Lezi nzi nga zi hlawula na nza ha hi nwanana

Nzi wova ni khume ga malembe ntsena hi 1985, a xikhati lexi a vanana va tako hi Camboja va nga chikela xikoleni xa mina le Columbus, Ohio, Estados Unidos. A mufanyana wo kari i wo tiva magezu matsongwani ntsena ya xiNgiza. Hi ku tirisa mifota, i lo sangula ku nzi hlawutela mahungu yo tsema hlana ya tixanisa, kudayana, ni tindlela leti va nga ti tirisa kasi ku pona tixanisa leto. Loku nzi etlele ni wusiku nzi alakanyela hi vanana lavo nzi wo rila. Nzi wa lava ku va bhulela xungetano hi xitsumbiso xa Paradise ni kuvuxiwa ka vafileko, kanilezi va wa nga xi tivi xiNgiza. Hambu lezi nzi nga ha hi mufanyana, nzi lo zi wona na zi hi chukwana a ku gonza xiCamboja kasi nzi fela ku bhula ni zigonzani-kulori xungetano hi Jehova. Ka xikhati lexo ne nzi wa nga zi tivi lezaku a xiboho lexo xi wa ta nzi vuna nguvu ka masiku ma tako.

A ku gonza xiCamboja zi wa karata. Nzi lavile ku tsukula makhati mambiri, kanilezi Jehova i lo tirisa vapswali va mina lezaku va nzi nyika ntamu. Hi kufamba ka xikhati, a vagonzisi va mina ni zigonzani-kulori va lo sangula ku nzi kuca lezaku nzi gonzela ntiro wa timali. Kanilezi nzi wa lava ku maha phayona. Hikwalaho, nzi lo susa makurso xikola sekundaria lawa ma nga wa ta nzi vumelela ku kuma ntiro wa kutihanyisa wa ku nga tiri xikhati xontlhe kasi nzi zi kota a ku tatisa mixuvo ya mina. Loku nzi wuya hi xikoleni, nzi wa tlhangana ni maphayona kasi hiya sinwini. A xinwani kambe nzi nga xi maha ku wa hi ku vunetela zigonzani lezi zi nga gonza xiNgiza kota lirimi la wumbiri — a xiboho lexo xi lo nzi vuna nguvu hi nzhako ka xikhati.

Laha nzi nga hi ni 16 wa malembe, nzi lozwa lezaku ku na ni ntlawa wa xiCamboja le Long Beach, California, Estados Unidos. Nzi lo enza nziya seyo nzi tlhela nzi ya gonza ku lera xiCamboja. Zalezi nzi nga mbheta xikola, nzi lo maha phayona nzi tlhela nzi simama ku xumayela vanhu hi xiCamboja va nga tshama kusuhani ni laha kaya. Laha nzi nga hi ni 18 wa malembe, nzi lo alakanyela hi ku rura nziya Camboja. Gi wa ha hi wutshamu ga gujeguje, kanilezi nzi wa zi tiva lezaku va tsongwani nguvu xikari ka 10.000.000 wa vanhu va hanyako Camboja va zwileko a mahungu yo saseka ya Mufumo. Ka xikhati lexo, ku wova ni bandla ginwe ntsena gi nga hi ni 13 wa vahuweleli tikweni gontlhe. Nzi yile Camboja hi khati go sangula na nzi hi ni 19 wa malembe. Malembe mambiri nzhako ka lezo, nzi lo rura nziya hanya seyo. Nzi lo kuma a ntiro wa ku nga wu mahi xikhati xontlhe wa ku hunzulusela ni ku gonzisa xiNgiza kasi nzi kuma mali ya ku ti hlayisa wutirelini ga mina. Hi kufamba ka xikhati, nzi lo teka sati loyi a nga ni mixuvo yo fana ni leyi ya mina. Hi wumbiri ga hina, ha tsaka nguvu hi ku vuna vanhu vo tala va vaCamboja lezaku va ti hendleleta ka Nungungulu.

Jehova wa nzi nyika ‘a kuxuva ka mbilu ya mina.’ (Tis. 37:4) A ku maha vapizani hi wona a ntiro wo tsakisa a ku hunza yontlhe. Ka 16 wa malembe lawa nzi nga Camboja, a ntlawana wa 13 wa malanza ya Jehova wu anzile wuva 12 wa mabandla ni mune wa mitlawa! — Hi kuwula ka Jason Blackwell.