Maha ziboho za wutlhari na wa ha hi muswa

1. Zilo muni zo tsakisa lezi a vaswa va maKristu va ti buzako hi zona?

HI HANYA ka xikhati xa lisima nguvu. Matinwini wontlhe, a ku se tshuka kuva ni xikhati xo fana ni lexi, laha a vanhu va timiliyoni va matiko wontlhe va hunzulukako va nghena wukhozelini ga lisine. (Kuv. 7:9, 10) A vaswa vo tala va ti buza hi matshango yo tsakisa a xikhati lexi va vunako vanwani lezaku va zwisisa a lisine la Biblia li hanyisako. (Kuv. 22:17) A vaswa vo kari va fambisa zigonzo za Biblia, va vuna vanhu lezaku va hanya wutomi ga gi nene. A vanwani va hisekela ku yisa mahungu yo saseka ka zipanze zi wulawulako a lirimi la matiko-wundle. (Tis. 110:3; Isa. 52:7) Xini u faneleko ku maha kasi uzwa litsako la ku hlengela ntirweni lowu a vanhu va Jehova va wu mahako ke?

2. Xana a xikombiso xa Timote xi zi kombisisa kuyini lezaku Jehova wa xuva ku nyika vaswa a wutihlamuleli? (Wona mufota kusanguleni ka nzima.)

² Kota muswa, u nga maha ziboho lezi hi nzhako ka xikhati zi to ku vululela nyangwa ya ku maha zotala ntirweni wa Nungungulu. Hi xikombiso, zi wonekisa ku khwatsi Timote wa le Listra i mahile ziboho za wutlhari lezi zi nga mu maha a kuma xiavelo xa wurumiwa a xikhati lexi kuzilava a nga hi ni 20 wa malembe. (Miti. 16:1-3) Zi wonekisa ku khwatsi ka tihwetana ti tsongwani ntsena, anzhako ka loku a vakaneti va tihanyi va kurumetile mupostoli Paule lezaku a tsika bandla legi gi nga ha hi ku yimiswa le Tesalonika, Paule i lo nyika Timote a ntiro wa lezaku a tlhela Tesalonika kasi ku ya tiyisa vamakabye. (Miti. 17:5-15; 1 Tes. 3:1, 2, 6) Xana wa zi kota ku alakanyela lezi Timote a faneleko ku ngha a ti zwisile zona hi ku nyikiwa a xiavelo lexi?

A XIBOHO XA WENA XA LISIMA KA ZONTLHE

3. Hi xihi a xiboho xa lisima ka zontlhe lexi u nga ha xi mahako wutomini ga wena, niku u nga xi maha xikhati muni?

³ A wuswa xikhati xa kumaha ziboho za lisima. Kanilezi, ku na ni xiboho xa lisima ku hunza zontlhe — ku nga xiboho xa wena xa ku tirela Jehova. Hi xihi a xikhati xa xi nene nguvu xa ku maha xiboho lexo ke? Jehova i ngalo: “Alakanya Muvangi wa wena masikwini ya wuswa ga wena.” (Mutsh. 12:1) A ndlela yinwe ntsena yo amukeleka ya ku “alakanya” Jehova ku mu tirela hi kumbhelela. (Deut. 10:12) A xiboho xa wena xa ku tirela Nungungulu hi mbilu yontlhe hi xona a xiboho xa lisima ka zontlhe u to zi maha wutomini ga wena. Hi xona xi to ku rangela ka zontlhe u to zi maha xikhatini xa ha tako. — Tis. 71:5.

4. Ahandle ka ku hlawula ku tirela Jehova, hi zihi zinwani ziboho za lisima wutomini lezi zi to khumba a ndlela leyi u mu tirelako ha yona Nungungulu?

⁴ Kunene, a xiboho xa wena xa ku tirela Jehova a hi xona xoce xi to khumba a wumanziko ga wena. Hi xikombiso, za koteka ku ngha u ti wutisa ku u ta chada ke, u ta chada na mani, niku u ta maha ntiro muni kasi ku ti hlayisa ke. Lezi ziboho za lisima, kanilezi wutlhari a ku sangula hi ku maha xiboho xa lezaku u ta tirela Jehova kala laha u zi kotako ke. (Deut. 30:19, 20) Hikuyini? Hakuva a ziboho lezi u zi mahako nyamutlha zi khumba ni za manziko. A xiboho lexi u xi mahako xungetano hi kuchada ni ntiro wa kutihanyisa xi ta khumba lezi u mu tirelisako zona Nungungulu. (Wona kambe Luka 14:16-20.) Hi tlhelo ginwani, a kuxuva ka wena ka ku tirela Nungungulu ku ta khumba a ziboho za wena xungetano hi ku kuchada ni ntiro wa kutihanyisa. Hikwalaho, ranga hi lezi za lisima nguvu u maha xiboho ka zona. — Fil. 1:10.

