Wuhlengeli ga tichechi — I ndlela ya Nungungulu?

KANILEZI, a vaseketeli vo hiseka va wuhlengeli ga tichechi a va zi wonisi lezo. Eboo Patel, a muwumbi wa hlengeletano yo kari ya wuhlengeli ga tichechi (Interfaith Youth Core) i lo wutisa lezi: “Hi nga nzi komba wukhongeli gi nga khataliko hi tipswalo . . . , moya wu nene . . . , wuhana kutani kururela vapfhumba.”

Kunene, a vaBhuda, vaKatolika, vaProtestante, vaHindu, vaMwinyi, ni vanwani va tshuka va tira zinwe kasi ku hlula wusiwana, ku lwela tifanelo ta vanhu, ku beletela a kudembiwa ka mamina, kutani ku veka kupima ka timhaka tinwani ti khumbako ntumbuluko. A vanhu va tichechi to hambanahambana va tshuka va tlhangana kasi ku tiyisana ni ku bhulisana hi tindlela ta kuva ni mazwisisela manwe. Ka mitlhangano leyo, va tolovela ku maha mikhuwo ya mavela, tisimu, mikhongelo, ni zinwani.

Xana a ku patsela tichechi i ndlela ya ku mbheta a kulwisana ka tigonzo? A wuhlengeli ga tichechi i ndlela ya Nungungulu ya ku neha misava ya yi nene ke?

KUZWANANA — HI MAHELA MUNI?

A yinwe ya tihlengeletano ta hombe ta wuhlengeli ga tichechi yi bhuma hi kuva ni vanhu va yimelako xipimo xa 200 wa tichechi to hambana ni kuva yi hi kona ka 76 wa matiko. A kungo ga yona gi tivekako “ku vuvumisa kuzwanana ka kukholwa ku tiyileko siku ni siku.” Kanilezi, lezo zo olova ku wula ntsena. Hi xikombiso, hi kuya hi vayimeli va yona, ku lavekile lezaku a phepha gabye ga matirela ni tifanelo gi ciciwa magezu yo kari kasi ku nga khunguvanyisi a mitlawa yo tala ya wukhongeli leyi yi gi sayinileko. Hikuyini? A xinwe xa zigelo hi lezaku va wa nga zwanani mhakeni yo patsa kutani ku nga patsi Nungungulu ka phepha lego. Hikwalaho, Nungungulu a va zangi va mu kumbuka ka phepha lego.

Loku Nungungulu a sala handle, ku kwihi kukholwa kwalaho ke? Tlhatakumbiri, kuhambana muni ku nga kona xikari ka wuhlengeli lego ga tichechi ni tihlengeletano tinwani ta tiko ta ku vuna zisiwana? Hi xigelo xo zwala, a hlengeletano ya wuhlengeli ga tichechi leyi yi kumbukilweko laha hehla a yi ti wuli lezaku i hlengeletano ya wukhongeli, kanilezi yi ti wula ku i “hlengeletano ya ku vuvumisa kuzwanana.”

A KU VUVUMISA MATSHAMELA YA MA NENE ZA ENELA?

Dalai Lama, muvuvumisi wa hombe wa wuhlengeli ga tichechi, i ngalo: “A mikhuwo yontlhe ya hombe ya wukhongeli yi seketela nchumu munwe: ku nga liranzo, tipswalo ni ku tsetselela.” I engeta aku: “A xa lisima ku hanya hi zona.”

Lisine ku a liranzo, tipswalo ni kutsetselela za lisima. Jesu i wulile magezu lawa ma wuliwako lezaku i Nayo wa Nzalama: “Zontlhe lezi mu ranzako a kuva vanhu va zi maha ka nwina, va maheleniwo zona.” (Mateu 7:12) Kanilezi, xana a kukholwa ka lisine ku vuvumisa matshamela ma nene ntsena ke?

Xungetano hi vanhu vo tala lava va nga ti wula lezaku vakhozeli va Nungungulu masikwini yakwe, Paule i te ngalo: “Nza va mahela wukustumunyu lezaku va pangamela Nungungulu, kanilezi na va nga zi mahi hi kutiva.” Xi wa kwihi xikarato xa kona? Paule i te ngalo: “Va wa kohlwa hi kululama ka Nungungulu,” hikwalaho va wa “lava ku ti yimisela a kabye kululama.” (Va Le Roma 10:2, 3) Hi ku nga tivi lezi Nungungulu a nga zi lava ka vona, a kuhiseka kabye — ni kukholwa kabye — ku wa hi ka mahala. — Mateu 7:21-23.

