“A wute mufumo wa wena” — Kanilezi wu tata rini?

1, 2. (a) Xini xi hi mahako hi tsanzeka ku wona zilo zo kari hi nga nazo kwalaha? (b) Xini hi xi tivako hi Mufumo wa Nungungulu?

KOTA lezi u faneleko ku ngha u zi wonile, a vanhu lava va wonileko a zilo zo kari na zi maheka va nga ha zi alakanya hi tindlela to hambana. Hi kufanana, a munhu zi nga ha mu karatela a ku alakanya zontlhe lezi a dokodela a nga mu byela anzhako ka kupola a wubabyi gakwe. Kutani ku a wokari zi nga ha mu karatela a ku kuma tipfhungulo takwe kutani mayokola, kuveni zi kwalaha a nga kona. Zontlhe lezi za koteka ku ngha ku hi lezi a vakambisisi va nge lixaka lo kari la wukhumu — ku nga woni xokari, kutani ku rivala zilo hi ku ngha u alakanya zinwani. Ve ngalo i ndlela ya matirela yo kari ya wongo ga hina.

² A vanhu vo tala nyamutlha zikhumu hi ndlela yo kari ka zilo lezi zi mahekako tikweni. Va nga ha vumela lezaku a tiko gi cicile nguvu kusukela 1914, kanilezi a va zi woni ku a zilo lezo zi wula yini. Kota zigonzani za Biblia, ha zi tiva lezaku hi ndlela yo kari, a Mufumo wa Nungungulu wu tile hi 1914, a xikhati lexi Jesu a nga yimiswa kota Hosi le tilweni. Kanilezi, ha zi tiva lezaku ku patseka zo tala ka hlamulo wa mukhongelo lowu waku: “A wute mufumo wa wena. Kuranza ka wena a ku mahiwe misaveni, kota lezi ku mahiwako le tilweni.” (Mat. 6:10) Zi la su dlunya lezaku lezo zi patsa a kulobyiswa ka tiko legi go biha. Ntsena loku ku maheka lezo hi kona a kuranza ka Nungungulu ku to mahiwa laha misaveni kota lezi ku mahiwako le tilweni.

3. Hi gihi a thomo hi nga nago hi ku gonza a Mhaka ya Nungungulu?

³ Kota lezi hi gonzako a Mhaka ya Nungungulu, ha zi kota ku wona lezaku a wuprofeti ga tatiseka zalezi. Hi nga wona a kuhambana ku nga kona ni vanhu laha va yileko! Va pelile hi hloko mitirweni yabye ya siku ni siku laha ka kuza va nga cheli kota hi xikombiso xo dlunyateka xa lezaku Kristu wa fuma kusukela 1914, ni lezaku i ta neha kulamula ka Nungungulu lokuloku. Hambulezo, hi nga ehleketa hi xiwutiso lexi xi yako ka mani na mani: Loku ku hi lezaku u tirela Nungungulu hi makume ya malembe, xana wa ha zi wona ni ku wa ha chela kota hi tlhamuselo wa zimaho za xikhati lexi a ku fana ni lezi u nga khatalisa zona ka malembe ma hunzileko ke? Hambu loku u mahile Mboni zalezanyana, xana a kupima ka wena ku ka yini? Hambu loku a hlamulo wa hina wu tshamisile kuyini, a hi vuxeteni a zilo zinharu za lisima zi hi mahako hi tiyiseka lezaku a Hosi ya Nungungulu yi totilweko lokuloku yi taba mazambo manwani kasi a kuranza ka Nungungulu ku maheka laha misaveni.

A VAKHILELI VA MAHAXI VA WONEKILE MAKUNU

4, 5. (a) Zini lezi Jesu a mahako kusukela 1914? (Wona mufota kusanguleni ka nzima.) (b) Xana a vakhileli vanharu va mahaxi va yimela yini, niku a zilo zi cicisile kuyini?

⁴ Hi 1914, Jesu Kristu  —  a kombiswako na a khilele a haxi go basa  —  i lo nyikwa a xidlodlo xakwe le tilweni. Zalezo i lo huma aya mbhetisa ku hlula tiko ga kubiha ga Satani. (Gonza Kuvululelwa 6:1, 2.) A xiprofeto lexi xo tlhamusela xi nga ka Kuvululelwa xipimo 6 xi lo nyika zigelo za ku rinzela lezaku anzhako ka kuyimiswa ka Mufumo wa Nungungulu a matshamela ya tiko ma wa ta hohloka hi kuhatlisa — tiyimpi, tindlala, mitungu, ni zilo zinwani zi hihiritako wutomi. A zimaho lezi zi kombiswa hi vavanuna vanharu va khileleko mahaxi va lanzelako Jesu Kristu hi laha kusuhani. — Kuv. 6:3-8.