U TA MAHA YINI WUSWENI GA WENA?

5, 6. Kombisa lezi a ku maha ziboho zi nene zi nga ku vululelisako zona a ndlela ya ku kuma matshango ma nene a manziko wa siku. (Wona a nzima “Lezi nzi nga zi hlawula na nza ha hi nwanana” ka revista legi.)

⁵ Zalezi u mahako xiboho xa ku tirela Nungungulu, u ta tekela ku zi wona lezi yena a lavako lezaku u zi maha, niku u ta zi kota ku maha xiboho xa ndlela leyi u lavako ku mu tirela hi yona. A makabye wa xinuna wa le Japani i lo tsala lezi: “Na nza ha hi ni 14 wa malembe, nzi wa kari nzi xumayela ni dota ga bandla legi gi nga wona lezaku nzi wa nga xalaliswi hi ntiro wa kuxumayela. Hi ndlela yi nene, i te ngalo ka mina: ‘Famba kaya Yuichiro. Loku u chikela tshama hasi u ehleketa khwatsi hi lezi Jehova a ku maheleko.’ Nzi lo maha kota kuwula kakwe. Kunene, nzi lo simama ku ehleketa ni ku khongela kuringana masiku yo kari. Hi kutsongwani-kutsongwani, nzi lo cica a mawonela ya mina. Zalezo, nzi lo wona lezaku a ku tirela Jehova za nanziha. Nzi lo sangula ku tsakela ku lera mahungu xungetano hi varumiwa, niku zalezo nzi lo sangula ku alakanyela hi ku tirela Nungungulu kala laha zi kotekako ha kona.”

⁶ Yuichiro iya mahlweni aku: “Nzi lo sangula ku maha ziboho lezi a manziko wa siku zi nga wa ta nzi vumelela a ku tirela Jehova matiko-wundle. Hi xikombiso, nzi lo sangula ku gonza xiNgiza. Laha nzi nga mbheta xikola, nzi lo gonzisa xiNgiza, kanilezi nzi nga tiri xikhati xontlhe kasi nzi zi kota ku phayona. Laha nzi nga hi ni 20 wa malembe, nzi lo sangula ku gonza xiMongólia nzi tlhela nzi va ni thomo ga ku enzela a ntlawa wa vahuweleli wa vaMongólia. Malembe mambiri nzhako ka lezo, hi 2007, nzi lo enzela Mongólia. A xikhati lexi nzi ngaya kuxumayeleni ni maphayona yo kari nzi tlhela nzi wona lezaku a vanhu vo tala va wa hi ni tora ga lisine, nzi lo xuva ku rurela ka wutshamu lego kasi nzi ya va vuna. Nzi lo tlhela Japani nzi ya ti longisela. Nzi kari nzi phayona seno Mongólia kusukela hi Abril wa 2008. A wutomi a gi olovi ka wutshamu legi. Kanilezi a vanhu va vumela a mahungu yo saseka, niku nza zi kota ku va vuna lezaku va tshinela ka Jehova. Nza zi wona lezaku lezi nzi nga zi hlawula hi yona a ndlela ya chukwana ka tontlhe ya kuva nzi hanya wutomi ga mina.”

7. Ziboho muni hi faneleko ku ti mahela ha hoce, niku xikombiso muni lexi Mosi a hi nyikileko?

⁷ A munhu ni munhu i fanele ku ti mahela xiboho xa lezi a lavako ku maha hi wutomi gakwe kota Mboni ya Jehova. (Jox. 24:15) Hi nga ta ku byela lezaku chada kutani u nga chadi, u ta chada na mani, kutani ku u ta tira yini kasi ku ti hanyisa. Xana u ta hlawula ntiro lowu u to wu gonzela hi xikhatanyana ntsena? A vo kari va nwina vaswa va maKristu mu hanya zidoropaneni za wusiwana; a vanwani va hanya madoropeni yo ganya. Misaveni yontlhe, ma hambana nguvu hi wumunhu, wutivi, wutlhari ga kumaha zilo, lezi mu zi lavako, ni kukholwa. Kuzilava mu hambene nguvu a ku fana ni lezi a vaswa va vaHeberu va nga hambanisile zona ni jaha Mosi le Gipite wa kale. I wa hi ni malungelo wontlhe ma nga kumiwa hi vana va tihosi, kuveni a vaHeberu lava vanwani va wa hi tikhumbi. (Ekso. 1:13, 14; Miti. 7:21, 22) A ku fana na nwina, vonawu va wa hanya xikhatini xa lisima nguvu. (Ekso. 19:4-6) A munwe ni munwani wabye i wa fanele ku hlawula lezi a nga wa ta zi maha wutomini gakwe. Mosi i lo maha xiboho xi nene. — Gonza Maheberu 11:24-27.

