100 wa malembe na Mufumo wu kari wu fuma — Zi ku khumbisa kuyini ke?

1, 2. Zini lezi a Mufumo wa Nungungulu wu to zi tatisa, niku hikuyini hi tiyisekako lezaku a Mufumo wu tata ke?

NA A hi ka xitsunga xo kari kusuhani ni Kapernaume kusanguleni ka ximumu xa 31 Nguveni ya Hina, Jesu Kristu i lo gonzisa valanzeli vakwe a ku khongela vaku: “A wute mufumo wa wena.” (Mat. 6:10) Inyamutlha, a votala va kanakana lezaku a Mufumo wu ta tshuka wuta. Hambulezo, ha tiyiseka lezaku a mikhongelo ya hina hi yi mahako hi mbilu yontlhe ya lezaku a wute a Mufumo wa Nungungulu yi ta hlamuliwa.

² Jehova i ta tirisa a Mufumo lezaku a tlhanganyisa a ngango wakwe wa le tilweni ni wa laha misaveni. A kungo lego ga Nungungulu gi ta tatiseka. (Isa. 55:10, 11) Kunene, Jehova i sina a mahile Hosi masikwini ya hina! A zilo zo tsakisa nguvu zi mahekileko ka 100 wa malembe lawa ma hunzako zi tiyisa mhaka leyi. Nungungulu i maha mitiro ya hombe ni yo saseka nguvu kasi ku vuna timiliyoni ta malanza yakwe yo tsumbeka. (Zak. 14:9; Kuv. 15:3) Hambulezo, a kuva Jehova a maha Hosi a hi zona zinwe ni kuta ka Mufumo wa Nungungulu lowu Jesu a nga hi gonzisa ku wu khongelela. Xana a zimaho lezi zi hambanisa kuyini, niku zi hi khumbisa kuyini?

A HOSI YA JEHOVA YI YIMISILWEKO YI SANGULA KU TIRA

3. (a) Hi rini laha Jesu a nga yimiswa kota Hosi, niku kwihi? (b) U nga kombisa kuyini hi ndlela yi kholwisako lezaku a Mufumo wu yimisilwe hi 1914? (Wona tlhamuselo wa lahasi.)

³ Na ziya kumbheleni ka zana ga malembe ga wu 19, a kuwonekela ku lo sangula ku woninga ka xiprofeto xa Danieli xi tsalilweko ka 2.500 wa malembe ma hunzileko xaku: “A masikwini ya tihosi leto, Nungungulu wa le tilweni i ta vuxa a mufumo wu to kala wu nga lobyiswi.” (Dan. 2:44) A Zigonzani za Biblia zi lo mbheta makume ya malembe na zi komba lezaku a lembe ga 1914 gi wa tava ga lisima nguvu. A vanhu vo tala xikhatini lexo va wa rinzela za zi nene. Xungetano hi mhaka leyi, a mutsali wo kari i te ngalo: “A tiko hi va 1914 gi wa tele hi kutsumba ni lezaku a vanhu va wa rinzela za zi nene.” Hambulezo, laha ku nga vuka a Yimpi yo Sangula ya Misava kumbheleni ka lembe lego, a xiprofeto xa Biblia xi lo tatiseka. A tindlala, kutsekatseka ka misava, ni mitungu lezi zi nga lanzela zinwe ni kutatiseka ka ziprofeto zinwani za Biblia zi lo komba ziku dlunya lezaku Jesu Kristu i wa sangulile ku fuma le tilweni kota Hosi ya Mufumo wa Nungungulu hi 1914.a Hi ku yimisa N’wana wakwe kota Hosi ya wuMessia, hakunene Jehova i lo maha Hosi hi tshamela giswa!

4. Zini lezi a Hosi leyi yi nga ha hi ku yimiswa yi nga tekela ku zi maha, niku xana anzhako ka lezo yi yisile kupima kakwe ka mani ke?

⁴ A ntiro wo sangula lowu a Hosi leyi ya Nungungulu yi nga ha hi ku yimiswa yi nga wu maha kuve kulwa yimpi na Satani, a Nala wa hombe wa Dadani wakwe. Jesu ni tingelosi takwe va lo hlongola Satani ni madimoni yakwe le tilweni. Lezo zi lo neha litsako la hombe le tilweni kanilezi zi lo neha khombo ni hlomulo laha misaveni zaku zi wa nga se tshuka zi woniwa. (Gonza Kuvululelwa 12:7-9, 12.) Hi kulanzela, a Hosi yi lo yisa kupima ka malanza yakwe ya laha misaveni lezaku yi ma basisa, ku ma gonzisa, ni ku ma xaxameta kasi ma maha kuranza ka Nungungulu. A hi woneni lezi a hlamulo wabye ka mitiro leyi ya yinharu ya Mufumo wu hi nyikisako zona a xikombiso xi nene xa ku xi lanzela nyamutlha.