⁵ Kota lezi zi profetilweko, a kurula ku lo ‘susiwa laha misaveni,’ hambu lezi a vanhu va tsumbisako ku zwanana ni ku tirisana misaveni yontlhe. A Yimpi yo Sangula ya Misava yi lova masangulo ntsena ya tiyimpi leto ta hombe, khwatsi hi lezi a zimaho za tiko zi kombisako. Niku hambu lezi ku chukwatisilweko zo tala hi tlhelo ga siensia ni ga makumela ya za kutihanyisa kusukela 1914, a tindlala ta ha simama ku hlasela tiko. Tlhatakumbiri, himani a nga xinyatako a kaneta lezaku a tixaka tontlhe ta mitungu, makhombo ya ntumbuluko, ni zilo zinwani zi dayako ziya mahlweni zi hihirita a vanhu va timiliyoni lembe ni lembe ke? A kuanza, kukhanzakanya, ni kutshinga ka zimaho lezi a ku se tshuka ku woniwa kusukela munhu a vangiwa. Xana wa chela kota hi tlhamuselo wa zilo lezo?

6. Mbamani va wonileko a kutatiseka ka wuprofeti ga Biblia, niku a ku tiva lezo zi va kucile ku maha yini?

⁶ A vanhu vo tala va djudjilwe kupima hi Yimpi yo Sangula ya Misava ni funzeketa ga Espanya. Kanilezi, a maKristu ma totilweko ma wa kari ma wula na ka ha hi mahlweni lezaku a 1914 ku wa tava kumbhela ka “xikhati xa vamatiko.” (Luka 21:24) Va wa nga zi tivi hi kumbhelela lezi zi nga wa ta maheka. Hambulezo, va wa zi tiva lezaku 1914 gi wa tava lembe ga kucica ka zilo kufumeni ka Nungungulu. Zalezi va nga wona a kutatiseka ka xiprofeto xa Biblia, va lo huwelela ka vanwani hi kutiya vaku, Nungungulu i sangulile ku fuma. A kutikarata kabye ka ku huwelela Mufumo ku lo va vangela tixanisa to tshisa. Hi kuva zi mahekile ka matiko yo tala, zalezo zive kutatiseka kunwani ka wuprofeti. Ka makume ya malembe lawa ma nga lanzela, a valala va Mufumo va lo tirisa ‘nayo’ kasi ku xanisa malanza ya Nungungulu. Ahandle ka nayo, va lo xanisa vamakabye va hina hi ku vaba, ku va valela, hambu ni ku va daya hi ku va hayeka, kutani ku va duwula. — Tis. 94:20; Kuv. 12:15.

7. Hikuyini a kutala ka vanhu va nga zi woniko lezaku lezi zi mahekako tikweni zi wula yini?

⁷ Lezi ku nga ni wukustumunyu legi go tala ga lezaku a Mufumo wa Nungungulu makunu wu yimisilwe le tilweni, hikuyini a kutala ka vanhu va nga vumeliko a ku a zimaho lezo zi wula yini? Hikuyini va nga ecanyisiko a matshamela ya tiko ni ziprofeto zo kongoma za Biblia zi wulawulako hi matshamela lawo, lezi a vanhu va Nungungulu a zi xumayelako kusukela kale? Ku tava lezaku a vanhu vo tala vo yisa kupima ka lezi va zi kotako ku zi wona hi mahlo yabye ke? (2 Kor. 5:7) Xana a kukaratekela kabye a mitiro ya vanhu hi kona ku va valako mahlo va nga woni lezi Nungungulu a zi mahako? (Mat. 24:37-39) Xana a vokari va no dawa tindleve hi guwa ga mahungu ya Satani lawa ma haxiwako ke? (2 Kor. 4:4) Ku laveka kukholwa kasi hi zwisisa a zilo lezi zi mahekako na zi nga woniwi hi mahlo. A ho ku tsaka hi lezi hi nga hiko zikhumu ka lezi hakunene zi mahekako!

