A nzi tiyelangi, hambulezo nzi na ni ntamu

Loku nzi alakanyela a wunwanana ga mina, ku wuya masiku yo tsakisa chacheni lowu a vapswali va mina va nga hanya ka wona dzongeni wa França. Papai i lo nzi mahela mudjiwe, niku nzi wa zi ranza nguvu ku tsutsuma-tsutsuma laha mutini. Hi 1966, ku lota Timboni ta Jehova laha mutini ti ta mbheta xikhati xo leha na ti bhula na papai. Anzhako ka 7 wa tihweti ntsena, i lo boha ku maha Mboni ya Jehova. Zalezo mamani i lo lanzela, zonake va nzi wundla ngangweni wa liranzo.

A zikarato za mina zi sangulile na ha ha hi ku tlhela le Espanya, lomu a vapswali va mina va tako hi kona. Nzi lo sangula kuzwa kubayisa ka hombe lomu mandleni ni lomu ka tihlololwani. Anzhako ka malembe mambiri na hi enzela vadokodela vo tala, hi lo kuma mutiri wo tiveka nguvu wa zipanzela, loyi a nga wula hi kutiya aku: “Mu hlwelile.” Mamani i lo sangula ku rila. Ka yindlu yo tshisa leyi nzi nga hi ka yona, nzi lozwa magezu yo kala ku toloveleka yo kota: “Mababyi ya hombe yo vangiwa hi maselula ya ku vikela mababyi” ni “Zifamba za vanana.”a Kota nwanana wa khume ga malembe ntsena nzi wa nga zwisisi zotala, kanilezi nzi lo zi wona ku mahungu yo biha.

A dokodela loye i lo hi byela lezaku nzi ya tiriwa ka xipitali xa vanana xi lumbako wukhongeli. Na nza ha chikela, nzi lo chava hi ku wona a kuswara ka yindlu ya kona. A milayo ya kona yi wa hi yo karata: Va lo nzi tsema misisi, va nzi ambexa tinguwo to swara ta xipitali. Na nzi rila nzi lo ti wutisa lezi: ‘Nzi ta hanya mina kwalaha?’

NZI LO WONA KUKHATALA KA JEHOVA

Kota lezi a vapswali va mina va nga nzi gonzisile ku tirela Jehova, nzi lo ala ku patseka ka mikhuwo ya Katolika yi nga mahiwa ka xipitali lexo. A vafreira zi wa va karatela ku zwisisa a ku hikuyini nzi alako. Nzi lo khongela ka Jehova lezaku a nga nzi tsiki, niku zalezo nzi lo wona canja gakwe na gi nzi vikela, a ku khwatsi ku wukarelwa hi papai wa liranzo.

A vapswali va mina va wa vumelelwa ku nzi enzela hi xikhati xo koma hi Milongiso. Va lo nzi tela ni mabhuku ma seketelwako ka Biblia lezaku nzi gonza kasi nzi tiyisa kukholwa ka mina. Hi tolovelo a vanana va wa nga tshami ni mabhuku ya vona wutsumbu, kanilezi a vafreira va lo nzi vumelela ku tshama ni Biblia ga mina, legi nzi nga gi lera siku ni siku. Nzi lo bhula ni vanhanyana-kulori hi kukholwa ka mina ko hanya kala kupinzuka ka misava ya Paradise, leyi ku to kala ku nga hi na mababyi. (Kuvululelwa 21:3, 4) Hambu lezi nzi nga tshuka nzizwa xiwunza, nzi wa tsaka hi lezi a kukholwa ni kutsumba ka mina ka Jehova zi ngaya zi tiya nguvu.

Anzhako ka 6 wa tihweti na nzi hi laho, a vadokodela va lo nzi chusa kuya kaya. A mababyi ya mina ma wa ha simama, kanilezi nzi tsakile hi ku tlhela nzi ya tshama ni vapswali va mina. A mahlakala ya mina ma lo engetela ku khanyana, ma engetela kubayisa. Nzi lo nghena tangeni yo nghena ndlwini na nzi xaniseka nguvu. Hambulezo, na nzi hi ni 14 wa malembe, nzi lo bapatizwa, na nzi ti yimisele ku tirela Dadani wa mina wa le tilweni hi laha nzi zi kotako hi kona. Kanilezi, nzi wa tshuka nzi mu sola. Nzi wa khongela nziku: “Hikuyini zi humelelako mina? Maha wuxinji u nzi hanyisa. A wu zi woni lezi nzi xanisekisako zona ke?”

A wunhwana ga mina gi vile xikhati xo nonoha nguvu. Zi lavile ku nzi vumela lezaku nzi nga ta kalamuka. Nzi wa tshama hi ku ti fananisa ni vanghana va mina lava va nga hanya khwatsi va tlhela va ti buza hi wutomi. Hikwalaho, nzi lo ti wona na nzi hi wa lahasi nzi tlhela nzi nga bhuli. Hambulezo, a maxaka ni vanghana va nzi tiyisile nguvu. Nza alakanya Alicia — a nga nzi hunza hi 20 wa malembe — loyi a ngava munghana wa lisine. I lo nzi vuna ku susa mababyi ya mina hlokweni hi kuva nzi khatala hi vanwani wutshanwini ga ku alakanyela a zikarato za mina ntsena.