MAWONELA YA BIBLIA XUNGETANO HI WUHLENGELI GA TICHECHI

Jesu i te: “Va tsaka lava va hlotako kurula.” (Mateu 5:9, Tradução do Novo Mundo) Jesu i wa hanya hi kuyelana ni lezi a nga kari a xumayela hi ku vuvumisa kurula ni ku kanela mahungu ya kurula ka vanhu va wukhongeli go hambanahambana. (Mateu 26:52) Lava va nga ma amukela va lova ni kubohana ko tiya ka liranzo. (Va Le Kolosi 3:14) Kanilezi xana a kungo ga Jesu ku wa hi ku veka kuzwanana ntsena xikari ka vanhu vo hambanahambana lezaku vava ni kurula ke? Xana i ti patsile ni vanwani ka mikhuwo yabye ya wukhongeli?

A varangeli va wukhongeli ga vaFarisi ni vaSadusi va wa mu venga nguvu Jesu — laha ko kala va lava ni ku mu daya. I te yini Jesu? Jesu i lo laya vapizani vakwe aku: “Va tsikeni; zikhumu zi rangelako zikhumu-kulobye.” (Mateu 15:14) Jesu i lo ala kuva ni wunghana ga moya ni vanhu va tshamela lego.

Hi kufamba ka xikhati, ku lo yimiswa bandla ga wuKristu le Korinte, Grekia — gi nga doropa gi nga tiviwa hi kuva ni mikhuwo yo hambanahambana ya wukhongeli. Xana a maKristu ma wa ta kuyini ka wutshamu go kota lego? Mupostoli Paule i lo va tsalela lezi: “Mu nga bohelwi ntsungwa munwe ni va nga kholwiko.” Hikuyini? Paule i lo engeta aku: “Hi kwihi a kuzwanana ka Kristu na Beliali [kutani Satani] ke? Kuhlengela muni a nga nako loyi a kholwako ni loye a nga kholwiko ke?” Hi kugumesa i lo va nyika wusungukati legi: “Hikwalaho ti hambanyiseni mu huma xikari ka vona.” — 2 Va Le Korinte 6:14, 15, 17.

Zi te dlunya lezaku a Biblia ga ala a wuhlengeli ga tichechi. Kanilezi u nga ha ti wutisa, ‘Makunu, hi nga ku kumisa kuyini kuzwanana ka lisine?’

NDLELA YA KU AKA KUZWANANA KA LISINE

A Estação Espacial Internacional, wu nga muchini wa hombe wu renzelekelako misava ndengelengeni, wu wumbilwe hi kutirisana ka xipimo xa 15 wa matiko. U alakanya ku ngha zi kotekile a ku maha ntiro lowo loku a matiko lawo ma wa nga zwananangi mhakeni ya mamahela ya kona ke?

Hi lisine hi zalezo zi humelelako ka tihlengeletano ta wuhlengeli ga tichechi inyamutlha. Hambu lezi ku vuvumiswako kuzwanana ni xichawo, a ku na ndlela yo aka kukholwa va zwaneneko ka yona. Kota wuyelo ga lezo, va simama kuva ni kuhambana ka tigonzo ni milayo ya mahanyela.

A Biblia gi na ni matshinya ya milayo ya Nungungulu lawa ma fanako ni xaxameto wa matirela. Hi nga aka a wutomi ga hina hi ku lanza lezi a Biblia gi zi wulako. Lava va mahako lezo va hlula a xihlawulela xa hlonge ni xa wukhongeli va tlhela va gonza ku tira zinwe hi kurula ni kuzwanana. Na a komba lezaku lezo zi wa ta humelela, Nungungulu i te: “Nzi ta nyika a matiko milomu yiswa leyi yi basileko [kutani “lirimi liswa li basileko,” NM], kasi wontlhe ma fela ku vitana a vito ga Jehova, ma mu tirela hi mbilu yinwe.” Lexi xi nehako kuzwanana ‘lirimi li basileko’ — ku nga makhozelela lawa Nungungulu a ma lavako. — Zefania 3:9; Isaya 2:2-4.

A Timboni ta Jehova ta ku ramba hi matsenya lezaku uya Salawini ya tona ya Mufumo u ya ku wona ha wece a kurula ni kuzwanana loku ku nga kona xikari kabye. — Tisimu 133:1.