A KUBIHA KU NONOHISA KUYA MAHLWENI KUBIHENI

8-10. (a) Xana 2 Timote 3:1-5 i tatisekisa kuyini? (b) Hikuyini hi wulako lezaku a kubiha ku nonohisa kuya mahlweni kubiheni ke?

⁸ Ku na ni xigelo xa wumbiri xi hi mahako hi tiva lezaku lokuloku a Mufumo wa Nungungulu wu ta fumela zontlhe zi mahekako laha misaveni: A vanhu va kubiha va ta nonohisa vaya kubiheni. Hi xipimo xa zana ga malembe, a matshamela lawa ma profetilweko ka 2 Timote 3:1-5 ma kari ma woneka. Wonawo kambe maya mahlweni hi kuanza, kukhanzakanya, ni xikhati lexi ma tekako. A wu zi woni lezaku a kutatiseka ka xiprofeto lexi ka tshingisa ke? A hi wulawuleni hi zikombiso zo kari lezi zi dlunyatisako a mhaka leyi. — Gonza 2 Timote 3:1, 13.

⁹ Hi nga ehleketa hi kuhambana ku nga kona xikari ka lezi zi nga woniwa kota zilo zo tshisa hi va 1940 kutani va 1950 ni lezi zi mahekako nyamutlha lomu mitirweni, kuhlakaneni, ka zibelabela, ni ka timoda. A tihanyi ta xapi ni wubhayi go tshisa zi mahiwa ni mumu ka wontlhe matlhelo. A vanhu va phikizana hi ku lava kuva vo leva, va mahanyela yo biha, kutani vo biha timbilu ku hunza vanhu vontlhe. A longoloko wa televizawu wu nga woniwa kota wo tshisa hi va 1950 makunu wu hlalelwa hi mingango na vaku a wu bihangi. A xinwani kambe hi lezaku a vanhu vo tala va vumela ku ngalo lava va hlengelako masango ni vanhu va xiro xa wubeleki xo fana vava ni gezu lomu mihlakanweni ni ka timoda, va vuvumisa mahanyela yabye xikari ka vanhu. A ho ku bonga hi lezi hina hi tivako a mawonela ya Nungungulu! — Gonza Juda 14, 15.

¹⁰ A muKristu a nga ha ehleketa kambe hi lezi zi nga woniwa kota mahanyela ya wuhluwuki ka vaswa hi va 1950 ni lezi zi mahekako nyamutlha. A vapswali va wa karateka — niku va na ni xigelo — kasi ku tiva lezaku xana a vana vabye va dzaha, vanwa, kutani va kina hi ndlela ya hava ke. Inyamutlha, a mibiko yo tsema hlana yi zile yi maha yo toloveleka: A xigonzani xa 15 wa malembe xi wachuta xibhamu xi daya zigonzani-kulobye zimbiri xi bayisa 13. A ntlawa wa vanana va 13 kuya ka 19 wa malembe va dzahileko va daya a nhanyana wa 9 wa malembe hi ndlela ya xapi va tlhela vaba papai wakwe ni makabye wakwe. A vaswa va tiko go kari ga le Asia va wulwa lezaku hi vona va nga ni nanzu wa khihlanya ga wugevenga gi mahilweko ka pfhuka wa khume ga malembe ma hunzileko. I kona a nga kanetako lezaku a zilo ziya mahlweni zi biha ke?

11. Hikuyini a vanhu vo tala va nga zi woniko lezaku a zilo ziya mahlweni hi kubiha?

¹¹ Mupostoli Pedro i lo wula ziku dlunya aku: “Masikwini ya kugumesa ku tata a vatseketseli va wulawula kutseketsela, na va famba kumbilukeleni kabye, vaku: Hi kwihi a kuwuya kakwe ku tsumbisilweko ke? Hakuva cima ka lezi vadadani va nga etlela, zontlhe za ha tshamisile zalezo zi nga tshamisile zona hi le kusanguleni ka kuvangiwa.” (2 Ped. 3:3, 4) Xini xi mahako lezaku a vanhu vava ni tshamela legi? Zi wonekisa ku khwatsi loku a vanhu va tolovela nguvu a nchumu wo kari, va tala ku nga cheli kota ka nchumu lowo. A kuhohloka ka mahanyela loku ku yako ku anza ka vanhu hi wunyingi ga vona ku nga ha wonekisa ku khwatsi a ku tsemi nguvu hlana a ku fana ni loku a xaka ga hina ga laha kusuhani gi cica mahanyela za kwalaho ni kwalaho. Hambulezo, a kuhohloka loku ka mahanyela hi kutsongwani-kutsongwani ku na ni khombo.

