Tirisa a Mhaka ya Nungungulu hakuva ya hanya!

1, 2. I ntiro muni lowu Jehova a nyikileko Mosi, niku xitiyisekiso muni a mu nyikileko?

HI NGA ti alakanyela na u rumilwe ku ya yimela vanhu va Jehova mahlweni ka hosi ya hombe ka tontlhe misaveni. U nga ti zwisa kuyini? Kuzilava u nga karateka, u chava, u tlhela u ti wona na u nga ringanelwi. U nga ti longiselisisa kuyini? Zini u nga zi mahako kasi ku engetela ntamu wa magezu ya wena kota muyimeli wa Nungungulu nyamintamu?

² Mosi i vile ka xiyimo xalexo. I wa hi “munhu wo rula nguvu ku hunza vanhu vontlhe va nga laha misaveni.” Hambulezo, Jehova i lo mu ruma kuya ka Faro kasi ku ya tlhatlhisa vanhu va Nungungulu ka tshikelelo wabye kota tikhumbi le Gipite. (Mitse. 12:3) Kota lezi a zimaho zi kombileko, Faro i wa hi munhu wo kala xichawo niku i wa hi ni matshanza. (Ekso. 5:1, 2) Hambulezo, Jehova i wa lava lezaku Mosi a ya laya Faro lezaku a tsika timiliyoni ta tikhumbi takwe ti huma Gipite! Hi xigelo xo zwala, Mosi i lo wutisa Jehova aku: ‘Hi mina mani, wo kala nziya ka Faro nzi ya humesa a vanana va ka Israeli le Gipite?’ Kuzilava Mosi i wa ti wona na a nga ringanelwi. Kanilezi Nungungulu i lo mu tiyisa lezaku a nga tava yece. I lo mu byela lezi: “Nzi tava zinwe na wena.” — Ekso. 3:9-12.

3, 4. a) Zini lezi Mosi a nga zi chava? b) U ngava ka xiyimo xo fana ni xa Mosi hi ndlela muni?

³ Zini lezi Mosi a nga zi chava? Kuzilava i wa chava ku tshuka Faro a nga amukeli kutani ku demba ndleve ka munhu a tako hi vito ga Jehova Nungungulu. Mosi i wa chava kambe lezaku a vanhu vakwe wutsumbu va tshuka va nga kholwi lezaku Jehova i mu rumile kasi ku ya va humesa Gipite. Hikwalaho Mosi i lo byela Jehova aku: “Va nga ta vumela, ne cima va nga ta ingisa gezu ga mina, hakuva vona va taku: Cima Jehova a nga wonekangi ka wena.” — Ekso. 3:15-18; 4:1.

⁴ A hlamulo wa Jehova ni zimaho lezi zi nga lanzela zi nga nyika xigonzo xa ntamu ka munwe ni munwani wa hina. Kuzilava ku nga ta tshuka ku laveka lezaku u ya wulawula ni hosi yo tlakuka. Kanilezi xana za tshuka zi ku karatela ku wulawula hi Nungungulu ni Mufumo wakwe hambu ka vanhu lava u kumanako navo siku ni siku? Loku zi hi tano, wona lezi u nga zi gonzako ka matimu ya Mosi.

“XINI LEXI XI NGA LOMU CANJENI GA WENA?”

5. Xini lexi Jehova a nga khomisa Mosi, niku lezo zi mbhetisile kuyini kuchava kakwe? (Wona mufota kusanguleni ka nzima.)