A HOSI YA WUMESSIA YI BASISA A MALANZA YAKWE YO TSUMBEKA

5. Kubasisa muni ku mahilweko xikari ka 1914 kala kusanguleni ka 1919?

⁵ Anzhako ka loku a Hosi yi basisile a matilo ka kucetelo wa Satani ni madimoni yakwe, Jehova i lo kongomisa Jesu lezaku a hlola ni ku basisa a valanzeli vakwe laha misaveni hi tlhelo ga moya. Muprofeti Malaki i tlhamusele a ntiro lowo kota kubasisa ka moya. (Mala. 3:1-3) A matimu ma komba lezaku a ntiro lowo wu mahekile xikari ka 1914 kala ka xipanze xo sangula xa 1919.b Kasi hiva ziro za ngango wa Jehova wa wuako gontlhe hi fanele ku basa, kutani ku hlazeka. (1 Ped. 1:15, 16) Hi fanele ku ti wonela kasi hi nga chakiswi hi wukhongeli ga mawunwa kutani hi politika ya tiko legi.

6. Xana a zakuga za moya zi phameliswa kuyini, niku hikuyini zi nga za lisima?

⁶ Hi kulanzela, Jesu i lo tirisa a ntamu wakwe wa wuhosi kasi ku yimisa a “nanza gi tsumbekileko ni go tlhariha.” A nanza legi gi wa ta phamela zakuga za zi nene za moya hi xikhati xi faneleko ka vontlhe lava va wumbako a “ntlhambi munwe” wu nga mandleni ya Jesu. (Mat. 24:45-47; Joh. 10:16) Kusukela 1919, a ntlawa wutsongwani wa vamakabye va xinuna va totilweko wu kari wu tatisa a ntiro lowu wo binza hi kutsumbeka wa ku gisa “malanza.” A zakuga lezi za moya zo tala zi phamelwako hi canja ga ntlawa lowu za hi wundla kasi hi kula kukholweni. Zi tiyisa a kutiyimisela ka hina ka ku tshama na hi basile hi tlhelo ga moya, ga mahanyela, ga maalakanyo, ni ga miri. A zakuga lezi za moya za hi gonzisa ni ku hi hlomisa kambe lezaku hi ti tsitsirita ntirweni wa lisima ka yontlhe yi mahiwako laha misaveni nyamutlha. Xana wa lonzowota khwatsi a zakuga lezo za moya ke?

A HOSI YI GONZISA A MALANZA YAKWE LEZAKU MA XUMAYELA MISAVENI YONTLHE

7. I ntiro muni wa lisima lowu Jesu a nga wu sangula a xikhati lexi a nga hi laha misaveni, niku wu ta simama kala rini?

⁷ A xikhati lexi Jesu a nga sangula a wutireli gakwe laha misaveni i lo tivisa aku: “Nzi yimelwe hi ku kanela a ivangeli ya mufumo wa Nungungulu ni ka yinwani miti; hakuva nzi rumelwe lezo.” (Luka 4:43) Ka malembe manharu ni khihlanya, Jesu i lo ti tsitsirita nguvu ntirweni lowu. I lo leletela vapizani vakwe aku: “Kufambeni ka nwina kanelani muku: A mufumo wa tilo wu tshinele.” (Mat. 10:7) Anzhako ka kuvuxiwa kakwe, Jesu i lo profeta lezaku a valanzeli vakwe va wa ta hangalasa mahungu lawa “kala le magemeta-musi ya misava.” (Miti. 1:8) I lo va tsumbisa lezaku yena wutsumbu i wa ta maha ntiro lowo kala masikwini ya hina.  —  Mat. 28:19, 20.