12, 13. (a) Hikuyini hi nga faneliko ku mbhetwa ntamu hi zilo lezi zi humelelako tikweni? (b) Ku tiva yini zi to hi vuna ku timisela ‘zikhatini lezi za zikarato’?

¹² Mupostoli Paule i hi tlharihisile lezaku “masikwini yo gumesa ku ta chikela a zikhati za zikarato.” (2 Tim. 3:1) Kanilezi a hi ku zo tsanza ku hanya nazo, hikwalaho a hi na xigelo xo fihlala lezi zi mahekako. Hi ku vuniwa hi Jehova, ni moya wakwe, ni bandla ga wuKristu, hi nga hlula ni xihi xikhunguvanyiso kutani kuchava hi kumanako nako. Ha zi kota ku tshama na hi tsumbekile. “A ntamu lowu wa hombe ngwa Nungungulu,” a hi wa hina wutsumbu. — 2 Kor. 4:7-10.

¹³ Zi nene a ku wona lezaku Paule i sangulile xiprofeto lexi xungetano hi masiku yo gumesa hi magezu lawa yaku, “tiva lezaku.” A magezu lawa xitiyisekiso xa lezaku lezi zi lanzelako hakunene zi ta maheka. A ku na kukanakana ka lezaku a tiko legi gi nga chaviko Nungungulu gi ta simama ku nonohisa giya mahlweni kubiheni kala Jehova a suka a yima kasi ku gi lovisa. A vatsali va matimu ve ngalo ka xikhati xo kari a vanhu kutani tiko gi lo hohlokelwa hi mahanyela ya gona ma gumesa hi kuwa. Hambulezo, matinwini wontlhe cima a ku se tshuka kuva ni kuhohloka ka mahanyela a ku fana ni lezi zi mahekako ka xikhati lexi. A vanhu vo tala va nga ha kanyisa lezi zi mahekako, kanilezi a ximaho lexi xo tsema hlana xi wonekako kusukela 1914, xi fanele ku hi nyika xigelo xo tiya xa ku tsumba lezaku a Mufumo wa Nungungulu lokuloku wu ta maha xokari.

A XIZUKULWANA LEXI XI NGA TA HUNZA

14-16. Hi xihi a xigelo xa wunharu xi hi kholwisako lezaku a Mufumo wa Nungungulu wu ‘tata’ lokuloku?

¹⁴ Ka ha hi ni xigelo xa wunharu xi hi mahako hi tsumba. Lezi zi mahekako xikari ka malanza ya Nungungulu zi komba a kutshinela ka kugumesa. Hi xikombiso, mahlweni ka kuyimisiwa ka Mufumo wa Nungungulu le tilweni ku wa hi ni ntlawa wa maKristu yo tsumbeka ma totilweko ma nga tirela Nungungulu hi kuhiseka. A xikhati lexi a zilo zo kari va nga zi rinzele hi 1914 zi nga kala ku maheka, va mahile yini ke? A kutala kabye va lo simama ku tsumbeka nzeni ka ziringo ni tixanisa va tlhela va simama ku tirela Jehova. Hi kufamba ka malembe, a kutala ka vatotilweko lavo — kutani vontlhe  —  va gumesile a kuhanya kabye laha misaveni hi kutsumbeka.

¹⁵ Ka xiprofeto xakwe xi tlhamuselako a kugumesa ka tiko legi, Jesu i te ngalo: “Lexi xizukulwana xi nga ta hunza, na zi nga se ku maheka lezi zilo zontlhe.” (Gonza Mateu 24:33-35.) Hi zwisisa lezaku hi ku wula ku “lexi xizukulwana,” Jesu i wa wula mitlawa yimbiri ya maKristu ma totilweko. A ntlawa wo sangula wu wa hanya hi 1914, ni lezaku va tekele ku wona a xikombiso xa kuvakona ka Kristu hi lembe lego. A ntlawa lowu a ku wuliwi vanhu ntsena lava va nga hanya hi 1914, kanilezi ku wuliwa a maKristu ma totilweko hi moya kota vana va Nungungulu ka lembe lego kutani mahlweni ka gona. — Rom. 8:14-17.