⁵ A xikhati lexi Mosi a nga komba lezaku i wa chava ku tshuka vanhu va nga kholwi, Nungungulu i lo mu longisela. A matimu ma nga ka Eksodusi ma wula lezi: “Jehova aku ka [Mosi]: Xini lexi xi nga lomu canjeni ga wena? Aku: I nhonga. Aku: Yi hoxe lahasi. I lo yi hoxa lahasi, yi si hunzuluka yi maha nyoka: Mosi i lo tsutsuma, a yi chava. Zinghaho Jehova i te ngalo ka Mosi: Nawuluta a canja ga wena u yi khoma hi nkila. Zonake Mosi i lo nawuluta a canja gakwe a yi khoma, yi si hunzuluka kambe yi maha nhonga canjeni gakwe. [Nungungulu aku:] U ta ya maha zalezo kala va vumela lezaku Jehova . . . i wonekile ka wena.” (Ekso. 4:2-5) Hi ndlela leyo, Nungungulu i lo khomisa Mosi a nchumu lowu a nga wa ta komba hi wona lezaku a mahungu yakwe mata hi ka Jehova. Lexi a vanwani va nga xi wona kota nhonga ntsena xi lo hanya hi ntamu wa Nungungulu! Hi nga alakanya lezi a xihlamaliso lexo xi nga wa ta nyikisa zona ntamu a magezu ya Mosi, xi tiyisa lezaku hakunene hi Jehova a mu rumileko! Hikwalaho, Jehova i lo mu byela lezi: “U ta khoma a nhonga leyi canjeni ga wena, u maha ziwoniso ha yona.” (Ekso. 4:17) Na a hi ni xikombiso lexo xa ntamu wa Nungungulu mandleni, Mosi i lo tiya hlana a ya yimela a Nungungulu wa lisine mahlweni ka vanhu vakwe ni ka Faro. — Ekso. 4:29-31; 7:8-13.

6. a) Xini hi faneleko kuva naxo canjeni a xikhati hi xumayelako, niku hikuyini? b) Tlhamusela lezaku “a mhaka ya Nungungulu ya hanya” niku “yi na ni ntamu” hi ndlela muni.

⁶ Hinawu hi nga ha wutisiwa zalezo a xikhati lexi hi bhulelako vanhu a mahungu ya Biblia, vaku: “Xini lexi xi nga lomu canjeni ga wena?” A kutala ka zikhati hi ta ngha hi khomile Biblia kasi ku gi tirisa. Hambu lezi a vokari va nga ha wonako Biblia kota bhuku ntsena, Jehova i wulawula na hina hi ku tirisa Mhaka yakwe yi tsalilweko. (2 Ped. 1:21) Gi na ni zitsumbiso zakwe xungetano hi zilo zi to maheka Mufunweni wakwe. Hi xigelo lexo, Paule i zile a tsala lezi: “A mhaka ya Nungungulu ya hanya, yi na ni ntamu.” (Gonza Maheberu 4:12.) A zitsumbiso zontlhe za Jehova ziya mahlweni, a zi nyimi laha ka kunwe, hakuva i tshama na a tira kasi ku zi tatisa. (Isa. 46:10; 55:11) Laha munhu a zwisisako mhaka leyi xungetano hi Mhaka ya Jehova, lezi a zi gonzako lomu ka Biblia zi kuma ntamu wa hombe wutomini gakwe.

7. Hi nga avelisa kuyini ‘a mhaka ya lisine hi kululama’?

⁷ Jehova i hi khomisile a mhaka yakwe yo hanya yi tsalilweko leyi hi nga kombako hi yona lezaku a mahungu ya hina ma tsumbekile niku mata hi ka yena. A zi hlamalisi kuva anzhako ka ku tsalela Maheberu, Paule a kucile a mupizani wakwe wa moya Timote lezaku ‘a chela kota hi ku avela a mhaka ya lisine hi kululama.’ (2 Tim. 2:15) Hi nga gi lanzelisa kuyini a wusungukati ga Paule? Hi fanele ku gonza mutsalo hi wu hlawulileko khwatsi lowu wu nga khumbako a timbilu ta lava va hi ingiselako. A ziphephana lezi zi humesilweko hi 2013 zi mahelwe ku hi vuna a ku maha lezo.

GONZA MUTSALO WU HLAWULILWEKO KHWATSI!

8. Zini lezi a muwoneleli wo kari wa ntiro a wulileko xungetano hi ziphephana za hina za ziswa?

⁸ A ziphephana zontlhe lezi za ziswa zi na ni matshamela manwe. Hikwalaho, loku hi gonza ku tirisa xinwe, hi gonzile ku tirisa zontlhe. Xana za olova ku zi tirisa? A muwoneleli wo kari wa ntiro le Hawai, Estados Unidos, i tsalile lezi: “A nga kona a nga zi tiva ku a ziphephana lezi zi ta vuna nguvu ntirweni wa kuxumayela hi muti ni muti, hambu lomu maruweni ni mabazarini.” I polile lezaku a ziphephana lezi zi tsalilwe hi ndlela yi kucako vanhu lezaku va hlamula na va chusekile, niku a kutala ka zikhati zi yisa ka mabhulo ma tiyisako. I alakanya ku lezo zi koteka hi kota ya lezi ku nga ni xiwutiso ni mihlamulo ya kuhlawula laha mahlweni. A nwinyi wa muti a nga karateki hi ku chava ku nyika hlamulo wo kala wu nga hi wona.