NZI LO KUMA TINDLELA TA KU BHINZULISA WUTOMI GA MINA

Na nzi hi ni 18 wa malembe, nzi lo sika laha ko tlhela zi nzi karatela nguvu kuya mitlhanganweni. Hambulezo, nzi wa lonzowota xontlhe xikhati lexi nzi nga hi laha kaya kasi ku gonza Biblia hi wukheta. A bhuku ga Joba ni ga Tisimu ma nzi vunile ku zwisisa lezaku Jehova Nungungulu i hi khatalela nguvunguvu hi tlhelo ga moya ku hunza ga nyama. A mikhongelo leyi nzi nga yi maha hi kukhanzakanya yi nzi nehele ‘ntamu wa hombe’ ni “kurula ka Nungungulu, loku ku nga hiko na kupimiwa.” — 2 Va Le Korinte 4:7; Va Le Filipi 4:6, 7.

Na nzi hi ni 22 wa malembe, nzi lo wona ku a wutomi ga mina gi tava ga xitulo xa maroda. Nzi wa chava ku a vanhu va nga ha nzi woni, va wona xitulo xa maroda ntsena xi tshamelweko hi mubabyi. Kanilezi a xitulo xa maroda xi nzi wuyisele kutlhatlheka ko kari, hikwalaho wutshanwini ga kuva “xiruko” xi lova makatekwa. Isabel, loyi a nga hi munghana wa mina, i lo nzi kuca ku ti vekela mixuvo yaku ka hweti yo kari nzi tira naye 60 wa tihora ntirweni wo xumayela.

Kusanguleni, lezo nzi wa nga zi woni kota mawonela ya ma nene. Kanilezi nzi lo kombela xivuno ka Jehova, niku hi ku vuniwa hi va ngango wa mina ni vanghana, nzi lo zi kota. A hweti leyo ya zigingi yi lo hunza hi xihatla; nzi wa hlulile kuchava ka mina ni kukarateka. Zi lo nzi tsakisa nguvu laha ko kala hi 1996 nzi boha kuva phayona ga xikhati xontlhe — nzi mbheta 90 wa tihora hi hweti ntirweni wo xumayela. Lexo xi vile xinwe xa ziboho za mina za zi nene, lexi xi nzi tshinetileko nguvu ka Nungungulu xi tlhela xi nzi tiyisa hi tlhelo ga nyama. A kuva wutirelini zi nzi nyikile lungelo ga ku bhulela vanhu vo tala a kukholwa ka mina ni ku vuna vokari vabye lezaku vava vanghana va Nungungulu.

JEHOVA A NGA NZI TSIKI

Ximunwini xa 2001, nzi lo humelwa hi mhango ya mova nzi tshoveka milenge yontlhe. Na nzi kari nzizwa kubayisa ka hombe mubhedini wa xipitali, nzi lo maha mukhongelo wa lomu mbilwini nziku: “Jehova, u nga nzi tsiki!” Zalezo, a wasati loyi a nga gamakene na mina i lo nzi wutisa lezi: “U Mboni ya Jehova?” Nzi wa nga hi na ntamu wo hlamula, hikwalaho nzi lo vumela hi hloko. Yena aku: “Nza mu tiva nwina! Nza tolovela ku gonza marevista ya nwina.” A magezu lawo ma lo nzi chavelela nguvu. Hambu lezi nzi nga hi kuxanisekeni, nzi zi kotile ku nyika wukustumunyu ha Jehova. Hi nga wona wudzunzo lego ga hombe!

A xikhati nzi nga chukwatanyana, nzi lo boha ku nyika wukustumunyu go engeteleka. Mamani i lo chova xitulo xa mina xa maroda hi renzelekela lomu ndlwini ya vababyi ni milenge ya mina ya magondoro. Siku ni siku, hi wa enzela vababyi vatsongwani hi va wutisa ku vo yini, hi tlhela hi va siyela mabhuku. Lezo zi wa karata, kanilezi Jehova i lo nzi nyika ntamu lowu wu nga laveka.

Ka malembana lawa, a kubayisa ku engetele niku a kufa ka papai wa mina konawu ku nzi engetele hlomulo. Hambulezo, nzi ti karatela ku alakanyela za zi nene. Hi ndlela muni? Ni gihi siku zi kotekako, nzi ti karatela ku tshama ni vanghana zinwe ni maxaka, lezi zi nzi vunako ku rivala zikarato za mina. Niku loku nzi hi nzoce, nzi gonza Biblia, kutani ku xumayela hi telefone.

Nzi ti karatela ku kuma litsako kambe hi zilo zitsongwani zo kota ku biwa hi moya kutani kuzwa kunuhela ka zitsangi. Lezo zi nzi nyika zigelo za ku bonga. A ku hlota tindlela ta kutsaka za vunawo. Ka siku go kari na nzi hi kuxumayeleni, a munghana mina, loyi a nga kari a nzi chova, i lo nyima a tsala zo kari. Hi xitshuketi, nzi lo sangula ku relela nzi ya tiba laha ka mova. Hi lo dzuka hi wumbiri ga hina, kanilezi a xikhati lexi hi nga wona ku a ku onhekangi nchumu hi lo hleka nguvu.

Ku na ni zotala nzi nga zi kotiko ku maha. Nzi zi wona kota mixuvo yi rinzelako ku tatiswa. Nzi tolovela ku vala mahlo ya mina nzi vulula a “njhanela” ya mina ya xihundla, nzi wona misava yiswa leyi Nungungulu a tsumbisako. (2 Pedro 3:13) Nzi ti alakanyela na nzi hanya khwatsi, nzi fambafamba, nzi ti buza hi wutomi hi kumbhelela. Nzi tshama na nzi alakanya a magezu ya Davida yaku: “Rinzela Jehova, uva ni ntamu, a mbilu ya wena a yi tiye.” (Tisimu 27:14) Hambu lezi a miri wa mina wu yako wu engetela ku mbhela ntamu, Jehova wa nzi tiyisa. A nzi tiyelangi, hambulezo nzi na ni ntamu.