¹⁶ A ntlawa wa wumbiri wu patsekako ka “lexi xizukulwana” maKristu ma totilweko ma hanyileko ka xikhati xinwe ni ntlawa wo sangula. A va lumbeli ntsena ku ngha va hanya ka xikhati lexi lava vo sangula va nga ha hanya, kanilezi va totilweko hi moya wa ku basa xikhatini lexi lava va ntlawa wo sangula va nga ha hi laha misaveni. Hikwalaho, a magezu ya Jesu yaku “lexi xizukulwana” a ma wuli maKristu wontlhe ma totilweko lawa ma nga kona nyamutlha. Inyamutlha, lava va ntlawa wa wumbiri makunu va khosahele. Hambulezo, a magezu ya Jesu ka Mateu 24:34 ma hi tiyisekisa lezaku a vokari xikari ka ‘lexi xizukulwana va nga ta hunza’ na va nga se wona a kusangula ka kuxaniseka ka hombe. A ku tiva lezo zi fanele ku engetela a kutsumba ka hina ka lezaku ku lo sala xikhati xi tsongwanyani kasi a Hosi ya Mufumo wa Nungungulu yi lovisa kubiha zonake yi neha misava yiswa ya kululama. — 2 Ped. 3:13.

KRISTU I TA MBHETISA KUHLULA KAKWE LOKULOKU

17. Xana hi chikelela a magumo wahi hi ku kambisisa a zikombiso lezi za zinharu hi nga wulawula hi zona?

¹⁷ Xana hi chikelela a magumo wahi hi ku kambisisa a zikombiso lezi za zinharu hi nga wulawula hi zona? Jesu i hi tlharihisile aku hi wa nga ta gi tiva — niku a hi gi tivi — ​a siku kutani xikhati. (Mat. 24:36; 25:13) Kanilezi ha yi tiva nguva, kota ku wula ka Paule. (Gonza Va Le Roma 13:11.) Hi hanya nguveni leyo, ku nga masiku yo gumesa. Loku hi yisa kupima ka hina kontlhe ka xiprofeto xa Biblia ni ka lezi Jehova Nungungulu na Jesu Kristu va zi mahako, hi nga ta tsanzeka ku wona a xikombiso xo dlunyateka xa lezaku hi hanya tichokeni ta masiku yo gumesa.

18. Xini xi rinzelako lava va alako a Mufumo wa Nungungulu?

¹⁸ Lava va alako a Mufumo wu nga mandleni ya Jesu Kristu, a Mukhileli wa haxi go basa a yako kuhluleni, lokuloku va ta kurumeteka ku vumela a xihoxo xabye. Va nga ta pona. Ka xikhati lexo, va taba nyanda hi kuchava vaku: “Himani a zi kotako ku yima ke?” (Kuv. 6:15-17) Hambulezo, a xipimo xi lanzelako xa Kuvululelwa xa hlamula. A vatotilweko ni lava va rinzelako ku hanya laha misaveni handle ko kanakana va ta zi kota ku “yima” sikwini lego na va tsakelwa hi Nungungulu. Zonake “a xidlemo xa tsanza-vahlayi” xa tiyivu tinwani xi ta pona ka kuxaniseka ka hombe. — Kuv. 7:9, 13-15.

19. Kota lezi u zi wonako lezaku a kugumesa ku kwalaha nyongeni, xini u xi langutelako hi mahlo yo pswhuka?

¹⁹ Loku hi yisa kupima ka hina zalezi kutatisekeni ka ziprofeto za Biblia xikhatini lexi xo gumesa, hi nga ta djudjiwa kupima hi guwa ga tiko ga Satani; ge hi nga tava zikhumu laha ka kuza hi nga woni a tlhamuselo wa zilo lezi zi mahekako tikweni. Lokuloku, Kristu i ta mbhetisa a kuhlula kakwe hehla ka tiko legi gi nga chaviko Nungungulu hi kulwa yimpi yo gumesa hi kululama. (Kuv. 19:11, 19-21) Hi nga ehleketa hi lezi a Biblia gi hi tsumbisako lezaku zi tava xiavelo xa hina! — Kuv. 20:1-3, 6; 21:3, 4.