9, 10. a) A ziphephana za hina zi hi kucisa kuyini ku tirisa a Biblia? b) Hi zihi ziphephana u humelelako khwatsi loku u zi tirisa, niku hikuyini?

⁹ A xiphephana xinwe ni xinwani xi hi kuca ku gonza mutsalo wu hlawulilweko khwatsi. Hi xikombiso, wona a xiphephana Xana a kuxaniseka ku ta tshuka ku mbhela? Kani a nwinyi wa muti wa hlawula a “ina,” “ahihi,” kutani “kuzilava” kota hlamulo wakwe, vulula lomu nzeni uku, “Wona lezi a Biblia gi zi wulako.” Na u nga engeteli nchumu, gonza Kuvululelwa 21:3, 4.

¹⁰ Ni loku u tirisa a xiphephana U gi wonisa kuyini a Biblia?, a mahela hi galego. Kani hi wihi hlamulo lowu a nwinyi wa muti a wu hlawulako laha mahlweni ka xona, vulula lomu nzeni ntsena uku: “A Biblia gi wula lezaku ‘yontlhelele mitsalo yi pimisilwe hi Nungungulu.’” U nga ha engetela lezi, “Hi lisine a mavesi ya kona a ma wuli lezi basi.” Makunu, vulula a Biblia u gonza bhuku gontlhe ga 2 Timote 3:16, 17.

11, 12. a) Litsako muni u li kumako wutirelini? b) A ziphephana zi nga ku vunisa kuyini ku longisela maenzo yo wuyela ke?

¹¹ A kutsakela ka nwinyi wa muti ku ta komba lezaku mahungu yo kota kwihi lawa mu nga lerako mu tlhela mu bhula hi wona ka xiphephana lexo. A xo tiya hi lezaku ahandle ka ku siya ziphephana ni vanhu, u na ni litsako la kuva u va lerele xipanze xo kari xa Mhaka ya Nungungulu — hambu loku gi hi vesi ginwe kutani mambiri ka lienzo lo sangula. Ka khati ginwani u nga ya tlhavinyeta bhulo.

¹² Seno nzhako ka xiphephana xinwe ni xinwani ku na ni xiwutiso xi nga hasi ka xihlokwana xa mhaka “Alakanyela lezi” ni mitsalo leyi hi nga bhulako hi yona ka lienzo lo wuyela. Ka xiphephana U alakanya yini hi wumanziko? a xiwutiso xa lienzo lo wuyela xi ngalo: “Xana Nungungulu i ta yi chukwatisisa kuyini misava leyi?” Ku kombisiwa bhuku ga Mateu 6:9, 10 ni ga Danieli 2:44. Ka xiphephana Xana a vafileko va zi kota ku tlhela va hanya hakunene? a xiwutiso xi ngalo: “Hikuyini hi khosahalako hi tlhela hifa?” Ku kombisiwa a bhuku ga Genesisi 3:17-19 ni Va Le Roma 5:12.

13. Tlhamusela a matirisela ya ziphephana kasi ku sangula zigonzo za Biblia.

¹³ Tirisa ziphephana kasi ku sangula zigonzo za Biblia. Loku munhu a maha scan ya xifungo xa QR lexi xi nga seno nzhako ka xiphephana, i ta kongomisiwa ka mahungu yo kari ya site ya hina lawa ma nga mu kucako ku gonza Biblia. Ahandle ka lezo, a ziphephana lezi zi kombisa broxura Mahungu yo Saseka ya Nungungulu! zi tlhela zi komba xigonzo xinwe xo kongoma. Hi xikombiso, a xiphephana Himani loyi hakunene a fumelako misava? xi yisa ka xigonzo 5 xa broxura legi. A xiphephana Xini xi nga nehako litsako wutomini ga ngango? xi yisa ka xigonzo 9. Loku u tirisa ziphephana hi ndlela leyi zi mahelweko yona, u ta ngha u lanzela a mahela go toloveleka ga ku tirisa Biblia ka lienzo lo sangula ni ka maenzo yo wuyela. Lezo zi nga ha ku vuna ku vulula zigonzo zo tala za Biblia. Zini zinwani u nga zi mahako kasi ku tirisa khwatsi a Mhaka ya Nungungulu wutirelini?