8. Xana a Hosi yi ma hlanganyetisile kuyini a malanza ya yona ya laha misaveni lezaku ma tira ke?

⁸ Kala 1919, a “ivangeli leyi ya mufumo” yi wa patsa ni mahungu maswa. (Mat. 24:14) A Hosi makunu yi wa sangulile ku fuma le tilweni, ni lezaku yi wa hlengeletile a ntlawa wutsongwani wa malanza ma basisilweko laha misaveni. Va lanzele hi timbilu ti longileko a xileletelo xa Jesu xa ku xumayela misaveni yontlhe a mahungu yo saseka ya Mufumo wa Nungungulu wu yimisilweko! (Miti. 10:42) Hi xikombiso, xipimo xa 20.000 wa vaseketeli va Mufumo va lo tlhangana ka gotsovanyano wa matiko manyingi le Cedar Point, Ohio, Estados Unidos, hi Setembro wa 1922. Hi nga zama ku alakanyela lezi va nga tsakisa zona a xikhati lexi Makabye Rutherford a nga veka kanelo yi nga hi ni hloko ya mhaka “A Mufumo” zonake aku: “Langutani, a Hosi ya fuma makunu! Nwina mu vahuweleli va yona. Hikwalaho, huwelelani, huwelelani, huwelelani, a Hosi ni mufumo wa yona.” A 2.000 wa lava va nga hi kona va lo vumela a xileletelo lexo hi ku tira ka “Siku ga Ntiro” ga kuhlawuleka, va enzela miti yi nga kumeka ka 72 wa tikilometro kusukela laha va nga mahela kona gotsovanyano. Hi kota ya lezi va nga hlanganyetilwe kasi va tira, a wokari a nga hi kona i lo hlamala aku: “Cima nzi nga ta rivala a xirambo lexi xa lezaku ku huwelelwa a Mufumo ni kuhiseka ka xidlemo lexi xi nga tsombene!” A hi yena yece a ga hlamala.

9, 10. (a) Malulamiselo muni ma mahiwako kasi ku gonzisa a vaxumayeli va Mufumo? (b) Xana wena wutsumbu u vunekisa kuyini hi gonziselelo leyo?

⁹ Kala 1922, ku wa hi ni kuhunza a 17.000 wa vahuweleli va Mufumo va nga xumayela ka 58 wa matiko misaveni yontlhe. Hambulezo, va wa ha lava ku gonzisiwa. Ka zana ga malembe go sangula, a Hosi yi Hlawulilweko yi lo nyika a vapizani vakwe a zileletelo zo dlunyateka xungetano hi lexi va faneleko ku xumayela, ko xumayela kona ni maxumayelela ya kona. (Mat. 10:5-7; Luka 9:1-6; 10:1-11) Hi ku lanzela a mahela legi nyamutlha, Jesu i chela nguvu kota ka lezaku vontlhe lava va tirako ntirweni wa ku xumayela Mufumo va gonzisiwa va tlhela vava ni zitiro lezi zi lavekako kasi ku xumayela hi ndlela yi nene. (2 Tim. 3:17) Hi ku tirisa a bandla ga wuKristu, Jesu i gonzisa malanza yakwe lezaku ma maha wutireli. A yinwe ya tindlela a ti tirisako kasi ku va gonzisa Xikola xa Wutireli ga Nungungulu, lexi xi fambiswako ka ginwe ni ginwani ga mabandla yo hunza 111.000 misaveni yontlhe. Hi ku lonzowota khwatsi a gonziselelo leyi, a vaxumayeli vo hunza a 7.000.000 makunu va hlomile kasi ku xumayela ni ku gonzisa hi ndlela yo khumba vanhu va tixaka tontlhe. — Gonza 1 Va Le Korinte 9:20-23.

¹⁰ Ahandle ka Xikola xa Wutireli ga Nungungulu, ku na ni zikola zinwani za Biblia zi yimiswako kasi ku gonzisa madota ya bandla, maphayona, vamakabye va magwenza, mipatswa ya maKristu, ziro za Kometi ya Ravi ni vasati vabye, vawoneleli va fambafambako ni vasati vabye, ni varumiwa.c A zigonzani za ntlawa wo kari wa Xikola xa Biblia xa Mipatswa ya Makristu zi kombisile a kubonga kabye hi xikola lexo hi magezu lawa: “A gonziselelo yo hlawuleka leyi hi nga yi kuma yi etisile a liranzo la hina hi Jehova ni ku hi longiselela lezaku hi vuna vanwani.”