8. Xivuno muni xi nga kona ka vaswa lava va alakanyelako hi ku maha ziboho wutomini gabye?

⁸ Jehova wa mu vuna ku maha ziboho za wutlhari wusweni ga nwina. Hi ku tirisa matshinya ya milayo, i mu nyika wusungukati ga kuva mu gi tirisa ka ziyimo lezi mu kumanako nazo hi lezi mu nga vaswa. (Tis. 32:8) Tlhatakumbiri, a vapswali va nwina va maKristu ni madota ya bandla va nga mu vuna ku ehleketa hi ndlela yo tirisa a matshinya lawo ya milayo. (Mav. 1:8, 9) A hi wulawuleni hi matshinya manharu ya milayo ya Biblia lawa ma nga mu vunako ku maha ziboho za wutlhari lezi zi to khumba a wumanziko ga nwina hi ndlela yi nene.

MATSHINYA MANHARU YA MILAYO YA BIBLIA YA KU KU RANGELA

9. (a) Xana Jehova i hi dzunzisa kuyini hi ku hi tsika hi ti hlawulela? (b) Xana a ku ‘lava Mufumo kuranga’ zi hi vululela tindlela muni?

⁹ A kuranga lava a Mufumo wa Nungungulu ni kululama kakwe. (Gonza Mateu 6:19-21, 24-26, 31-34.) Jehova wa hi dzunza hi ku hi tsika hi ti hlawulela. A nga wuli lezaku malembe mangani u faneleko ku ma mbheta wusweni ga wena na u xumayela hi Mufumo. Kanilezi Jesu i hi nyikile a tshinya ga nayo ga lisima ga lezaku hi lava Mufumo kuranga. Lezi u tirisisako zona lezi a nga zi wula zi ta ku vululela tindlela ta ku kombisa a liranzo la wena ka Nungungulu, kukhatala ka wena hi vaakelani, ni lezi u xi tsakelisako zona a xitsumbiso xa wutomi ga pinzukelwa. A xikhati lexi u alakanyelako hi kuchada ni ntiro wa kutihanyisa, ehleketa lezaku xana a ziboho za wena zi to ku maha u karatekela a zilo za nyama kutani zi ta ku maha u kombisa kuhiseka ka wena hi Mufumo wa Nungungulu ni kululama kakwe ke.

10. Zini zi nga maha Jesu ava munhu wo tsaka, niku ziboho muni zi to ku nehela litsako?

¹⁰ Kuma litsako hi ku tirela vanwani. (Gonza Mitiro 20:20, 21, 24, 35.) Hi ndlela yi nene, Jesu i lo hi gonzisa a tshinya legi ga nayo ga lisima wutomini ga hina. I wa hi munhu wo tsaka nguvu hakuva i wa maha kuranza ka Dadani wakwe na ku nga hi ka yena wutsumbu. Jesu i wa tsaka nguvu hi ku wona vanhu vo rula na va vumela mahungu yo saseka. (Luka 10:21; Joh. 4:34) Kuzilava wenawu u sina u li zwile litsako u vileko nalo hi ku vuna vanwani. Loku a ziboho za hombe lezi u mahako wutomini ga wena u zi seketela ka matshinya ya milayo lawa Jesu a nga ma gonzisa, handle ko kanakana u tava ni litsako wena wutsumbu u tlhela u tsakisa Jehova kambe. — Mav. 27:11.

11. Hikuyini Baruke a nga mbhelelwe hi litsako, niku wusungukati muni legi Jehova a nga mu nyika?

¹¹ A litsako la hina la hombe ka tontlhe lita hi ku tirela Jehova. (Mav. 16:20) Zi wonekisa ku khwatsi Baruke, a matsalani wa Jeremia, i wa rivele a mhaka leyi. Ka xikhati xo kari, i wa nga ha tsakiswi hi ku tirela Jehova. Jehova i te ngalo kakwe: “Xana u ti lavela a zilo za hombe ke? U nga zi lavi, hakuva nzi ta neha makhombo hehla ka nyama yontlhe, . . . a wutomi ga wena nzi ta ku nyika giku khwatsi muphango matshanwini wontlhe lawa u ta ngaya ka wona.” (Jer. 45:3, 5) U alakanya yini? Xini xi nga wa ta neha litsako ka Baruke — ku ti lavela zilo za hombe kutani ku pona a kuloviswa ka Jerusalema kota nanza go tsumbeka ga Nungungulu ke? — Jak. 1:12.

