MIHLAMULO YA BIBLIA

Xana a Biblia i Mhaka ya Nungungulu hakunene?

Handle ko kanakana, u rinzela ku a Mhaka ya Nungungulu yiva bhuku go hambana ni manwani, niku a Biblia gi hambene futsi. Ku gandliwa tibiliyoni ta maBiblia hi mazanazana ya tirimi. A wutlhari ga Biblia gi na ni ntamu wa ku chukwatisa a mahanyela ya vanhu. — Gonza 1 Va Le Tesalonika 2:13; 2 Timote 3:16.

Ha zi tiva lezaku a Biblia gita hi ka Nungungulu hakuva gi hlawutela khwatsi a zilo za xikhati xa ha tako. A ku na munhu waku a nga zi sukela a maha lezo. Hi xikombiso, ehleketa hi bhuku ga Isaya. Ku kumilwe kopiya ya gona yi mahilweko zana ga malembe mahlweni ka kupswaliwa ka Jesu lomu ka mhako yo kari kusuhani ni Bimbi Gofa. A bhuku legi gi wula lezaku a doropa ga Babuloni gi wa ta maha rumbi. Lezo zi sangulile ku tatiseka na ku hunzile malembe yo tala anzhako ka kuva Jesu a hanyile laha misaveni. — Gonza Isaya 13:19, 20; 2 Pedro 1:20, 21.

Gi tsalisilwe kuyini a Biblia?

A Biblia gi tsalilwe nzeni ka xikhati xo ringana 1.600 wa malembe. Gi tsalilwe hi xipimo xa 40 wa vanhu niku va lo wulawula hi mhaka yaleyi ya yinwe, na va nga tshuki va hambana. Zi kotekisile kuyini lezo? Va wa rangelwa hi Nungungulu. — Gonza 2 Samueli 23:2.

Ka makhati yo kari, Nungungulu i wa bhula ni vatsali va Biblia hi ku tirisa tingelosi, miwoniso, kutani miloro. A kutala ka zikhati, i wa nghenisa maalakanyo yakwe hlokweni ya mutsali, zonake a mu tsika a ti hlawulela magezu ya ku hlawutela hi wona a mahungu ya Nungungulu. — Gonza Kuvululelwa 1:1; 21:3-5.