WULAWULA HI MHAKA LEYI VANHU VA KARATEKAKO HI YONA

14, 15. U nga mu pimanyisisa kuyini Paule wutirelini?

¹⁴ Paule i wa xuva nguvu ku ti zwananisa ni “vanhu vontlhe” wutirelini gakwe. (Gonza 1 Va Le Korinte 9:19-23.) Wona lezaku Paule i wa rinzela ku ‘kuma vaJuda, lava va nga lahasi ka nayo, lava va nga hiko na nayo, ni lava va gome.’ I wa lava ku bhula ni “vanhu vontlhe, kasi hi ku maha lezo [a] fela ku hanyisa vanwani.” (Miti. 20:21) Hi nga mu pimanyisisa kuyini Paule a xikhati lexi hi ti longiselako kasi ku bhulela lisine a “vanhu vontlhe” xipanzeni xa hina ke? — 1 Tim. 2:3, 4.

¹⁵ Laha ka Wutireli ga hina ga Mufumo kuta zingheniso hweti ni hweti. Zi ringise. Kanilezi loku ku hi ni zilo zinwani zi karatako vanhu xipanzeni xa nwina, longisela zingheniso zi vuxako kutsakela xungetano hi zilo lezo. Ehleketa hi matshamela ya lomu u hanyako kona, a vanhu va kona, ni lezi zi va karatako nguvu. Hi kulanzela alakanyela mutsalo wu khumbako zilo lezo. A muwoneleli wo kari wa xipanze i wulile lezi xungetano hi ndlela leyi yena ni sati wakwe va tirisako hi yona Biblia: “A vanhu vo tala va hi vumelela ku gonza vesi ginwe loku hi tekela kuba mhaka hi tlhela hi nga wuleteli zotala. Hi tshama hi vululile maBiblia ya hina; neti hi va losa, ho gonza mutsalo.” Wona zikombiso zi tsongwani za timhaka, ziwutiso, ni mitsalo yi wonekileko lezaku ya pswala mihanzu, lezi u nga zi ringisako xipanzeni xa wena.

16. Tlhamusela lezi hi nga tirisisako zona a bhuku ga Isaya 14:7 wutirelini.

¹⁶ Loku u hanya ka wutshamu gi kalako gi nga hi na kurula, u nga ha wutisa munhu uku: “Hi nga alakanya ku tshuka ku chikela siku gaku a mahungu ma zwalako ka zihaxa-mahungu zontlhe mava lawa: ‘Makunu a misava yontlhe yi le kuruleni. A vanhu vaba ni mikulungwani hi kutsaka.’ U nga ku yini? Hi zalezi gi wulako a Biblia ka Isaya 14:7. A Biblia gi na ni zitsumbiso zo tala za Nungungulu xungetano hi xikhati xa kurula xi tshinelako.” Loku a vumela, gonza xinwe xa zitsumbiso lezo lomu ka Biblia.

17. U nga mu tirisisa kuyini Mateu 4:4 wutirelini?

¹⁷ Xana a vavanuna vo tala xipanzeni xa wena za va karatela ku kuma za kutihanyisa? Loku zi hi tano, u nga sangula bhulo hi ku wutisa lezi: “I mali muni leyi a wanuna a faneleko kuva nayo kasi a ngango wakwe wuva ni litsako?” Loku a hlamulile, mu byele lezi: “A vavanuna vo tala va na ni mali yo tala ku hunza leyo, kanilezi va simama ku vumala litsako mingangweni yabye. Kasi xini lexi hakunene xi lavekako?” Gonza Mateu 4:4 u tlhela u kumbuka a xigonzo xa Biblia.

18. Kasi ku chavelela vanwani, hi nga mu tirisisa kuyini Jeremia 29:11?

¹⁸ Xana a vanhu xipanzeni xa nwina va kari va xaniseka hi kota ya khombo go kari ga ntumbuluko ga ha hi ku humelelako? U nga ha sangula xingheniso xa wena hi ku wula lezi: “Nzi tile laha kasi ku ta ku chavelela. (Gonza Jeremia 29:11.) U zi wonile zilo zinharu lezi Nungungulu a hi xuvelako zona? ‘Kurula,’ ‘ku hanya hi nga hi na khombo’ ni ‘kutsumba.’ A zi ku tsakisi ku tiva a ku i lava lezaku hiva ni wutomi ga gi nene? Kanilezi zi nga kotekisa kuyini?” Vulula xigonzo xi yelanako ni mhaka leyi lomu ka broxura Mahungu yo Saseka.