12. Kuhlawula muni ku vunileko Ramiro lezaku a ti buza hi wutomi go tsakisa ke?

¹² A makabye wo kari wa xinuna loyi a kumileko a litsako hi ku tirela vanwani hi Ramiro. I ngalo: “Nzi huma ka ngango wa wusiwana wu hanyako ka xidoropana xo kari Zitsungeni za Andes. Hikwalaho, a xikhati lexi a nhonzo ya mina yi nga nzi byela lezaku yi lava ku nzi hakhelela a universidade, gi wa hi thomo ga hombe. Kanilezi nzi wa ha hi ku bapatizwa kota Mboni ya Jehova, niku nzi wa amukele a xinwani xinyikiwo — nzi wa rambilwe hi phayona lezaku hi ya xumayela zinwe ka xidoropana xo kari. Nzi loya ka wutshamu lego, zonake nzi ya gonza ku tsema misisi kasi nzi kuma mali ya kutihanyisa. Laha hi nga ti karatela ku gonzisa vanhu a Mitsalo, a votala va lo vumela. Hi nzhako ka xikhati, nzi loya ka bandla gi wulawulako lirimi labye la mabeleko gi nga ha hi ku yimiswa. Makunu nzi na ni khume ga malembe na nzi tira kota phayona ga xikhati xontlhe. A ku na wunwani ntiro wu nga wa ta nzi nyika litsako la ku hunza leli nzi li zwako hi ku vuna vanhu lezaku va gonza mahungu yo saseka hi lirimi labye la mabeleko.”

13. Hikuyini a wuswa gi nga xikhati xi nene xa ku tirela Jehova kala laha u zi kotako?

¹³ Ti buze hi ku tirela Jehova wusweni ga wena. (Gonza Mutshawuteli 12:1.) U nga alakanyi lezaku u fanele ku sangula hi ku kuma ntiro wa wu nene hi kona u to tirela Jehova hi nzhako ka xikhati. A wuswa xikhati xi nene xa ku sangula ku tirela Jehova kala laha u zi kotako. A vaswa vo tala a va na wutihlamuleli go binza ga ngango niku va na ni lihanyo li nene ni ntamu wa ku tatisa ziavelo zo karata. Zini lezi u nga wa ta tsakela ku mahela Jehova wusweni ga wena ke? Kuzilava u na ni mixuvo ya kuva phayona. U nga ha navela ku ya tira sinwini ga lirimi la matiko-wundle. Kuzilava wa wona tindlela to engetela wutireli ga wena ka bandla legi u nga ka gona zalezi. Kani u xuva ku maha yini ntirweni wa Nungungulu, tiva lezaku u fanele kuva ni ntiro wa kutihanyisa. Xikhati muni u to xi lava kasi ku gonzela ntiro lowo? Kona i ntiro muni?

TIRISA A MATSHINYA YA MILAYO YA BIBLIA KASI U MAHA ZIBOHO ZA WUTLHARI

14. Zini u faneleko ku ti wonela ka zona a xikhati lexi u mahako makungo ya xikhati xi tako?

¹⁴ A matshinya manharu ya milayo ya Biblia lawa hi ma gonzileko ma nga ku vuna a ku alakanyela hi mitiro leyi yi nga kona kasi u hlawula wokari. Handle ko kanakana, a masungukati ya xikola ma tiva xo kari xungetano hi mitiro leyi yi nga kona xipanzeni xa nwina. Za koteka ku a hofisa yo kari ya mufumo yi ku byela xungetano hi mitiro yi nga kona xipanzeni xa nwina kutani ka wutshamu legi u alakanyelako ku ya tira ka gona. A mahungu lawo ma nyikiwako hi vanhu kutani tihofisa ta tiko ma nga ku vuna — kanilezi ti wonele. A vanhu lava va nga mu ranziko Jehova va nga zama ku byala liranzo la tiko mbilwini ya wena. (1 Joh. 2:15-17) A xikhati lexi u cuwukako zilo zi nga lomu tikweni, a mbilu ya wena yi nga ku khohlisa hi kuolova. — Gonza Mavingu 14:15; Jer. 17:9.

