khumbiwa hi xona.

Sofia: Lisine.

Maria: Na ha ha alakanyela lezi, a hi wone lezi zi nga humelela ka khati ginwani legi a vanhu va Nungungulu va nga hi kuxanisekeni. Zi tsalilwe ka Isaya 63:9. A xipanze xo ranga xa vesi legi xi ngalo: “Lomu zikaratweni zabye zontlhe i lo karateka zinwe navo.” Makunu, u alakanya ku Nungungulu i wa khumbiwa hi kuxaniseka ka vanhu vakwe?

Sofia: Ina, zi wonekisa lezo.

Maria: Hi lisine, Sofia, Nungungulu wa khatala nguvu hi hina, niku a nga zi ranzi ku hi wona na hi xaniseka. Loku hi bayiseka, yenawu o bayiseka.

HIKUYINI A RINZELAKO?

Maria: Na nzi nga se famba, ku na ni zinwani nzi tsakelako ku ku komba.

Sofia: Nzi kombe.

Maria: Wona lezi a Biblia gi hi gonzisako xungetano hi ntamu wa Nungungulu. A bhuku nzi gi alakanyako zezi hi Jeremia 10:12. Hi nga gi gonza.

Sofia: Gi ngalo: “Yena i vangile misava hi ntamu wakwe. A seketela tiko hi wutivi gakwe, hi kupima kakwe i tshambulutile tilo.”

Maria: Nzi bongile. A hi ehlekete kutsongwani hi vesi legi. Xana zi lavile ntamu wa hombe lezaku Nungungulu a vanga a zilo zontlhe lezi hi zi wonako lomu tikweni?

Sofia: A zi kanakanisi.

Maria: Makunu, loku Nungungulu a hi ni ntamu wa ku vanga zontlhe hi zi wonako, u alakanya ku a nga vumala ntamu wa ku fumela zivangwa zakwe.

Sofia: Ahihi.

Maria: Ehleketa kambe hi mamani wa wena. Hikuyini zi ku bayi sako ku mu wona na a xaniseka?

Sofia: Hi ku nza mu ranza. I mamani wa mina.

Maria: Niku loku u wa hi ni ntamu wa ku mbheta kuxaniseka kakwe nyamutlha, u wa ta ku mbheta, a hi zona?

Sofia: Handle ko kanakana.

Maria: Alakanyela lezi zi wulako zona. A Biblia gi gonzisa lezaku Nungungulu wa ku wona a kuxaniseka ka hina, wa hi zwela wusiwana, niku i na ni ntamu wa hombe nguvu. Makunu, a wu alakanyi ku zi lava kutikhoma ka hombe nguvu kasi ku Nungungulu a nga tekeli ku mbheta a kuxaniseka ka hina?

Sofia: Cima nzi wa nga se zi alakanyela hi ndlela leyo.

Maria: Makunu a ngova ni xigelo xo zwala xa ku kala a nga tekeli ku mbheta a zikarato za hina?a

Sofia: Nzi alakanya ku i naxo.

Maria: Ko khwatsi i kona a ku fonelako. Nzi ta wuya siku ginwani hi ta simama ku bhula hi mhaka leyi.

Sofia: Eyo. Nzi ta wona wena.b