11. Xana a vaxumayeli va Mufumo va zi kotisa kuyini a ku timisela hambu lezi va vukelwako ke?

¹¹ Satani a ngagi gi relela laha a wonako a kutikarata loku ka ku xumayela ni ku gonzisa xungetano hi Mufumo loku ku yako mahlweni. Hikwalaho, i tirisa tindlela to kongoma ni ta wumbyori lezaku a vukela mahungu ya Mufumo ni vahuweleli va wona kasi ku nyimisa ntiro lowu. Kanilezi, a mizamo ya nala loyi a yi bhinzuli. Jehova i tshamisile a N’wana wakwe “hehla ka mifumo, ni mintamu, ni wukulu, ni wuhosi.” (Efe. 1:20-22) Kota Hosi, Jesu i tirisa a ntamu wa wuhosi gakwe lezaku a vikela ni ku rangela vapizani vakwe kasi a kuranza ka Dadani wakwe ku maheka.d A mahungu yo saseka ma xumayelwa, ni lezaku a vanhu va timiliyoni va timbilu ti nene va gonziswa a tindlela ta Jehova. Hi nga wona a lungelo go saseka legi hi nga nago ga ku mahawu a ntiro lowu wa hombe!

A HOSI YI XAXAMETA A MALANZA YA YONA KASI MA MAHA NTIRO WA HOMBE

12. Tlhamusela a zilo zo kari zi xaxametilweko hi ndlela ya chukwana kusukela loku a Mufumo wu yimisilwe.

¹² Kusukela kuyimisweni ka Mufumo hi 1914, a Hosi yi kari yi chukwatisa a ndlela yo xaxameta a malanza ya Nungungulu kasi ma maha kuranza ka Dadani wakwe. (Gonza Isaya 60:17.) Hi 1919, ku lo yimiswa a murangeli wa ntiro ka bandla ginwe ni ginwani kasi ku rangela ntirweni wa kuxumayela. Hi 1927, ku lo xaxametwa a ntiro wa ku xumayela hi muti ni muti hi tiSoto hi kukhanzakanya. A vaseketeli va Mufumo va lo kuciwa lezaku va engetela a ntiro hi 1931, a xikhati lexi va nga vumela a vito ga lomu Mitsalweni gaku Timboni ta Jehova. (Isa. 43:10-12) Hi 1938, ku lo fuvisiwa a hlawula-mani wa vavanuna lava va nga ringanelwa hi wutihlamuleli mabandleni, a vavanuna lavo va sangula ku yimiswa hi kuya hi lulamiselo ga Nungungulu. Hi 1972, a bandla gi lo sangula ku wonelelwa hi hubye ya madota wutshanwini ga ku wonelelwa hi dota ginwe ga bandla. A vavanuna vontlhe va ringanelwako va lo kuciwa lezaku va kuma malungelo kasi va ‘risa a ntlhambi wa Nungungulu lowu va nga nawo.’ (1 Ped. 5:2) Hi 1976, a Hubye yi Fumako yi lo xaxametwa hi ntlhanu wa tikometi ni yinwe kasi ku wonelela a ntiro wa Mufumo misaveni yontlhe. Hi kufaneleko, a Hosi ya Jehova yi yimisilweko yiya mahlweni yi xaxameta a malanza ya Mufumo hi mahela ga Nungungulu.

13. Xana lezi a Mufumo wu zi mahileko nzeni ka 100 wa malembe lawa wu nga nawo na wu fuma zi ku khumbisa kuyini?

¹³ Hi nga ehleketa ku zilo zingani lezi a Hosi ya wuMessia yi zi mahileko nzeni ka 100 wa malembe lawa yi nga nawo na yi fuma. Yi basisile vanhu lava va vitwako hi vito ga Jehova. Yi kari yi rangela a ntiro wa ku xumayela a mahungu yo saseka ya Mufumo ka 239 wa matiko niku yi gonzisile vanhu va timiliyoni xungetano hi tindlela ta Jehova. Yi hlengeletile a ku hunza 7.000.000 ta malanza yo tsumbeka, lawa a ginwe ni ginwani ga wona gi ti hendleletako hi kuziranza kasi ku maha kuranza ka Dadani wakwe. (Tis. 110:3) Hakunene, a mitiro leyi Jehova a yi mahako hi ku tirisa Mufumo wa wuMessia nja hombe niku ya hlamalisa. Ka ha hi ni zimaho zinwani zo hlamalisa nguvu za ha tako!