15, 16. Himani a munhu wa chukwana wa ku ku nyika wurangeli xungetano hi ntiro wa kutihanyisa?

¹⁵ Zalezo u tivako a mitiro leyi yi nga kona u fanele ku va ni wusungukati gi nene. (Mav. 1:5) Himani a to ku vuna ku alakanyela hi mitiro leyi yi nga kona hi kuya hi matshinya ya milayo ya Biblia? Ingisa a wusungukati ga vanhu lava va ranzako Jehova, va ranzako wena, va ku tivako khwatsi ni matshamela ya wena. Va ta ku vuna ku alakanyisisa hi ntamu wa wena ni mixuvo ya wena. Kuzilava lezi va to ku byela zi ta ku vuna ku tlhela u alakanyela hi mixuvo ya wena. Hi nga wona makatekwa u nga nawo loku ku hi lezaku a vapswali va wena va mu ranza Jehova! Ahandle ka lezo, a madota ya bandla ga wena vavanuna va buvileko hi tlhelo ga moya lava va zi kotako ku ku rangela. Tlhatakumbiri, wulawula ni maphayona ni vawoneleli va fambafambako. Hikuyini va nga hlawula a ntiro wa xikhati xontlhe ke? Va sangulisile kuyini ku phayona, niku va xi kumisa kuyini xa ku ti hanyisa? Litsako muni va li kumako hi wutireli gabye? — Mav. 15:22.

¹⁶ Lava hakunene va ku tivako khwatsi va nga ku nyika wusungukati hi wutlhari. Hi xikombiso, a hi nga zi veke laha kaku u lava ku tsika xikola sekundaria hi ku fela ku phayona nguvunguvu hi kota ya lezi u nga ranziko a ntiro wo binza lowu a xikola xi wu lavako ka wena. A munhu loyi a ku ranzako a nga pola lexi xi ku mahako u lava kuva phayona a tlhela a ku vuna a ku tiva lezaku a xikola xi nga ku vuna a ku gonza ku timisela u nga tsutsumeli ku tsukula, ku nga tshamela ga lisima loku ku hi lezaku u xuva ku tirela Jehova hi xikhati xontlhe. — Tis. 141:5; Mav. 6:6-10.

17. Ziboho muni lezi hi nga faneliko ku zi maha ne khati ginwe?

¹⁷ Ni wihi a tirelako Jehova i ta kumana ni zikarato hi tlhelo ga moya — ku nga mikucetelo yi zi kotako ku mu hambukisa a tsika ku tirela Jehova. (1 Kor. 15:33; Kol. 2:8) Kanilezi a mitiro yo kari yi ngava ni khombo ga hombe hi tlhelo ga moya a ku hunza yinwani. Xana ku na ni vokari xipanzeni xa nwina va nga “lahlekelwa hi kukholwa kabye” anzhako ka ku hlawula ntiro wo kari? (1 Tim. 1:19) Hakunene wutlhari a ku nga mahi ziboho lezi zi nga wa ta veka mhangweni a kuzwanana ka wena na Nungungulu. — Mav. 22:3.

TI BUZE HI KUVA MUSWA WA MUKRISTU

18, 19. Loku a wokari a nga se tizwa na a byekelele ku tirela Jehova, xini a faneleko ku maha ke?

¹⁸ Loku a mbilu ya wena yi xuva ku tirela Jehova, ti buze hi malungelo lawa u ma kumako hi kuva nanza ga Nungungulu ga ha hiko muswa. Maha ziboho lezi zi to ku vululela ndlela ya ku ti buza hi ku tirela Jehova xikhatini lexi xa lisima nguvu. — Tis. 148:12, 13.

¹⁹ Hi tlhelo ginwani, xini u faneleko ku maha loku ka xikhati lexi u nga tizwi na u byekelele ku tirela Jehova? U nga tsiki a ku ti karatela ku tiyisa ku kholwa ka wena. Anzhako ka loku mupostoli Paule a tlhamusele lezaku i wa ti karatela ku lanzela a mahanyela lawa a nga wa ta katekiswa hi Nungungulu hi kota ya wona, i lo tsala lezi: “Loku mu alakanya zinwani hi xilo xo kari, lexo kambe Nungungulu i ta xi vulula ka nwina. Kanilezi a hi fambeni hi lezi hi chikeleko ka zona.” (Fil. 3:15, 16) Simama ku ehleketa hi liranzo la Nungungulu ni wusungukati gakwe ga liranzo. Jehova hi yena munhu wa chukwana ka vontlhe a to ku vuna ku maha ziboho za wutlhari wusweni ga wena.