19. Tlhamusela lezi Kuvululelwa 14:6, 7 a nga tirisiswako zona lomu vanhu va ranzako wukhongeli.

¹⁹ Xana u hanya ka xipanze lexi a vanhu va kona va ranzako nguvu wukhongeli? Loku zi hi tano, u nga ha sangula bhulo hi ku wutisa lezi: “Loku a ngelosi yo kari yo tshuka yi ku byela zilo, u wa ta demba ndleve u ingisela ke? (Gonza Kuvululelwa 14:6, 7.) Lezi a ngelosi leyi yi nge ‘chava Nungungulu,’ zi wa nga tava za lisima a ku tiva lezaku yi wula Nungungulu muni? A ngelosi leyi ya hi komba a Nungungulu wa kona loku yiku ‘Loyi a nga maha tilo ni misava ni bimbi ni tihlowo ta mati.’ Yi wula mani?” Gonza a bhuku ga Tisimu 124:8, legi gi nge: “A kuvunwa ka hina ku le vitweni ga Jehova, loyi a nga maha tilo ni misava.” Hi kulanzela, mu byele lezaku loku a zi tsakela u nga mu tlhamusela zinwani xungetano hi Jehova Nungungulu.

20. a) Hi yihi ndlela ya ku tirisa Mavingu 30:4 kasi ku gonzisa munhu a vito ga Nungungulu? b) Mutsalo muni u tolovelako ku wu tirisa wu pswalako mihanzu yi nene?

²⁰ U nga ha sangula bhulo ni muswa hi ku wula lezi: “Nzi tsakela ku gonza mutsalo wu nga ni xiwutiso xa lisima nguvu. (Gonza Mavingu 30:4.) A ku na munhu a zi kotako ku maha lezo, hikwalaho zi te dlunya lezaku wu wulawula hi Muvangi wa hina.a Hi nga gi tivisa kuyini a vito gakwe? Loku u zi lava, nzi nga ku komba lomu ka Biblia ga wena.”

TSIKA MHAKA YA NUNGUNGULU YI NYIKA NTAMU WUTIRELI GA WENA

21, 22. a) Xana a mutsalo wu hlawulilweko khwatsi wu nga cicisa kuyini a wutomi ga munhu? b) Zini u ti yimiseleko ku maha wutirelini ga wena?

²¹ A wu zi tivi lezi a vanhu va to hlamulisa zona ka mutsalo wo kari u wu hlawulileko khwatsi. Hi xikombiso, a Timboni timbiri le Austrália ti lo enzela a nhwana wo kari. A munwe wabye i lo mu wutisa lezi, “Wa gi tiva vito ga Nungungulu?” zonake a lera a mutsalo wa Tisimu 83:18. A wasati loye i ngalo, “Nzi lo tala hi ku hlamala. A xikhati va nga famba, nzi lo teka mova nzi famba 56 wa tikilometro nziya ka xitolo xa ku xavisa mabhuku kasi nzi ya kamba vito lego ka maBiblia manwani nzi tlhela nzi gi cuwuka ka disionario. Laha nzi nga kholwa lezaku a vito ga Nungungulu hi Jehova, nzi lo ti wutisa aku a ku na zinwani nzi nga zi tiviko ke.” Zalezo, yena ni nuna wakwe va lo sangula ku gonza Biblia niku hi kufamba ka xikhati va lo bapatizwa.

²² A Mhaka ya Nungungulu ya cica a wutomi ga vanhu lava va yi lerako va tlhela va kholwa ka zitsumbiso zi hanyako za Jehova. (Gonza 1 Va Le Tesalonika 2:13.) A mahungu ya Biblia ma na ni ntamu nguvu ku hunza ni xihi lexi hi nga xi wulako na hi zama ku khumba mbilu ya munhu. Hikwalaho, ni kwihi zi kotekako, hi fanele ku tirisa a Mhaka ya Nungungulu — hakuva ya hanya!