MAKATEKWA MA TO TISWA HI MUFUMO WA WUMESSIA XIKHATINI XI TAKO

14. (a) Xana hi kombela Nungungulu lezaku a maha yini a xikhati lexi hi khongelako hiku: “A wute mufumo wa wena”? (b) Hi wihi a mutsalo wa hina wa lembe ga 2014, niku hikuyini wu fanelako?

¹⁴ Hambu lezi Jehova a yimisileko N’wana, Jesu Kristu, kota Hosi ya wuMessia hi 1914, lowo a wu vangi hlamulo wo mbhelela wa mukhongelo wa hina waku, “a wute mufumo wa wena.” (Mat. 6:10) Zi sina zi profetilwe lomu ka Biblia lezaku Jesu i wa ta “fuma . . . xikari ka valala [vakwe].” (Tis. 110:2) A mifumo ya vanhu yi nga mandleni ya Satani ya ha vukela Mufumo wa Nungungulu. A xikhati lexi hi khongelako hiku a wute a Mufumo, hi kombela ka Nungungulu lezaku a Hosi ya wuMessia ni vafumeli-kulobye vata va ta lovisa a mifumo ya vanhu va tlhela va swiyela lava va vukelako a Mufumo Wakwe laha misaveni. A ximaho lexi xi ta tatisa a magezu ya Danieli 2:44 ya lezaku a Mufumo wa Nungungulu “wu ta panza wu lovisa yontlhe mifumo leyi.” Wu ta fuvisa a valala va politika va Mufumo Wakwe. (Kuv. 6:1, 2; 13:1-18; 19:11-21) A xikhati xa kuva lezo zi maheka xi laha kusuhani nguvu. A zo kusaseka lezi a mutsalo wa hina wa lembe ga 2014, ku nga lembe legi ku tlhanganyiswako a 100 wa malembe ya kuyimiswa ka Mufumo wa Nungungulu le tilweni wuva Mateu 6:10: “A wute mufumo wa wena”!

15, 16. (a) Zilo muni zo tsakisa zi to maheka xikari ka Kufuma ka 1.000 wa Malembe? (b) Wu tava wihi a ntiro wo gumesa wa Jesu kota Hosi ya wuMessia, niku xana lezo zi ta wula yini xungetano hi kungo ga Jehova ka zivangwa zakwe zontlhe ke?

¹⁵ Anzhako ka loku a Hosi ya wuMessia yi lovisile a valala va Nungungulu, yi ta hoxa Satani ni madimoni yakwe nkeleni wa lieswila hi 1.000 wa malembe. (Kuv. 20:1-3) Kota lezi a mukuceteli loyi wa kubiha a to ngha a valelwe, a Mufumo wu taya mahlweni wu tirisa a muphahlelo wa Jesu ni ku holisa a zifuta za xionho xa Adamu. A Hosi leyi yi ta vuxa a vanhu va tshanza-vahlayi va etleleko xilahleni yi tlhela yi xaxameta a longoloko wa gonziselelo ya ntamu xungetano hi Jehova. (Kuv. 20:12, 13) A misava yontlhe yi ta fana ni paradise ya le sinwini ga Edeni. A vanhu vontlhe vo tsumbeka va ta mbheleliswa.

¹⁶ Kumbheleni ka Kufuma ka Kristu ka 1.000 wa Malembe, a Mufumo wa wuMessia wu ta ngha wu tatisile a kungo ga wona. Zonake Jesu i ta nyikela a Mufumo ka Dadani wakwe. (Gonza 1 Va Le Korinte 15:24-28.) Ku nga ta hava ni xilaveko xa mutlhanganyisi xikari ka Jehova ni vana vakwe va laha misaveni. Vontlhe a vana va Nungungulu va le tilweni ni va laha misaveni va ta tlhanganyiswa ni Dadani wabye wa le tilweni kota ziro za ngango wakwe wa wuako gontlhe.

17. U ti yimisele ku maha yini xungetano hi Mufumo?

¹⁷ A zimaho zo tsakisa nguvu nzeni ka 100 wa malembe ya kufuma ka Mufumo za hi tiyisekisa lezaku Jehova a nga vumali xo maha ni lezaku a kungo gakwe xungetano hi misava gi ta tatiseka. Ngha hi simama kuva malanza yakwe yo tsumbeka ni ku huwelela Hosi ni Mufumo wa yona. Hi maha lezo na hi nga kanakani ne ni kutsongwani lezaku lokuloku Jehova i ta hlamula mukhongelo wa hina wa mbilu yontlhe waku: “A wute mufumo wa wena”!